Namba Faef Stamba Rod
Lukaot Save Blong God We Yu Nidim Blong Fren Gud Wetem Hem
?BAEBOL I TIJIM WANEM? “Olgeta we oli stap lukaot God from we oli no gat paoa blong hem long laef blong olgeta, oli save harem gud.”—Matiu 5:3.
?WANEM I SAVE TRAEM YUMI? I gat plante taosen skul long wol. Plante long olgeta oli tijim defdefren samting we yu save mekem blong fren gud wetem God. ?Olsem wanem yu save luksave skul we i tijim trutok mo we God i glad long hem? Sam bigfala man blong raetem ol buk oli talem se man we i bilif long God mo i mekem wosip long hem, i no gat stret tingting, mo bambae hem i kasem trabol. Magasin ya, Maclean’s, i talemaot tingting blong wan man we i no bilif long God, se: “Kristin bilif ya se i gat wan samting moa i bitim save blong ol saentis mo tingting blong man . . . i daonem mining blong laef, wan laef nomo we yumi gat, mo i pulum man blong wantem faet.”
?YU SAVE MEKEM WANEM? Yu mas stadi gud long ol pruf se God i stap. (Rom 1:20; Hibrus 3:4) Yu no mas letem wan man i blokem yu blong yu no moa lukaot ol ansa blong ol impoten kwestin, olsem: ?From wanem yumi laef? ?I gat wan laef afta we man i ded? ?From wanem plante man oli safa? ?Wanem samting we God i wantem mi blong mekem? Impoten samting we yu yu mas mekem blong harem gud oltaem, hemia se yu mas faenem ansa long ol impoten kwestin ya.
Be yu no mas bilif long evri samting we ol narafala oli talem long yu. Tok blong God i talem se yu mas yusum “tingting” blong yu, blong faenemaot wanem samting we God i glad long hem. (Rom 12:1, 2, NW) Bambae yu kasem blesing sipos yu traehad olsem. Sipos yu makemaot wan taem blong stadi Baebol mo yu mekem ol advaes blong hem oli wok long laef blong yu, bambae yu blokem plante problem, bambae yu no wari tumas, mo bambae yu glad long laef. Yu save trastem promes ya. Plante milian man blong ol defren kantri oli lanem trutok long saed blong God mo stamba tingting blong hem, nao samting ya i givhan bigwan long olgeta.
Taem yu folem ol advaes blong Baebol nao yu luk se i wok gud long laef blong yu, bambae yu kam klosap moa long God. I gud yu askem long wan Witnes blong Jehova blong i mekem Baebol stadi wetem yu. Sipos yu mekem olsem, ating bambae yu gat sem tingting olsem aposol Pol, we i raetem se: “Fasin ya blong bilif blong yumi i wan rod blong man i kasem plante samting, be i rod blong man ya nomo we i save harem gud long wanem samting we hem i gat.”—1 Timoti 6:6.
[Tok blong pija long pej 8]
Yu mas faenemaot wanem samting we God i glad long hem