Ona Long Jisas Kraes—Fandesen Blong Bilif Blong Yumi
1 I impoten tumas we yumi kasem save olsem wanem Jisas Kraes i wok blong mekem plan blong Jeova i kamtru. Jisas i givim laef blong hem blong pemaot ol man we oli obei. (Matyu 20:28) Sipos Jeova i no bin soemaot lav blong hem olsemia, yumi no save kasem gudfala laef long fyuja. Yumi save wet nomo blong ded.
2 Long taem blong Memoriol, yumi tingting moa long laef blong Jisas, mo ol tijing blong hem, mo sakrafaes blong hem. (Luk 22:19) Yumi tangkyu tumas long God from we “hem i laekem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” From samting ya, yumi wantem ona long God mo Kraes. Taswe, yumi glad blong talemaot gud nyus long ol narafala man. ?Olsem wanem yumi save mekem samting ya?—Rom 5:8, 10.
Soemaot Tangkyu
3 Yumi luksave se Jisas nomo hem i bos long ogenaesesen blong Jeova long wol. Hem i yusum ‘slef we i stret mo waes’ long wol blong givim kakae long yumi long saed blong speret, taem yumi nidim. Taem we Jisas i yangfala nomo, hem i soemaot se hem i laekem tumas Tok blong Papa blong hem. Blong folem eksampel blong hem, yumi mas stadi mo tingtinggud long ol kakae long saed blong speret we yumi kasem. Yumi mas tingbaot olsem wanem yumi save yusum ol save ya blong tijim gud ol narafala man. (Matyu 24:45, 46; Luk 2:46-50) Sipos yumi gat tangkyu long ogenaesesen blong Jeova mo ol kakae we hem i givim long saed blong speret, bambae yumi glad blong folem ol samting we hem i talem, mo yumi wok tugeta wetem ol elda.
4 Yumi tu, taem yumi mekem wan samting we yumi lanem long Tok blong God, yumi stap ona long Kraes, mo yumi stap leftemap minista wok blong yumi. Jisas i prapa Hae Pris blong yumi mo hem i stret olgeta, “hem i narafala olgeta long ol man nogud.” (Hibrus 7:26) Hem i stap folem ol rul we hem i talemaot long ol narafala man. From we yumi man blong wok blong hem, yumi mas traem kasem sem mak. Taswe, taem yumi storebaot promes blong Jeova long saed blong nyufala wol we stret fasin bambae i stap long hem, yumi mas soemaot long fasin blong laef blong yumi naoia se yumi naf blong stap long nyufala wol ya.—Matyu 7:21; I Korin 1:18; 1 Jon 2:17.
Kraes i Bos Long Yumi Long Wok Blong Prij
5 Long Epril mo Mei, bambae yumi givimaot sabkripsen blong Wajtaoa. Yumi save ona long Jisas long rod ya tu. Yumi save soemaot pej 2 long ol Wajtaoa, we i talem se: “Wok blong Wajtaoa i blong pulum ol man oli bilif long King Jisas Kraes we i stat rul naoia, mo i mekem blad blong hem i ron blong openem rod blong itenel laef long ol man.” Fastaem, yumi mas traem givimaot sabskripsen long ol man. Be sipos oli no save mekem sabskripsen no oli no wantem, yu save soemaot tufala magasin mo wan buklet long olgeta. Olsemia nao, yu yu save planem sam sid blong trutok long hat blong olgeta.
6 Fulap man we oli no Wetnes blong Jeova, oli soemaot respek long Jisas, from we oli joen wetem yumi long Memoriol. ?Yumi save statem wan Baebol stadi wetem olgeta, blong givhan long olgeta blong gohed moa long saed blong speret? I gud blong askem long olgeta sipos wan Wetnes i stap visitim olgeta no mekem stadi wetem olgeta. Yumi save soemaot se yumi rere blong givhan long olgeta. Sipos yumi givhan long olgeta long fasin kaengud, maet samfala oli kasem mak long saed blong speret we oli naf blong prij bifo we yumi mekem Memoriol bakegen nekis yia.
7 !Yumi gat bigfala tangkyu long hat blong yumi from we Jisas i soemaot lav, nao hem i givim laef blong hem blong pemaot yumi! Hem i givim wan strong fandesen long bilif blong yumi. Long laef mo minista wok blong hem, hem i soemaot stret rod long yumi.