Sinema Ya “Eureka Drama” i Givhan Long Plante Man Blong Faenem Trutok

“!MI FAENEM!” Hemia nao mining blong tok ya, “!Eureka!” Long ol yia 1800, ol man blong digim gol long California, long Amerika, oli talem tok ya long bigfala voes taem oli faenem wan gol. Be Charles Taze Russell mo sam Baebol Studen, oli faenem wan samting we i sas moa long gol, hemia trutok blong Baebol. Mo oli glad blong serem trutok ya long ol narafala.

Long yia 1914, plante milian man oli joen long sam bigfala taon, long sam kantri, blong lukluk sinema ya “Photo-Drama of Creation,” (Sinema Blong Ol Samting We God i Wokem). Sinema ya ol International Bible Students Association (I.B.S.A.) oli wokem, mo i tekem eit aoa blong lukluk. Sinema ya i gat ol pija we oli muvmuv, ol slaed pija we oli gat ol naes kala, mo voes blong ol man we oli stap talem stori, mo ol naes miusik. Sinema ya i tokbaot ol stori blong Baebol, i stat long taem we God i mekem wol ya go kasem en blong Wan Taosen Yia We Kraes i Rul long hem.—Rev. 20:4.a

?Be olsem wanem long ol man we oli laef long ol smol taon mo ol vilej? Blong mekem se olgeta tu oli kasem trutok blong Baebol, long Ogis 1914, I.B.S.A i karemaot sam haf blong sinema ya “Photo-Drama” mo mekem wan narafala sinema bakegen we nem blong hem “Eureka Drama.” Hem i sot moa long sinema ya “Photo Drama,” mo i isi moa blong yusum mo karem i go olbaot. Oli seraotem sinema ya long tri haf, mo wanwan long olgeta oli kamaot long sam narafala lanwis tu. Faswan hemia: “Eureka X.” Long haf ya oli yusum toktok mo ol miusik we oli rikodem. Namba tu hemia: “Eureka Y.” Long haf ya oli yusum evri tok we oli rikodem mo ol naes slaed pija we i gat kala long hem. Mo namba tri hemia: “Eureka Family Drama,” mo oli wokem i blong ol famle. Oli yusum nomo sam voes we oli rikodem, mo sam singsing blong jos. Ol man we oli kasem “Eureka Drama,” oli save pem tu ol gramafon mo sam narafala masin we oli no sas tumas long ol Baebol Studen.

From we sinema ya i no nidim ol bigfala masin mo skrin blong soemaot, ol Baebol Studen oli save tekem i go soem long sam niufala teritori, olsem ol smol taon mo vilej. Olsem nao, oli talemaot gud nius blong Kingdom long olgeta. “Eureka X,” we hem i ol toktok nomo we oli rikodem, oli save plei long hem long dei mo long naet. Mo “Eureka Y” we i yusum ol slaed pija, oli save lukluk, nating se i no gat lektrik. Oli yusum wan spesel masin we nem blong hem, carbide lamp blong soem sinema ya. Wan ripot we i kamaot long wan Wajtaoa long lanwis Finlan, i talem se: “Mifala i save soem sinema ya long eni ples we mifala i go.” !Yes, plante man oli laekem sinema ya!

Ol Baebol Studen ya oli waes gud. Bitim we oli rentem wan bigfala haos blong soem sinema ya, olgeta oli yusum ol klasrum, haos kot, ples we ol man oli wet long tren, mo ol rum blong ol bigfala haos we ol man oli stap spel long hem. Ol ples ya oli fri nomo. Plante taem oli soem sinema ya long ol open ples nomo. Oli hangem wan waet kaliko long wol blong haos olsem wan skrin, mo soem sinema ya long hem. Oli soem tu long ol fam. Antony Hambuch i talem se: “Ol man we oli wok long ol fam oli mekemrere wan ples we ol man oli save stap long hem, mo harem gud long program we bambae i kamaot. Oli putum ol jea, mo sam wud blong ol man oli save sidaon long hem.” Ol brata we oli go blong soemaot sinema ya, oli yusum wan hos we i pulum wan kat, blong karem olting blong olgeta blong soem sinema, ol samting blong slip mo blong kuk.

Long samples we oli soem sinema ya long hem, smol man nomo oli kam lukluk, be long sam narafala ples, i gat plante handred man. Long Amerika, oli soem sinema ya long 150 taon, mo total namba blong ol man we oli kam lukluk sinema ya hem i 400. Oli soem long ol klasrum nomo. Long samples, samfala oli wokbaot 8 kilometa, blong kam lukluk sinema ya. Ol fren blong Charlotte Ahlbergs long Swiden, oli go lesin long sinema ya long haos blong hem. Oli talem se ol tok we oli harem i “tajem hat” blong olgeta. Long wan smol taon long Ostrelia, i gat samwe long 1,500 man wantaem we oli kam blong lukluk sinema ya. Wan ripot we i kamaot long Wajtaoa, i soemaot se long ol hae skul, ol tija mo ol studen, oli sapraes tumas taem oli lukluk ol naesfala pija mo harem ol tok long sinema ya. Mo tu, from we plante man oli laekem sinema ya, ol haos blong wajem muvi oli soem sinema ya oltaem.

OLI MEKEM TRUTOK I GRU

Bifo, ol kongregesen blong ol Baebol Studen oli sanem sam brata oli go long ol defdefren taon mo vilej, blong mekem miting long ol pablik ples. Long rod ya oli save statem ol niu kongregesen. Taswe, “Eureka Drama” i givhan bigwan long ol brata ya. Yumi no save stret total namba blong ol man we oli lukluk “Eureka Drama.” I gat 86 tim blong ol brata we oli stap soemaot sinema ya long ol defdefren ples. Ol tim ya oli soem sinema ya long evri ples we oli go. Be long yia 1915, ol brata oli stap kasem ripot blong 14 tim nomo. Taswe long en blong yia 1915, ripot we i kamaot i soem se i gat moa long 1 milian man we oli lukluk sinema ya. Mo samwe 30,000 man oli askem ol buk we oli tokbaot Baebol.

Ating samfala oli fogetem “Eureka Drama” finis. Nating se i olsem, plante man long Ostrelia, mo Ajentina, mo Saot Afrika, mo Inglan, mo India, mo ol aelan long Karibin, oli faenem trutok blong Baebol from we oli lukluk sinema ya. Trutok i sas moa long gol, taswe, olgeta ya oli save singaot bigwan se “!Eureka!”