Taem Yu Holemstrong Long Jeova, Yu Mekem Hem i Glad
“Pikinini blong mi, yu yu mas kam waes. Sipos yu kam waes, bambae mi glad we mi glad, mo sipos man i faerap long mi, be bambae mi gat ansa blong givim long hem.”—PROV. 27:11.
1, 2. (a) ?Buk blong Job i tokbaot wanem tok we Setan i sakem long ol man blong wok blong God? (b) ?Wanem i soem se Setan i gohed blong tok agensem Jeova afta we Job i ded?
JEOVA i letem Setan i traem man blong wok blong hem, Job, blong luk sipos i holemstrong long Hem. From samting ya, Job i lusum ol anamol mo ol pikinini blong hem, mo helt blong hem i kam nogud. Be taem Setan i traem fasin blong Job blong holemstrong long God, hem i no jes tingting nomo long man ya, Job. Setan i talem se: “Olgeta samting we man i gat bambae hem i givim blong sevem sol blong hem.” Tok ya blong Setan i no go long Job nomo, be i go long ol narafala man tu. Mo nating se Job i ded finis, be tok ya blong Setan i go yet long ol narafala man blong God.—Job 2:4, NW.
2 Samwe long sikis handred yia afta long ol trabol ya we Job i kasem, God i putum long tingting blong Solomon blong raetem ol tok ya: “Pikinini blong mi, yu yu mas kam waes. Sipos yu kam waes, bambae mi glad we mi glad, mo sipos man i faerap long mi, be bambae mi gat ansa blong givim long hem.” (Prov. 27:11) I klia se long taem ya, Setan i stap tok agensem Jeova yet. Mo long wan vison, aposol Jon i luk we Setan i stap tok agens long ol man blong wok blong Jeova. Hemia smoltaem afta we Kingdom blong God i stanap long 1914 mo we Jisas i sakemaot hem long heven i kamdaon long wol. !Yes, tede tu, nating se yumi stap long ol las dei blong ol rabis fasin blong wol ya, be Setan i stap traem yet fasin blong ol man blong God blong holemstrong long Hem!—Rev. 12:10.
3. ?Wanem trifala impoten lesen we yumi lanem long buk blong Job?
3 Naoia, tingbaot trifala impoten lesen we yumi lanem long buk blong Job. Faswan se, traem we Job i kasem i mekem yumi luksave klia trufala enemi we i stap agensem ol man, mo stamba blong ol fasin agens we ol man blong God oli stap kasem. Enemi ya hem i Devel Setan. Namba tu se, nomata wanem traem we yumi kasem, be sipos yumi gat wan gudfala fasin fren wetem God, hemia bambae i givhan long yumi blong holemstrong long Hem. Namba tri se, sipos yumi kasem traem long sam samting, God bambae i givhan long yumi olsem we hem i bin givhan long Job. Blong mekem olsem tede, Jeova i yusum Tok blong hem, ogenaesesen blong hem, mo tabu spirit blong hem.
Tingbaot Oltaem Prapa Enemi Blong Yumi
4. ?Hu i stamba blong ol trabol long wol tede?
4 Plante man oli no bilif se Setan i stap. Taswe, nating se oli wari from ol trabol we i stap long wol, be oli no luksave se Devel Setan nao i rili stamba blong ol trabol ya. I tru, ol man oli gat fol from bighaf blong ol trabol we oli stap kasem. Tufala faswan bubu blong yumi, Adam mo Iv, tufala i jusum blong lego God ya we i Wokem tufala. Stat long taem ya, ol man oli mekem fulap samting we oli no waes nating. Be nating se i olsem, Setan nao i pulum Iv blong hem i stronghed mo i agensem God. Hem nao i pulum ol man we oli gat sin mo we oli stap ded, blong oli kam aninit long paoa blong hem. Ol man ya oli mekemap wan grup, no wan wol we Setan i bos long hem. From we Setan i “god blong wol ya,” ol man long wol oli soemaot ol semfala fasin we hem i gat, olsem flas fasin, oli wantem kam hae moa long narafala, oli jalus, oli griri, oli save trikim man mo oli stronghed. (2 Kor. 4:4; 1 Tim. 2:14; 3:6; ridim Jemes 3:14, 15.) Ol fasin ya oli mekem se ol man blong politik mo jos oli raorao, oli no laeklaekem olgeta nating, oli mekem ol kruked fasin, mo oli no gat oda long laef blong olgeta. Samting ya i karem moa trabol long ol man long wol.
5. ?Yumi mas wantem blong mekem wanem wetem impoten save ya we yumi gat?
