Ol Miting Blong Prij We Oli Gat Mining
1 Long Luk 10:1-11, Luk i raetemdaon store blong wan miting we Jisas i bin mekem wetem ol 70 nyufala disaepol blong hem, blong givhan long olgeta blong mekemrere long wok blong prij. Hem i givim sam stret rod blong halpem olgeta blong gat gud plan, blong rere long wanem we bambae oli talem, mo wanem blong mekem taem i gat sam problem. Yumi save lanem samting sipos yumi luklukgud long store ya.
2 I klia se ol 70 disaepol evriwan oli bin stap long miting ya wetem Jisas. Bambae yumi westem taem nomo long ol miting blong prij sipos samfala oli stap kam let oltaem. Taem oli kam let, samting ya i mekem se brata i mas ogenaesem bakegen ol grup blong go long ol trak wetem ol haf blong teritori tu we oli mas go long hem. Plante taem samting ya i mekem se grup i let. Yumi evriwan i save mekem wok blong yumi taem yumi kam long stret taem mo rere blong go kwiktaem long teritori.
3 Jisas i givim wan stret poen blong storeyan long grup ya, hemia, ‘kingdom blong God.’ (Luk 10:9) Yumi kasem oda blong talemaot semfala mesej, mo oltaem yumi glad long advaes we i givhan long saed blong wanem yumi mas talem. Brata we i lukaot long miting ya i save yusum Reasoning buk, we i givim moa long 40 defren fastok mo sam stret vas blong Baebol we yumi save yusum, taem plante defren samting oli kamaot. Luklukbak smoltaem long wan no tu fasin blong storeyan i save givhan long yumi blong gat samting long tingting blong talem, we i mekem se yumi save toktokgud moa long ol man, we yumi no fraet.
4 Jisas i no talem nomo long ol disaepol blong hem wanem blong talem, be hem i talem tu olsem wanem blong talem. (Luk 10:5, 6) Ol pleplei we oli mekem long Miting blong Kingdom Wok oli soem olsem wanem yumi save toktokgud. Brata we i lukaot long miting blong prij i save talem bakegen wanem we oli bin lanem long las Miting blong Kingdom Wok mo givim sam advaes olsem wanem blong yusum ol poen ya long wok blong prij long dei ya. Wan smol pleplei we oli reregud long hem, blong soemaot wan isi storeyan long wan vas long Baebol, i save givhan long yumi blong gat wan klia tingting mo talemaot tingting ya.
5 Jisas i tijim ol disaepol blong hem tu long saed blong fasin blong olgeta wanwan. (Luk 10:7, 8) Long sem fasin, brata we i lukaot long miting blong prij i save talem sam stret rod blong givhan long yumi blong ronwe long eni samting we i save blokem yumi long wok blong yumi. Hem i save givim woning long yumi blong no stap hivap long ol kona blong rod no westem taem blong toktok wetem ol man we oli agensem yumi. Hem i save pulum tingting blong yumi long nid blong raetemgud ol not blong wok blong prij long pepa blong prij, no blong mekem ol man blong haos oli luksave se yumi akseptem ol presen mane blong givhan long wok long olgeta ples long wol. Hem i save pulum tingting blong ol papa mama blong lukaotgud long ol pikinini blong olgeta.
6 Ol 70 disaepol oli folemgud rod we Jisas i talem mo samtaem afta “oli kambak bakegen we oli glad tumas.” (Luk 10:17) Sipos yumi folem ol advaes we yumi kasem long ol miting blong prij, yumi tu yumi save tingbaot blong kasem moa glad taem yumi stap talemaot mesej blong Kingdom.—Wok 13:48, 49, 52.