?Yu Yu Save Presem Jeova Moa Long Epril?

¹ Deved, man blong raetem Ol Sam i wantem tumas long hat blong hem blong presem Jeova long fasin we Jeova i glad long hem, taswe hem i talem se: “Bambae mi mi singaot bigwan, mi talem tangkyu tumas long Hae God, bambae mi presem hem long fes blong olgeta man.” (Sam 109:30) Epril i wan gudfala taem blong ‘bambae yumi presem hem moa’ taem yumi joen moa long wok blong prij. (Sam 71:14) ?Yu yu stap plan blong stap long medel blong olgeta we bambae oli mekem samting ya taem oli joen long wok blong haftaem paenia?

² Plan Naoia: Proveb 21:5 i mekem yumi tingbaot se: “Ol plan blong man we i wok strong oli sua blong karem gudfala frut.” Samting ya i minim se yumi mas tokbaot bisnes ya wetem Jeova long prea, putum hem long fasples long ol plan blong yu. (Prov. 3:5, 6) Nekis samting, luklukgud long program blong yu we i stap naoia, blong luk weples yu save jenisim sam samting long hem blong yu save spenem tu haoa evri dei long wok blong prij. Yu mas ‘pemaot’ taem long ol narafala wok blong yu save spenem moa taem long wok blong prij.​—⁠Efes. 5:16.

³ Toktok Tugeta Mo Wok Tugeta: Aposol Pol i tokbaot samfala we oli olsem ‘man blong givhan mo mekem hem i haremgud’ taem hem i stap mekem minista wok blong hem. (Kol. 4:11) Tokbaot plan blong yu wetem olgeta we oli wantem joen long wok blong haftaem paenia long Epril. Sapot blong olgeta mo fasin blong yufala blong joengud i save mekem yufala evriwan i haremgud long saed blong speret. Elda we i lukaot long wok blong prij i save halpem yu sipos yu gat sam kwestin long saed blong ol miting blong prij no teritori we bambae yufala i save wok long hem.

⁴ Fasin blong wok tugeta mo sapot insaed long famle i save halpem wanwan memba blong famle blong mekem haftaem paenia. Maet oli mas jenisim fasin blong seraotem ol wok long haos blong smoltaem. Maet i nidim blong oli jenisim ol taem blong mekem ol wok ya tu. Sipos yufala i mekem wan famle miting blong tokbaot ol nid ya, samting ya i save halpem yufala blong kasem mak blong yufala. Gud fasin blong toktok tugeta mo wok tugeta oli stampa samting we i save mekem frut i kamaot.

⁵ Gat Wan Positif Tingting: Yu no mas kwik blong lego tingting ya blong mekem haftaem paenia from we maet ol samting oli no stret. Ol yangfala we oli stap long skul, olgeta we oli ritae finis, ol mama wetem ol pikinini, ol hed blong famle we oli wok fultaem, evriwan oli bin mekem sakrifaes ya​—⁠mo oli glad blong mekem olsem​—⁠blong oli save mekem haftaem paenia long Epril. Oli agri wetem man blong raetem Ol Sam se, “yufala evriwan we i stap obei long hem, yufala i presem hem,” mo oli no ting se i had tumas blong putum sam moa paoa olsem oli mas mekem blong spenem 60 haoa long wok blong prij. (Sam 33:1) Sipos yu no save mekem haftaem paenia, i gud yu serem glad blong olgeta taem yu mekem moa wok olsem wan pablisa long kongregesen.

⁶ Long plante man, wok blong haftaem paenia long Epril i bin wan step blong givhan long ol blong joen long wok blong fultaem paenia. Taem oli mekem moa long wok blong prij, oli faenem se i no hadwok tumas blong joen long wok blong fultaem paenia.

⁷ Yes, yumi wantem mekem evri samting we yu save mekem blong presem God blong yumi, Jeova. Haftaem paenia long Epril i wan nambawan rod blong soem fasin tangkyu blong yumi from fulap wok blong soemaot fasin kaen blong hem, we hem i mekem long yumi.