5 !Hemia wan impoten save we yumi ol man blong Jeova, yumi gat! Yes, yumi kasem save se hu nao i stamba blong ol trabol we oli stap gohed long wol. Taswe, save ya i mas pulum yumi blong joen long wok blong prij, blong mekem ol man oli save long prapa enemi ya blong yumi. ?Olsem wanem? ?Yumi glad blong stanap long saed blong trufala God Jeova, mo eksplenem long ol narafala olsem wanem bambae Hem i finisim Setan mo ol trabol long wol?
6, 7. (a) ?Hu i stamba blong ol strong fasin agens we ol man blong trufala wosip oli stap kasem? (b) ?Olsem wanem yumi save folem eksampol blong Elihu bifo?
6 Setan i stamba blong plante long ol samting we oli mekem ol man oli harem nogud, be hem i stamba tu blong ol strong fasin agens we ol man blong God oli stap kasem. Setan i gat strong tingting blong traem spolem bilif blong yumi. Jisas i talem long aposol Pita i se: “Saemon, Saemon, yu lesin gud. Setan i askem finis long God, blong i letem hem i kam traem bilif blong yufala blong seraot yufala, olsem we man i sevem sanbij blong sakemaot korel.” (Luk 22:31) Long sem fasin, wanwan long yumi we i biaen long Jisas bambae i kasem traem. Pita i talem se Setan i sem mak long “wan laeon we i stap singaot bigwan, i stap lukaot man blong i kakae.” Mo Pol i talem se: “Olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.”—1 Pita 5:8; 2 Tim. 3:12.
7 Taem wan trabol i kasem wan brata blong yumi, ?olsem wanem yumi soemaot se yumi luksave we Setan nao i stamba blong trabol ya? Yumi no mas lego brata ya, be yumi mas mekem olsem Elihu bifo. Elihu i toktok long Job olsem wan trufala fren blong hem. Ale yumi tu, yumi givhan long brata ya blong yumi blong faet agensem enemi ya blong yumi, Setan. (Prov. 3:27; 1 Tes. 5:25) Yumi wantem givhan long brata ya blong i traehad long evri rod blong holemstrong long Jeova, mo mekem Hem i glad.
8. ?From wanem Setan i no win taem hem i traem blong stopem Job blong i no moa ona long Jeova?
8 Faswan samting we Setan i mekem Job i lusum, hemia ol anamol blong hem. Ol anamol ya oli gat bigfala praes, i luk olsem se Job i kasem mane taem hem i salem ol anamol ya. Be Job i yusum ol anamol ya tu blong mekem wosip long Jeova. Afta we Job i mekem ol pikinini blong hem oli klin long fes blong God, hem i “girap long eli moning blong mekem sakrefaes blong ol pikinini ya blong hem wanwan, blong mekem olgeta oli klin long fes blong God. Oltaem hem i stap mekem samting ya, from we hem i ting se maet wan long olgeta i mekem sin long tingting blong hem we i spolem God.” (Job 1:4, 5) Taswe, oltaem nomo Job i bonem anamol blong mekem sakrefaes i go long Jeova. Be Job i no moa save mekem olsem taem ol traem blong hem oli stat. Job i no moa gat “ol nambawan samting” blong hem we hem i save yusum blong ona long Jeova. (Prov. 3:9) !Be hem i naf blong yusum maot blong hem blong ona long Jeova, mo hemia nao samting we hem i mekem!
Wokem Wan Gudfala Fasin Fren Wetem God
9. ?Wanem samting long laef blong yumi we i sas tumas?
9 Nating sipos yumi rij no yumi pua, yumi yangfala no yumi olfala, yumi gat gudfala helt no yumi sik, be yumi evriwan i save gat wan gudfala fasin fren wetem Jeova. Nomata wanem traem we yumi fesem, be sipos yumi frengud wetem God, hemia bambae i givhan long yumi blong holemstrong long Hem mo mekem Hem i glad. Samfala tu oli gat smol save nomo long saed blong trutok, be oli no fraet blong stanap strong, mo oli gohed blong holemstrong long God.
10, 11. (a) ?Wan sista blong yumi i mekem wanem taem fasin blong hem blong holemstrong long God i kasem traem? (b) ?Wanem strong ansa we sista ya i givim long Setan?
10 Tingbaot stori blong Sista Valentina Garnovskaya. Hem i wan long ol Witnes long Rasia we oli stap tru long God olsem Job, mo oli holemstrong long God nating se oli kasem ol bigfala traem. Long 1945, taem Valentina i gat samwe 20 yia blong hem, wan brata i prij long hem. Brata ya i gobak blong visitim hem tu taem mo i tokbaot Baebol long hem, be biaen, Valentina i neva luk brata ya bakegen. Nating se i olsem, Valentina i stat blong prij long ol man raonabaot long hem. From samting ya, ol polis oli holem hem mo oli givim panis long hem blong stap eit yia long wan rabis kalabus. Long 1953 Valentina i kam fri, mo stret long taem ya hem i stat blong prij bakegen. Ol polis oli holem hem wan moa taem, mo oli putum hem long kalabus blong ten yia. Hem i spenem plante yia long wan rabis kalabus, ale biaen oli muvum hem i go long wan narafala rabis kalabus bakegen. I gat sam sista long ples ya we oli gat wan Baebol. Wan dei, wan sista i soem Baebol ya long Valentina. !Samting ya i mekem hem i glad tumas! !Tingbaot, Valentina i bin luk wan Baebol nomo bifo, hemia Baebol we brata ya we i prij long hem long 1945, i bin holem!
