Soem Sapot Long Ol Paenia
1 Ol man oli save se ol man blong God oli man blong wok strong long minista wok. Nating se i no evriwan we oli gat jans blong mekem paenia, be yumi evriwan i mas traehad blong gat tingting blong paenia, yumi mas wok wetem olgeta sol blong yumi. Yumi glad mo yumi leftemap tingting blong olgeta we oli save mekem paenia.
2 Blong kam wan paenia mo stap olsem wan paenia, hemia i wan bigfala samting. Ol paenia oli karem bigfala haf long wok blong prij mo tij. Oli no save mekem wok ya sipos oli no traehad mo oli no mekem sakrafaes from. ?Olsem wanem ol narafala man oli save sapotem mo leftemap tingting blong ol fultaem paenia ya we oli stap wok strong?
3 Samting We Ol Narafala Oli Save Mekem: Ol paenia oli nidim sapot blong ol elda. Taem ol elda oli wok wetem ol paenia, samting ya i leftemap tingting blong olgeta ya. Plante elda oli traehad blong wok wetem wanwan paenia long kongregesen samting olsem wan taem long wan yia. Long rod ya ol elda oli save talemaot ol gudfala wok we ol paenia oli stap mekem mo givhan long olgeta blong oli gohed gud moa. Ol paenia maet oli mas jenisim plan blong olgeta blong oli joen long wok blong prij taem wan elda hem i stap. Mo tu, ol elda bambae oli wantem mekem se i gat naf teritori we i stap long ol grup. Oli save putum ol narafala miting bakegen long wok blong prij long ol aftenun no long naet blong i stret wetem plan blong ol paenia. Samting ya i tru tumas long ol manis we i gat plante haftaem paenia.—Aes. 40:11.
4 Ol man blong givhan oli gat gudfala jans blong givhan long ol paenia taem oli sapotem olgeta long wok blong prij mo taem oli traehad blong lukaot long ol program blong kongregesen. Ol paenia sista oli glad taem ol brata oli lidim mo mekem miting blong prij long grup. Ol brata we oli lukaot long ol buk mo magasin oli save mekem se i gat naf buk mo magasin i stap. Taem oli lukaot gud long ol bisnes olsem, samting ya i givhan long ol paenia blong tingbaot minista wok blong olgeta nomo.
5 Evriwan i Save Givhan: Ol pablisa oli save givhan taem oli stap plante taem blong wok wetem ol paenia. Ol paenia oli glad long kampani mo sapot we ol narafala pablisa oli givim long olgeta. Maet yu save mekem plan blong wok wetem ol paenia wan taem long wan wik no tu taem long wan manis. Yu save serem ol samting long saed blong bodi wetem ol paenia, mo samting ya i mekem ol paenia oli glad.—Fil. 4:14-19.
6 Ol famle oli save givhan bigwan long ol memba blong famle blong olgeta we oli stap paenia. Samtaem, wan famle i save jenisim plan blong hem blong letem wan no moa long memba blong famle blong hem blong oli kam paenia. Wan sista we i gat tri pikinini i wok tu dei long wan wik. Ol pikinini boe blong hem oli givhan long hem blong oli stap go pem ol samting mo mekem ol wok afsaed long haos. Pikinini gel i givhan blong klinim ol samting mo kukum kakae. Stat long taem we hem i finisim skul, hem tu i stat blong mekem wok blong paenia, tufala i stap jenisim ol dei blong wok wetem mama blong hem. Gudfala fasin joen gud olsem long famle i save pulum moa paenia mo givim blesing long famle.
7 Ol paenia we oli stap traehad oli olsem wan blesing long kongregesen long plante rod. Hadwok mo eksampel blong olgeta i leftemap tingting blong plante man blong oli mekem moa long wok blong prij. Yes, yumi mas wantem blong sapotem olgeta. Sipos evriwan i traehad olsem ya, bambae evriwan i save glad nao oli presem Jeova.