Givim Fulhat Blong Yu Long Wok Blong Yu
1 Olsem ol disaepol blong Jisas, yumi gat wan wok blong talemaot gud nyus long saed blong Kingdom blong God mo blong mekem disaepol blong Jisas Kraes. (Mat. 24:14; 28:19, 20) I no gat wan narafala wok long wol ya we hem i impoten olsem. Laef blong plante milyan man i stap long denja. Taswe yumi mas wok wetem ful paoa blong yumi. Tok blong Pol i klia long samting ya se: “Long wanem wok we yufala i mekem, mekem wetem fulhat blong yu long Jeova.” (Kol. 3:23) “Fulhat” hem i olsem wan we i “wok strong wetem glad no i gat wan tingting nomo blong holemstrong wok blong hem.” ?Yu yu stap givim fulhat blong yu long wok blong yu?
2 ?Fulhat i minim wanem long yumi? Jeova i tokbaot wok blong yumi we hem i glad long hem, olsem wan hif blong ol ten hif. (Mal. 3:10) Samting ya i no minim wan stret namba, be ten hif i pija blong taem mo traehad we yumi givim long wok blong Jeova blong soemaot lav blong yumi long hem mo se yumi luksave mining blong givim laef blong yumi long hem. (w92 12/1 p. 15) Wok blong yumi i mas soem bigfala ona mo lav blong yumi long Jeova. Wan man we i givim fulhat blong hem i save harem olsem we hat i pusum hem blong mekem wosip long Jeova fulwan we i no bitim mak long helt blong hem mo ol responsabiliti long laef blong hem.
3 Pol i toktokgud long ol Kristin we oli stap “wokhad mo traehad” wetem tingting we i stap strong long hop blong olgeta. (1 Tim. 4:10) Oli stap kasem ol blesing blong Jeova, we i save ‘mekem olgeta oli rij.’ (Prov. 10:22) Be olgeta we oli givim smol taem mo paoa blong olgeta nomo, no oli wok wetem tingting we i hafhaf nomo, oli no save kasem glad we i kam from fasin blong givim. (Wok 20:35) Sipos yumi no wantem wok wetem fulhat blong yumi, i olsem we yumi stilim Jeova long ol wan hif blong ol ten hif we yumi mas givim long hem.—Mal. 3:8.
4 Mekem Wok Blong Yumi i Nambawan: Taem yumi joen long wok blong prij mo putum ripot blong yumi, ?ripot ya i tru? Our Ministry buk, pej 104, i talem se: “Taem we yumi putum long ripot blong yumi hem i mas stat taem yumi statem prij mo i mas finis long taem we yumi mekem laswan visit. Sipos yumi go kakae no dring long medel blong wok blong prij, yumi no save kaontem taem ya.” Yumi nidim blong gat wan gud plan mo traehad blong karem frut taem yumi stap long wok blong prij.
5 Mekem wok blong yumi i nambawan i minim we taem yumi stap long wok blong prij, yumi mas yusumgud taem ya fulwan. Wan we hem i givim fulhat blong hem, i no save mekem plan blong putum wan stret mak long wok blong prij blong hem we i stap mekem long ol ples we i gat jans blong mekem nomo, be i no stap joen long wok blong prij long ol haos wanwan. Wan yangfala pablisa we i no baptaes yet we hem i wok wetem fulhat, i no save go prij nomo from we papa mama blong hem oli talem long hem blong mekem olsem, ale hem i no glad nating blong prij long ol man mo joen long storeyan.
6 Pol i givim woning long yumi blong gohed blong wokhad blong yumi no kam slak long wok blong yumi. (Hib. 6:11, 12) !Yumi haremgud tumas sipos yumi save tingting bak long ol gudfala wok blong yumi wanwan we yumi no gat risen blong sem long hem—from yumi bin wok wetem fulhat! (2 Tim. 2:15) Bigfala glad blong yumi bambae i kam long klia ples taem yumi luk olgeta we oli gotru long bigfala trabol, nao long medel blong olgeta i gat wanwan we yumi bin givhan long olgeta. Yes, Jeova i stap givim rij blesing long olgeta we oli wosipim hem wetem fulhat.