Yumi Nidim 40 Haftaem Paenia—?Yu Yu Save Haftaem Paenia Long Maj? Epril? Mei?
1 “Yumi Nidim 1,000 Man Blong Prij.” Hemia nem blong wan store long Wajtaoa long Epril, 1881. Hem i stap toktok long olgeta man mo woman we oli givim laef blong olgeta i go long Jeova finis, mo we “Masta i putum save blong trutok blong Hem i go long han blong olgeta.” Hem i askem olgeta sipos oli save makemaot moa taem, olsem we oli naf blong mekem, blong serem trutok blong Baebol wetem ol narafala. Olgeta we oli save yusum stret haf, mo bitim stret haf blong taem blong olgeta long wok blong Masta, hem i pulum olgeta blong kam ol kolpota prija, hemia ol paenia blong bifo.
2 Naoia, ol samting oli no sem mak olsem long ol yia 1800. Be wan samting i stap sem mak—ol man we oli givim laef blong olgeta i go long God finis, oli wantem gohed blong yusum moa taem olsem oli naf blong mekem, blong talemaot gud nyus. Taem ol pablisa long kongregesen oli mekem wok blong haftaem paenia, oli save kamgud moa long wok blong talemaot Kingdom, from we oli spenem moa taem long hem.—Kol. 4:17; 2 Tim. 4:5.
3 Stat long taem we oli jes stanemap wok blong haftaem paenia, plante handred taosen brata mo sista oli bin haremgud long wok ya. Olgeta oli laekem tumas rod ya blong paenia. !Long Vanuatu, long Epril 1985, i gat 26 haftaem paenia! !Long taem ya, i gat 70 pablisa nomo! Long Epril 1995, yumi kasem wan nyufala namba blong ol haftaem paenia, hemia 38. Yumi naf blong kasem nambawan mak ya bakegen long 1997.
4 Mifala i leftemap tingting blong yu blong traem haftaem paenia long wan no bitim wan long ol manis ya, Maj, Epril, mo Mei. ?From wanem Maj tu? From we long yia ya, bambae yumi mekem Memoriol blong ded blong Kraes long Sande, Maj 23. I no gat wan rod we i moagud blong spenem ol wik bifo long Memoriol, bitim we yumi joen wetem ful paoa blong yumi long wok blong talemaot Kingdom, wok ya we Masta mo Sevya blong yumi, Jisas Kraes, i statem. From bigfala wetnes we yumi givim long Maj, yumi save singaot plante man we oli intres, blong oli joen wetem yumi blong tingbaot ded blong Kraes bakegen. Long Maj, bambae yumi seremaot Save buk. Mo tu, i gat faef Sarede mo faef Sande long manis Maj. Samting ya bambae i givim jans long yumi blong prij plante long ol wiken. I tru, long manis Epril mo Mei tu, bambae yumi gohed blong wok strong long wok blong prij. Olsem nao, yumi save gobak long olgeta we oli bin soem intres, mo statem ol nyufala Baebol stadi long buklet ya, ?Wanem Samting We God i Wantem Yumi Blong Mekem? Mo tu, bambae yumi prij long olgeta teritori blong yumi wetem ol nyufala Wajtaoa mo Wekap!, antap moa long ol wiken.
5 H?Hu i Kasem Ol Mak We Hem i Naf Blong Haftaem Paenia?: Buk ya, Ol Rul Blong Mekem Minista Wok Blong Yumi, long pej 114, i talem se: “Nomata wanem wok yu gat blong mekem long laef blong yu, sipos yu tekem baptaes finis, mo yu stap folem ol gudfala fasin, mo sipos yu save mekem plan blong spenem 60 haoa long wan manis long wok blong prij, mo yu ting se yu save haftaem paenia blong wan manis no bitim wan manis, ale, ol elda long kongregesen bambae oli glad blong lukluk pepa we yu fulumap blong askem jans ya blong prij olsem.” ?Yu yu save mekem plan blong joen long nambawan wok ya long Maj? Epril? Mei?
6 Sipos ol elda oli gat positif tingting, mo ol pablisa oli sapotem ol plan blong olgeta wetem fulhat blong olgeta, yumi save kasem 40 haftaem paenia. (Hib. 13:7) I gud sipos hed blong ol famle i faenemaot hu long famle oli save joen long wok blong haftaem paenia long wan no bitim wan manis we oli stap kam.—Sam 148:12, 13; skelem wetem Ol Wok 21:8, 9.
7 Yu no mas kwik blong ting se i hadwok tumas long yu blong haftaem paenia, from we yu yu stap wok fultaem, yu stap go long skul, yu gat pikinini, no sam narafala wok we Baebol i talem se yu mas mekem. I tru se, maet samfala oli faenem se i hadwok. Be, sipos oli mekem wan gudfala plan mo wetem blesing blong Jeova, oli save win. (Sam 37:5; Prov. 16:3) Yu mas letem strong tingting blong wantem paenia i bos long laef blong yu. Yu no mas letem ol samting long laef blong yu oli winim strong tingting blong paenia. (Prov. 13:19a) Taswe, plante we oli gat bigfala lav long Jeova mo long ol narafala man, oli save jenisim program blong laef blong olgeta blong wan manis, blong spenem moa taem long wok blong prij. (Luk 10:27, 28) Plante blesing oli stap rere long olgeta we oli traehad wetem ful paoa blong olgeta long wok blong Kingdom.—1 Tim. 4:10.
