Putum Ol Mak Long Saed Blong Spirit
1 !Tingbaot nambawan blesing ya we bambae yumi save kasem, hemia blong presem Jeova blong olwe! Blong givhan long yumi blong kasem mak ya, i gat sam narafala mak long saed blong spirit we yumi save putum mo traehad blong kasem naoia. Ol mak ya oli save halpem yumi blong yusum paoa blong yumi long wan fasin we i waes. (1 Kor. 9:26) ?Wanem sam mak we yu yu naf blong kasem?
2 Stadi Baebol: ?Yu yu stap rerem ol miting blong kongregesen? ?Sipos yes, yu tektaem tu blong faenemaot moa save long wanem we yu rerem mo yu stap tingting dip long hem? ?Eksampol, taem yu rerem Wajtaoa Stadi mo Kongregesen Buk Stadi evri wik, yu yu jes putum laen aninit long ol ansa, no yu jekem ol vas mo tingbaot from wanem oli eksplenem olsem? ?Yu save putum mak se evri wik bambae yu traem faenemaot moa long saed blong sam poen long Baebol riding we yumi folem long Tiokratik Skul? I nidim taem mo fasin traehad blong stadi dip long saed blong spirit, be i gat plante blesing i save kamaot tu.—Prov. 2:4, 5.
3 Ol Miting Blong Kongregesen: Wan narafala mak we yu save putum hemia blong go oltaem long olgeta faefala miting blong kongregesen. Sipos yu kam eli long miting bambae yu save joen wetem ol narafala brata mo joen long faswan singsing mo prea, samting ya i save leftemap gudfala tingting mo filing insaed long kongregesen. Ating yu save traem givim ansa long evri miting, mo yu save traem mekem ol ansa blong yu i kam moa gud. Maet yu save talem olsem wanem wan vas long paragraf i joen wetem stamba poen long stadi, no yu save tokbaot olsem wanem yumi save yusum poen ya long evri dei laef blong yumi.—Hib. 10:24, 25.
4 Wok Blong Prij: Minista wok blong yumi i save kam moa gud taem yumi putum ol mak blong traem kasem. ?Yu yu putum wan mak long saed blong ol aoa long wok blong prij we yu wantem traem kasem evri manis? Samfala oli luk se fasin ya i givhan long olgeta. ?No yu save traem kam moa gud long sam haf blong minista wok blong yu? Maet yu traem blong yusum Baebol moa taem yu prij long ol haos wanwan, maet yu wantem mekem ol visit we oli karem frut, maet yu traem statem ol Baebol stadi, no yu kam moa gud long fasin blong tij taem yu mekem ol Baebol stadi.
5 ?Ol papa mama, yufala i stap leftemap tingting blong ol pikinini blong yufala blong putum ol mak long wok blong Jeova? Halpem olgeta blong luksave se wok blong paenia, misinari, no wok long Betel i wan nambawan rod blong soemaot bigfala tangkiu we oli gat long Jeova.—Prija 12:1.
6 Taem yumi skelem ol wok blong yumi, putum ol mak long saed blong spirit, mo wokhad blong traem kasem ol mak ya, bambae yumi faenem wan glad we i stap kam bigwan moa long wok blong Jeova, mo bambae yumi leftemap tingting blong ol narafala tu.—Rom 1:12.