STADI LONG WIK BLONG

WAJTAOA STADI

▪ Taem Yumi Lavem Jehova, ‘i No Gat Wan Samting i Save Mekem Yumi Foldaon’

Olgeta Kristin oli stap long wan resis blong kasem praes ya, laef we i no save finis. Be yumi evriwan i sinman, taswe yumi save foldaon. Long stadi ya, bambae yumi tokbaot faef samting we oli save mekem yumi foldaon. Mo tu, bambae yumi tokbaot samting we yumi mas mekem blong yumi no foldaon, nao bambae yumi winim resis ya blong laef.

▪ ?Long Hat Blong Yu, Yu Wantem Tumas Blong Save Jehova?

Buk blong Jeremaea i givim plante save long yumi long ol fasin we oli haed long hat blong man. Stadi ya bambae i givhan long yumi, blong yumi save wanem fasin blong man we i ‘no mekem sakomsaes long hat blong hem,’ mo wanem trabol we ol Kristin oli save kasem sipos oli no mekem olsem. Sipos long hat blong yumi, yumi wantem tumas blong save Jehova, ?yumi mas mekem wanem? Bambae yumi tokbaot samting ya tu.—Jer. 9:26; 24:7.

▪ Naoia We “Yufala i Save God Finis,” ?Yufala i Mas Mekem Wanem?

Sipos yumi wantem save God mo yumi wantem we God i save yumi, ?yumi mas mekem wanem? Maet yumi stap long trutok longtaem finis. Nating se i olsem, yumi mas traehad oltaem blong kamgud moa. ?Yumi mekem samting ya olsem wanem? ?From wanem? Long stadi ya, bambae yumi faenem ansa blong ol kwestin ya.

▪ Jehova i Olsem Hom Blong Yumi

Ol man blong wol ya oli no laekem yumi nating. Be yumi no mas fraet. Stadi ya bambae i soemaot se Jehova i stap lukaot gud oltaem long ol man blong hem.

▪ Yumi Leftemap Hae Nem Blong Jehova

?I minim wanem blong save nem blong God? ?I minim wanem se man i wokbaot long nem blong God? ?God i harem olsem wanem, taem ol man oli no respektem nem blong hem? Long stadi ya, bambae yumi faenem ansa blong ol kwestin ya.