8 Frut Blong Wok Blong Haftaem Paenia: Taem plante taosen man blong God oli traehad wetem ful laef blong olgeta blong haftaem paenia, i olsem we wan bigfala voes i singaot blong presem Jeova. Taem ol man ya blong talemaot Kingdom oli wok strong blong serem gud nyus wetem plante moa man, olgeta wanwan oli kam kolosap moa long Jeova, from we oli lanem olsem wanem blong dipen moa long hem blong kasem speret mo blesing blong hem.
9 Taem i gat ol haftaem, fultaem, mo spesel paenia we oli stap wok had long medel blong yumi, kongregesen i haremgud mo i gat laef long hem. Taem ol paenia oli tokbaot ol store blong prij, ol narafala tu oli kasem glad mo speret blong wok we oli soemaot. Samting ya i pusum sam narafala blong skelem laef blong olgeta, blong luksave wanem samting i impoten moa, mo olsem wanem oli save joen moa long wok blong prij we i impoten tumas. Wan sista we hem i tekem baptaes taem hem i gat 70 yia finis, i stat kwiktaem blong haftaem paenia evri manis. Sam yia biaen, oli askem long hem from wanem hem i stap traehad yet olsem wan haftaem paenia evri manis, nating se hem i olfala finis. !Hem i talem se hem i harem we hem i bin westem 70 yia long laef blong hem, taswe hem i no wantem westem ol yia we oli stap yet!
10 Olgeta wanwan we oli joen long wok blong haftaem paenia, oli kamgud moa long wok blong prij. Wan yangfala Wetnes i talem stret se: ‘Taem mi mi pikinini nomo, mi folem papa mama blong mi long wok blong prij. Mi laekem tumas wok blong prij. Be, samtaem biaen, mi luksave se mi mi defren long ol narafala pikinini long skul. Mi faenem se i hadwok blong storeyan wetem ol narafala pikinini long skul long saed blong trutok. Taem mi go prij long ol haos wanwan, mi fraet tumas blong mitim wan pikinini we i skul wetem mi. Mi luk se long taem ya, mi mi gat problem ya we mi fraet long ol man. [Prov. 29:25] Taem mi finis long skul, mi mekem disisen blong traem paenia blong smoltaem. Taem mi mekem olsem, mi stat blong laekem wok blong prij bitim olgeta taem bifo. Mi no moa tingbaot wok blong prij olsem wan pleplei, mo hem i no moa hevi tumas long mi. Taem mi luk we olgeta we mi stadi Baebol wetem olgeta oli stap gohedgud long trutok, mi haremgud long hat blong mi, from we mi luk se Jeova God i stap sapotem hadwok blong mi.’ Biaen, yangfala ya i joen long wok blong fultaem paenia.
11 Bigfala wok we i gohed taem i gat plante haftaem paenia long kongregesen, i mekem se yumi prij long fulwan teritori blong yumi. Brata we i lukaot long ol teritori long kongregesen, i save askem ol haftaem paenia blong givhan long teritori we yumi no stap prij plante long hem. Sipos yumi karem dina blong yumi i go, mo prij blong fuldei, yumi save kasem ol laswan kona blong teritori blong yumi.
12 Ol Elda Oli Mas Mekem Ol Plan Longtaem Bifo: I gud blong mekem wan program blong ol trifala manis we oli kam, blong kongregesen i save traem ol defren rod blong prij long ol defren taem blong wik, olsem aftenun mo sapa. Olsem nao, plante pablisa oli save joen. Antap long wok blong prij long ol haos wanwan, makemaot taem blong prij long rod, long ol stoa, mo gobak long ol haos we oli no gat man. Sipos ol elda oli mekem ol plan ya longtaem bifo, oli givhan long ol paenia blong wok wetem kongregesen long taem we i moa stret long ol paenia, mo we oli save kasem moa frut long wok blong olgeta. Ol elda oli mas talemaot klia long kongregesen ol plan blong prij. Olgeta we oli mekem ol miting blong prij, oli mas reregud mo mekem gudfala plan. Mo tu, i mas gat naf teritori i stap, mo kongregesen i mas odarem kwiktaem plante magasin mo buk.
13 Mekem Prapa Program Blong Yu Blong Prij: Wan brata, we fastaem hem i fraet blong haftaem paenia, i talem se: “Wok ya i no hadwok tumas olsem we mi tingbaot fastaem. Yu jes nidim wan gudfala program.” Long en blong haf ya, ?yu yu luk wan program blong haftaem paenia we i save wokgud blong yu? Yu nidim blong prij blong feftin haoa nomo evri wik, blong mekem wok blong haftaem paenia.
