?From Wanem Yumi Mas Folem Ol Loa Blong Baebol?

?OLSEM wanem? ?Ol loa blong Baebol we man mo woman tufala i mas folem, oli no stret long taem blong yumi? ?Oli strong tumas blong yumi folem? Nogat. Ol loa blong Baebol oli save givhan long yumi blong blokem ol trabol ya:

▪ Bambae yumi no kasem ol rabis sik blong man we i mekem nogud fasin wetem woman

▪ Bambae yumi no gat pikinini blong man no woman we yumi no mared long hem

▪ Bambae yumi no harem nogud we mared blong yumi i brok

▪ Bambae tingting blong yumi i no trabol

▪ Bambae yumi no harem nogud from we narafala i yusum yumi nomo

Jehova, hem i God we i mekem yumi.a Hem i wantem se yumi harem gud long ol presen we hem i givim long yumi, mo hem i wantem se ol presen ya oli mekem i gud long yumi. God nao i ‘stap tijim yumi blong givhan long yumi.’ (Aesea 48:17) Man no woman we i folem ol loa blong Baebol i harem gud from we:

▪ God i glad long hem

▪ Tingting blong hem i kwaet

▪ Mared blong hem i stap gud

▪ Ol man oli gat gudfala tingting long hem

▪ Hem i gat gudfala tingting long hem wan

?Olsem wanem sipos yu no stap folem ol loa blong Baebol long laef blong yu? ?Yu yu save jenisim fasin blong yu? ?Bambae God i no glad long yu from ol samting we yu yu mekem bifo?

Yu traem tingbaot samfala we oli joen long Kristin kongregesen bifo. Bifo we oli kam Kristin oli mekem sam nogud fasin. Samfala oli no mared, be oli slip wetem man no woman finis. Mo samfala we oli mared, oli slip wetem woman blong narafala man no man blong narafala woman. Sam man oli slip wetem man mo sam woman oli slip wetem woman. Be olgeta ya oli jenisim fasin blong olgeta, mo oli kasem plante blesing. (1 Korin 6:9-11) Tede, plante taosen man long ol defren ples long wol, oli jenisim fasin blong olgeta tu. Oli lego ol nogud fasin blong olgeta, mo oli mekem laef blong olgeta i laenap wetem ol loa blong Baebol. From samting ya, oli kasem plante blesing. Yumi save tingbaot Sarah we yumi tokbaot finis. Bambae eksampol blong hem i givhan long yumi.

“Kwiktaem Nomo Mi Mi Harem Gud”

Nating se Sarah i mekem eni samting we hem i wantem, hem i harem se hem i no fri mo i no glad olsem we hem i wantem. Hem i talem se: “Mi no save harem gud long tingting blong mi. Mi mi sem from ol samting we mi mekem. Mo mi fraet se bambae mi gat bel no mi kasem wan rabis sik. Oltaem mi mi bilif se God i stap, mo mi save se hem i harem nogud from ol fasin we mi stap mekem. Mi harem olsem se mi mi doti long fes blong God, nao tingting blong mi i no save stap kwaet nating.”

Sloslo, Sarah i gat strong tingting blong jenisim fasin blong hem. Hem i askem papa mama blong hem we tufala i Witnes blong Jehova, blong tufala i givhan long hem. Mo hem i askem ol Kristin elda long kongregesen tu, blong oli givhan long hem. Hem i talem se: “Mi mi sapraes bigwan. Papa mama, mo ol elda long kongregesen, oli kaen long mi mo oli soemaot we oli lavem mi. Kwiktaem nomo mi mi harem gud.”

Naoia Sarah i gat tu pikinini. Hem i talem se: “Mi mi no haedem ol nogud desisen we mi bin mekem. Mi mi talemaot long tufala. Mi wantem se tufala i kasem save se mi harem nogud tumas from we mi no bin folem ol loa blong God. Mi traehad blong tijim tufala se yumi harem gud moa taem yumi no mekem ol doti fasin blong man wetem woman. Yumi harem gud long helt blong yumi mo long tingting blong yumi. Mi save se God i no wantem se yumi harem nogud, taswe hem i givim ol loa, blong yumi mekem ol fasin we i klin.”

Sipos yu folem ol loa blong God, bambae yu tu yu harem gud long plante blesing. Baebol i promes se: ‘Ol loa we God i stap tijim yumi long hem oli stret, mo olgeta we oli stap obei long ol loa ya, oli stap harem gud. Ol tok we God i putum oli stret gud, mo oli stap givim save long yumi. Hem i stap givim pei long man we i stap obei long ol loa ya.’—Ol Sam 19:8, 11.b

[Ol futnot]

[Tok blong makem poen long pej 8]

Plante taem olgeta we oli no folem ol loa blong Baebol, oli harem nogud long tingting blong olgeta

[Tok blong makem poen long pej 9]

Olgeta we oli folem ol loa blong Baebol, oli harem gud long tingting blong olgeta mo mared blong olgeta i stap gud