Ansa Long Wan Kwestin

◼ ?Wanem ol samting we brata blong lidim miting blong prij i mas tokbaot?

Stamba risen blong mekem miting blong prij, hemia blong halpem yumi blong tingting gud long wok ya we bambae yumi mekem—hemia wok blong prij. Taswe, brata blong lidim miting ya i mas plan gud fastaem mo rere blong talem sam tok we i klia, i save leftemap tingting, mo i givhan gud long ol pablisa. Brata blong lidim miting i save ridim mo tokbaot vas blong dei smoltaem, sipos i joen wetem wok blong prij. Be, samting we i impoten moa blong tokbaot long miting ya, hemia minista wok, mo ol toktok i mas halpem olgeta we oli prij blong reregud blong mekem minista wok long dei ya.—2 Tim. 4:5.

Blong meksua se ol pablisa oli save wanem buk blong seremaot mo olsem wanem blong seremaot, brata i save yusum sam poen we oli kamaot long Kingdom Wok Blong Yumi. Long Dei blong Seremaot ol Magasin, i save gat wan pleplei we pablisa i yusum “?Yumi Tokbaot Wanem Long Ol Magasin?” Long taem blong seremaot ol narafala buk, brata i save tokbaot wan no tu fastok long Reasoning buk we oli stret long teritori blong yumi. Maet brata i tokbaot no maet i gat wan pleplei long saed blong wan haf blong minista wok, olsem fasin blong yusum Baebol taem yumi stori wetem wan man, olsem wanem blong ansa long tok we man i sakem blong blokem yumi, olsem wanem blong askem sipos man i wantem stadi Baebol, no olsem wanem blong visitim bakegen man we i soem intres.

Fulwan miting blong prij i no mas bitim 10 no 15 menet, hemia blong seraot ol man long ol grup, givim teritori, mo talem wan prea tu. Taem miting i finis, olgeta pablisa oli mas save se bambae oli wok wetem hu, mo oli prij wea, nao olgeta oli mas aot kwik blong go long teritori. From we miting i sot nomo, i impoten we ol pablisa oli kam long stret taem. Sipos miting blong prij i stap afta long wan miting blong kongregesen, olsem Wajtaoa Stadi, ale miting ya i mas sot moa. Yumi no nid blong ridim no tokbaot vas blong dei, from we ol pablisa oli bin harem finis ol gudfala tok we i kamaot long Baebol.

Ol elda oli mas mekem wan plan we oli makem nem blong ol brata we oli baptaes mo we oli naf blong lidim evri miting blong prij. Sipos i gat sam dei we i no gat wan brata blong lidim miting ya, ol elda oli mas jusumaot sam sista we oli baptaes we oli save mekem wok ya. Blong mekem miting ya, sista ya bambae i stap sidaon nomo, mo hem i save tokbaot smoltaem vas blong dei no sam narafala poen we oli joen wetem wok blong prij. Hem i mas kavremap hed blong hem taem i mekem wok ya.

Ol miting blong prij oli nambawan janis blong yumi harem tok we i leftemap tingting blong yumi mo i mekem yumi reregud blong joen long wok blong prij. Sipos brata we i lidim miting ya i reregud fastaem, bambae olgeta pablisa oli kasem moa gudfala frut.