Visitim Ol Man We Oli Intres Kwiktaem
1 “Neva yu mas livim samting i stap blong tumora sipos yu save finisim tede.” Plante man oli save gud tok ya we i pulum ol man blong oli finisim samting we i impoten kwiktaem. Yumi save folem rul ya long minista wok blong yumi olsem ekspiryens we bambae i kamaot biaen i soemaot.
2 Wan sista i givim wan buk long wan man mo i promes se bambae hem i kambak. Wan haoa biaen wan narafala sista i mekem mastik mo i go long sem haos ya. Man ya i kam long doa wetem buk ya long han blong hem mo i talem long hem se: “Taem yu talem se bambae yu kambak, mi no ting se bambae i kwiktaem olsem, be nating yu kam insaed, mi mi rere blong stadi.”
3 I tru maet wan visit olsem i no kamaot plante taem, be ekspiryens ya i soemaot klia se yumi mas visitim ol man we oli intres kwiktaem. Long manis Maj bambae yumi givimaot buk ya Revelation Climax. Ol samting we oli stap kamaot long wol tede oli soemaot se buk ya, we i eksplenem laswan buk blong Kristin Grik haf blong Baebol, i sem mak olsem ol nyuspepa, radyo, mo ol ripot long televisin blong soemaot ol samting we oli stap kamaot long laef blong ol man tede long wol.
4 Ol Man Oli Nidim Moa Help: Blong givhan long ol man blong kasem save long buk ya mo luksave se hem i stret long laef mo long fyuja blong olgeta, yumi mas mekem plan blong visitim olgeta bakegen, i gud blong mekem olsem sam dei biaen nomo. ?Olsem wanem bambae yumi mekem? Maet yu save talem long man blong haos se bambae yu visitim hem bakegen, olsemia nao bambae yu luk sipos hem i intres.
5 Wokem Rod Blong Mekem Visit: Tede i no isi blong holem wan taem, mo man blong haos maet hem i fogetem blong stap long taem we yu promes long hem. Nating se i olsem, sipos yu makem daon taem blong wan visit olsem mo meksua blong kambak bakegen—long sam dei biaen sipos yu naf blong mekem—bambae yu yu mekem responsabiliti blong yu blong tinghae long taem we yu promes long hem. Sipos man blong haos i no stap, traehad blong mitim hem. Maet taem hem i luk se yu tingting strong blong faenem hem long haos, hem i save tinghae long visit blong yu.
6 Sipos yumi no luksave se man i intres no nogat taem yumi toktok wetem hem fastaem, i gud blong gobak bakegen nating se man ya i no intres bigwan. I gud blong visitim ol man olsem kwiktaem. Maet yu bin wekemap intres blong man ya wetem buk ya Revelation Climax mo taem yu kambak bakegen maet yu sapraes blong luk se hem i intres bigwan. !Taswe i gud blong visitim ol man we oli intres kwiktaem!