11 Long 1967, Valentina i kam fri long kalabus mo hem i tekem baptaes long wota, blong soemaot se hem i givim laef blong hem i go long Jeova. Hem i yusum fasin fri blong hem blong wok strong long wok blong prij gogo kasem 1969. Long yia ya, ol polis oli holem hem bakegen, mo oli talem se hem i mas stap long kalabus blong tri yia. Nating se i olsem, Valentina i gohed nomo blong prij. Bifo we hem i ded long 2001, hem i bin givhan long 44 man blong oli kasem trutok. Hem i bin spenem 21 yia long ol rabis kalabus. Valentina i rere blong lego evri samting, wetem fasin fri blong hem tu, blong hem i save gohed blong holemstrong long God. Long en blong laef blong Valentina, hem i talem se: “Mi mi neva gat wan prapa ples blong mi, blong mi save laef long hem. Olgeta samting we mi mi gat oli save stap insaed long wan bokis nomo, be nating, mi mi glad mo mi haremgud blong mekem wok blong Jeova.” !Hemia wan strong ansa we Valentina i givim long Setan, from we Setan i talem se ol man bambae oli no save stap tru long Jeova taem oli kasem traem! (Job 1:9-11) Yumi save sua se Valentina i mekem Jeova i glad tumas. Mo Jeova i wantem tumas blong luk taem ya we bambae Hem i mekem Valentina, wetem ol narafala we oli fasgud long Hem gogo kasem we oli ded, oli laef bakegen.—Job 14:15.
12. ?Olsem wanem lav i givhan long fasin fren blong yumi wetem Jeova?
12 Fasin fren blong yumi wetem Jeova i stanap long lav we yumi gat long hem. Yumi tinghae long ol nambawan fasin blong God mo yumi traehad long evri rod blong mekem laef blong yumi i laenap wetem ol stamba tingting blong Hem. Defren olgeta long tok we Setan i talem, yumi glad nomo blong givim lav blong yumi i go long Jeova mo yumi no askem wan samting long Hem from. Lav ya we i kamaot long hat blong yumi, i givim paoa long yumi blong holemstrong long God taem yumi kasem traem. Long saed blong Jeova, Hem bambae “i stap gad gud long olgeta we . . . tingting blong olgeta i stap strong long hem.”—Prov. 2:8; Sam 97:10.
13. ?Jeova i lukluk wanem taem hem i luk ol samting we yumi mekem blong hem?
13 Lav i pulum yumi blong ona long nem blong Jeova, nating sipos yumi harem se yumi no save mekem plante long wok blong Hem. Jeova i luk gudfala tingting we i pusum yumi blong wok, mo hem i no jajem yumi sipos yumi no save mekem evri samting we yumi wantem mekem long wok blong Hem. Samting we yumi mekem i impoten, be risen we i pusum yumi blong mekem wok ya i impoten tu. Job i harem nogud bitim mak long tingting blong hem, mo i stanap strong long plante traem. Nating se i olsem, hem i gohed yet blong talemaot long ol man we oli agensem hem, se hem i laekem tumas ol rod blong Jeova. (Ridim Job 10:12; 28:28.) Long laswan japta blong buk blong Job, God i talem se hem i kros long Elifas, Bildad, mo Jofara, from we ol tok blong olgeta oli no tru nating. Mo long semtaem, Jeova i soemaot se hem i glad long Job taem hem i singaot Job se “man blong wok” blong hem, mo i talem long Job blong i prea long bihaf blong trifala man ya we oli mekem i no stret. (Job 42:7-9) I gud we yumi tu yumi mekem ol samting long fasin we Jeova bambae i glad long yumi.
Jeova i Givhan Long Ol Man Blong Wok Blong Hem
14. ?Olsem wanem Jeova i givhan long Job blong i stretem tingting blong hem?
