Ol Tok Blong Hem Oli Givhan Long Yumi
“Tok blong yu i olsem laet. Oltaem hem i stap soemaot rod blong mi, mo i stap lidim mi.”—OL SAM 119:105.
?BAEBOL I DEFREN OLSEM WANEM? Sam stori buk oli nambawan, be oli no save givhan long yumi. Mo oltaem ol man oli mas mekem ol niu buk from we ol save long ol olfala buk i no stret. Be Baebol i no olsem. Baebol i talem se: “Olgeta tok ya we oli raetem long Baebol bifo, oli raetem blong tijim yumi.”—Rom 15:4.
YU TRAEM TINGBAOT: I tru se Baebol i no wan buk blong givim save long saed blong helt. Be hem i talem ol gudfala tingting we oli save givhan long yumi blong yumi harem gud long bodi mo long tingting blong yumi. Baebol i talem se: “Sipos tingting blong man i stap kwaet oltaem, hemia bambae i mekem bodi blong hem i stap gud.” (Ol Proveb 14:30) Baebol i talem tu se sipos man i no wantem joen wetem ol narafala, oltaem bambae “hem i stap tingbaot ol bisnes blong hem nomo.” Man olsem “hem i no save agri long ol gudfala tok we ol narafala man oli givim long hem.” (Ol Proveb 18:1) Be “man we i stap givim presen i go, hem i save harem gud moa, i winim man we i stap kasem presen.”—Ol Wok 20:35.
OL SAVE WE OLI FAENEMAOT: Yumi harem gud long bodi blong yumi from we tingting blong yumi i kwaet, yumi gat ol gudfala fren, mo yumi givim samting long narafala long gladhat blong yumi. Wan buk (The Journal of the American Medical Association) i talem se: “Ol man we oli faerap long kros, oli kasem sik ya we wan saed bodi i ded. Namba blong olgeta i tu taem antap long olgeta we oli blokem kros.” Blong ten yia, ol man oli mekem wan stadi long ol olfala blong Ostrelia. Stadi ya i soemaot se ol olfala we “oli joen moa wetem ol fren mo wetem ol man we oli trastem,” oli laef longtaem moa. Long yia 2008, ol man Kanada mo Amerika oli faenemaot se man we i “pem samting blong givim long narafala, hem i harem gud moa i bitim man we i pem samting blong hem wan nomo.”
?WANEM TINGTING BLONG YU? ?Yu ting se yu save trastem ol save blong helt long wan narafala buk we ol man oli raetem klosap 2,000 yia bifo? ?No Baebol nomo i olsem?
[Tok blong makem poen long pej 8]
“Mi mi laekem tumas Baebol . . . from we ol tok blong hem i mekem mi mi harem gud.”—HOWARD KELLY, WAN DOKTA LONG JOHNS HOPKINS YUNIVESITI BLONG MERESIN