Soem Gudfala Eksampol Long Toktok Mo Fasin
1 Aposol Pol i leftemap tingting blong Timoti blong soem gudfala eksampol long toktok mo fasin blong hem. (1 Tim. 4:12) Yumi tu, yumi mas soem eksampol long toktok mo fasin blong yumi, antap moa taem yumi joen long wok blong prij. Olsem nao, bambae yumi soem sipos yumi naf no yumi no naf blong kasem hat blong man we yumi storian wetem hem.
2 Yumi nidim blong soemaot evri gudgudfala fasin. Sam long ol fasin ya, hemia fasin blong tingbaot narafala, kaen fasin, mo waes fasin. Taem yumi wokem ol fasin ya, yumi soemaot se yumi tingbaot olsem wanem fasin blong yumi i save gat paoa long filing ol narafala. Ol gudfala fasin we yumi soem long wok blong prij, oli sem mak long ol samting we yumi putum long kakae blong mekem i tes gud. Sipos i no gat ol samting ya, kakae bambae i no tes gud mo bambae man i no wantem kakae. Semfala samting i save kamaot sipos yumi no soemaot ol gudfala fasin, taem yumi stap storian wetem narafala.—Kol. 4:6.
3 Soem Gudfala Eksampol Long Toktok: I impoten tumas blong smael mo talem halo, taem yumi stap talemaot gud nius. Taem yumi soem trufala kaen fasin long fastok blong yumi, yumi soem long man blong haos se yumi rili intres long hem. Taem hem i toktok, yumi mas lesingud mo soem respek long ol tingting blong hem. Taem yumi toktok, yumi mas tok long fasin we i waes mo i mekem man i glad.—Skelem wetem Ol Wok 6:8.
4 Sam samtaem yumi mitim man we i no kaen, mo i wantem rao. ?Yumi mas mekem wanem? Pita i talem se, yumi mas toktok “long kwaet fasin we i gat ona long hem.” (1 Pita 3:15 NW; Rom. 12:17, 18) Jisas i talem se sipos man blong haos i no wantem lesin long mesej blong Kingdom, yumi mas ‘ravemaot graon long leg blong yumi.’ (Mat. 10:14) Sipos yumi soem ol gudfala fasin nating se man i no glad, maet samting ya i save mekem se man ya i lesin long yumi.
5 Soem Gudfala Eksampol Long Fasin: Yumi mas tingbaot filing blong ol man taem yumi stap prij long olgeta long ol taon we i bisi mo long ol pablik ples. Yumi no mas toktok bigwan tumas no fosem olgeta blong bilif. Mo tu, yumi no mas blokem rod blong ol man we oli stap pas. Taem yumi stap long haos blong ol man we oli intres, yumi mas soem ol fasin we i stret. Yumi mas soem fasin tangkiu from kaen fasin blong hem. Sipos wan pikinini i folem yumi, hem i mas soem respek long man blong haos mo ol samting long haos blong man ya. Pikinini ya i mas soem ol gudfala fasin mo hem i mas lesin taem yumi stap storian. Sipos ol pikinini oli stronghed, samting ya bambae i no givim wan gudfala witnes nating.—Prov. 29:15.
6 Klos mo hea blong yumi i mas soemaot klia long ol man se yumi man blong karem Tok blong God. Klos mo hea blong yumi i no mas olbaot mo i no mas flas bitim mak. Oli mas “stret gud long mak blong gud nius.” (Skelem wetem Filipae 1:27.) Taem yumi tingbaot olsem wanem blong putum klos mo mekem hea long fasin we i stret, bambae yumi no mekem ol narafala oli foldaon no oli faenem fol long wok blong yumi blong prij. (2 Kor. 6:3, 4) Gudfala eksampol blong yumi long toktok mo fasin i save pulum ol man blong laekem mesej blong Kingdom. Mo samting ya i givim ona long Jeova.—1 Pita 2:12.