14 Job i gohed blong holemstrong long God nating se hem i no stretgud olgeta. Sam samtaem tingting blong hem i gorong from we hem i harem nogud tumas. Olsem taem ya we hem i toktok long Jeova, i se: “God. Mi mi stap krae i go long yu, be yu yu no ansa long mi. Taem mi mi prea long yu, be yu yu no lesin long mi. . . . Long olgeta paoa blong yu, yu stap ronem mi blong spolem mi.” Mo tu, Job i wari tumas blong pruvum long ol man se hem i stret, taem hem i talem se: “Mi mi no mekem wan samting nogud,” mo bakegen se: “Laef blong mi i klin, mi no mekem faet nating, mo prea blong mi long hem i no blong giaman.” (Job 10:7; 16:17; 30:20, 21) Nating se i olsem, Jeova i givhan long Job wetem kaen fasin taem Hem i askem plante kwestin, blong Job i no moa tingting tumas long saed blong hem wan. Ol kwestin ya oli givhan long Job tu blong i luksave klia se God i hae moa long ol narafala samting, mo se ol man oli no save skelem olgeta wan wetem God, from we oli smol tumas. Job i letem Jeova i lidim mo stretem hem.—Ridim Job 40:8; 42:2, 6.
15, 16. ?Wanem ol rod we Jeova i yusum blong givhan long ol man blong hem tede?
15 Wetem kaen fasin, Jeova i givim advaes tu long ol man blong hem tede. Mo i gat sam narafala impoten blesing tu we yumi haremgud long hem naoia. Tingbaot, Jisas Kraes i givim ransom sakrefaes ya we yumi nidim blong God i fogivim ol sin blong yumi. Tru long sakrefaes ya, yumi save gat wan gudfala fasin fren wetem God, nating se yumi sinman nomo. (Jem. 4:8; 1 Jon 2:1) Taem yumi kasem ol traem, yumi save prea tu blong tabu spirit blong God i givhan mo i givim paoa long yumi. Mo tu yumi gat fulwan Baebol. Sipos yumi ridim mo tingting dip long ol tok blong hem, yumi stap rerem bilif blong yumi blong stap strong taem yumi kasem traem. Fasin blong stadi i givhan long yumi blong kasem save long ol bigfala kwestin we Setan i stanemap agensem hae rul blong Jeova, mo agensem fasin blong ol man blong God blong holemstrong long Hem.
16 Mo tu, Jeova i yusum “slef ya we i stret mo waes” blong givim kakae long saed blong spirit long bigfala famle ya blong ol brata we i stap long olgeta ples long wol, mo hemia i givhan long yumi from we yumi tu yumi stap insaed long bigfala famle ya. (Mat. 24:45-47, NW) Long samwe 100,000 kongregesen blong ol Witnes blong Jeova, i gat ol miting we oli blong tijim yumi mo mekem yumi strong blong fesem ol traem. Blong soemaot samting ya, tingbaot stori blong Sheila, wan yangfala Witnes long Jemani.
17. Talem wan stori we i soemaot se i waes blong folemgud ol advaes we ogenaesesen blong Jeova i stap givim tede.
17 Long wan dei we Sheila i stap long skul, tija blong hem i aot long klasrum mo ol studen oli stap olgeta nomo. Ol fren blong Sheila oli talem se bambae oli pleplei wetem wan Ouija board. Kwiktaem nomo Sheila i kamaot long klasrum, mo hem i glad se hem i bin mekem olsem taem hem i harem samting we i hapen afta. Taem ol fren blong hem oli stap pleplei wetem Ouija board, sam long olgeta oli haremsave paoa blong ol rabis spirit ale oli fraet mo oli ronwe. ?Be wanem i givhan long Sheila blong i kamaot kwiktaem long klasrum? Hem i eksplenem se: “I no longtaem i pas, long wan miting long Haos Kingdom, mifala i bin tokbaot ol denja we oli kamaot taem man i pleplei wetem Ouija board. Taswe, mi mi save wanem samting we mi mas mekem. Mi wantem mekem Jeova i glad, olsem Baebol i talem long Ol Proveb 27:11.” !I gud tumas we Sheila i bin stap long miting ya mo i lesingud long tok ya!
18. ?Yu yu gat strong tingting blong mekem wanem?
18 I gud we wanwan long yumi i mas gat strong tingting blong folemgud ol advaes we ogenaesesen blong God i givim blong lidim yumi. Taem yumi joen oltaem long ol miting, yumi ridim Baebol, stadi long ol buk we oli tokbaot Baebol, prea, mo yumi joen wetem ol man we oli bigman long ol Kristin fasin, yumi stap letem ogenaesesen ya i lidim yumi mo i givim paoa we yumi nidim. Jeova i wantem se yumi winim ol traem blong yumi, mo hem i trastem se bambae yumi gohed blong holemstrong long hem. !Yumi gat wan bigfala blesing blong leftemap nem blong Jeova, blong holemstrong long Hem, mo blong mekem Hem i glad!
?Yu Yu Tingbaot?
• ?Wanem ol trabol mo traem we Setan i stamba blong olgeta?
• ?Wanem nambawan samting we yumi gat?
• ?Fasin fren blong yumi wetem Jeova i stanap long wanem?
• ?Wanem sam long ol rod we Jeova i yusum blong givhan long yumi tede?