14 Ol waef mo olgeta we oli wok long naet we oli wantem mekem wok blong haftaem paenia, oli save makemaot taem blong prij long moning. Ol pikinini long skul mo olgeta we oli wok long moning, oli save prij long sapa. Samfala we oli wok fuldei, oli bin faenem se oli save tekem wan dei evri wik we oli no wok, sipos no, oli save prij long ful wiken mo long sapa. Plante we oli prij moa long ol wiken, oli jusum ol manis we oli gat faef wiken long olgeta. Long yia ya, Maj, Ogis mo Novemba, oli gat faef wiken. Yu save luk ol program long pej 6 olsem wan rod blong folem, mo yu save tingtinggud mo prea blong luksave wanem program blong prij bambae i wokgud blong yu.
15 Wan samting we i gud long saed blong wok blong haftaem paenia, hemia se yumi save jenisim program blong mekem i laenap wetem yumi. Yu save jusum ol manis we yu wantem paenia, mo yu save paenia plante taem olsem yu wantem. Sipos yu wantem gohed blong haftaem paenia evri manis be yu no naf blong mekem olsem, ?yu bin tingbaot blong paenia wan manis, spel wan manis, mo gohed olsem long ful yia? Samfala oli save gohed blong haftaem paenia blong plante manis wantaem.
16 Mekem Yumi Rere Blong Fultaem Paenia: Plante we oli gat speret blong paenia, oli wantem tumas blong mekem wok blong fultaem paenia, be oli no save sipos oli gat taem, paoa, mo sipos laef blong olgeta i stret blong mekem olsem. I sua se bighaf blong olgeta we oli stap mekem wok blong fultaem paenia naoia, oli bin haftaem paenia fastaem. Sipos wan haftaem paenia i prij blong wan moa haoa evri dei, no wan moa fuldei evri wik, hem i save kasem naf haoa blong fultaem paenia. Blong luk sipos yu yu naf blong mekem olsem, traem mekem 90 haoa long wok blong prij long wan no bitim wan manis we yu haftaem paenia. Long semtaem, bambae yu gat jans blong faenem sam moa visit mo Baebol stadi, mo bambae yu haremgud from we yu stap joen long olgeta haf blong wok blong prij mo mekem disaepol.
17 Wan sista i gohed blong haftaem paenia blong sikis yia. Long olgeta yia ya, hem i wantem kam wan fultaem paenia. Blong kasem mak ya, hem i traem fo defren kaen wok blong kasem mane, blong traem faenem wan we i stret blong hem i save spenem 90 haoa olsem wan fultaem paenia. Evri manis, hem i mekem wan no tu program blong luk sipos hem i gat rod blong fultaem paenia. Be taem hem i skelemgud olgeta, hem i harem se hem i no naf. Ale, hem i gohed blong askem Jeova blong lidim hem. Nao wan dei, taem hem i stap mekemrere Miting Blong Kingdom Wok, hem i ridim wan haf blong Kingdom Wok Blong Yumi, long Septemba 1991. Haf ya i talem se: “Yu no mas tingting tumas long ol haoa we yu mas kasem. I moagud blong tingbaot we yu gat moa jans blong joen long wok blong hivimap ol man. (Jon 4:35, 36)” Sista ya i talem se: “Mi ridim haf ya bakegen mo bakegen, maet faef no sikis taem. Mi luk se hemia nao ansa we Jeova i stap givim long mi. Long menet ya stret, mi mekem disisen blong joen long wok blong fultaem paenia.” Nating se program blong wok blong hem blong kasem mane i no rili gud tumas, hem i fulumap pepa blong fultaem paenia. Wan wik biaen, oli jenisim program blong wok blong hem, mo oli givim ol haoa long hem we oli stretgud long program blong hem blong paenia. Hem i talem se: “?Yu yu agri se hemia han blong Jeova we i wok?” Hem i gohed olsem: “Taem yu askem Jeova blong lidim yu, yu no mas ronwe long rod we hem i soemaot, be yu mas folem.” Sipos yu yu wantem tumas blong kam wan fultaem paenia, maet long en blong tri manis we yu haftaem paenia, hemia Maj, Epril mo Mei, bambae yu bilif fulwan se yu tu yu naf blong fultaem paenia.
18 Mifala i sua se Jeova bambae i blesem fasin blong ol man blong hem blong wok strong. Mo bambae hem i sapotem ol traehad blong olgeta blong talemaot gud nyus long saed blong rod blong sevem man, long spesel taem ya blong wok. (Aes. 52:7; Rom 10:15) ?Bambae yu yu ansa taem yu harem tok ya se i nidim 40 haftaem paenia long Maj? Epril? Mei?
[Bokis]
Olsem Wanem Blong Gohedgud Olsem Wan Haftaem Paenia
■ Yu mas gat strong tingting se yu naf blong mekem wok ya
■ Prea long Jeova blong askem hem blong blesem ol traehad blong yu
■ Askem wan narafala pablisa blong paenia wetem yu
■ Mekem wan program blong prij we i save wokgud
■ Odarem plante magasin
■ Sapotem ol plan blong kongregesen blong prij
■ Lukaot olgeta jans blong prij