Samting We i Moa Impoten Bitim Ol Narafala Samting Long Histri
1 Jisas i kam long wol ya from we Papa blong hem i sanem hem blong talemaot trutok we bambae i lidim man blong kasem laef we i no save finis. (Jon 18:37) Fasin blong hem blong stap tru long God kasem ded i givim ona long Jeova, i leftemap nem blong God, mo i mekem se hem i save pemaot yumi. (Jon 17:4, 6) Ol samting ya oli mekem se ded blong Jisas i moa impoten bitim ol narafala samting we oli hapen long histri blong man.
2 Stat taem God i wokem Adam, i gat tu man nomo we oli stretgud olgeta long wol. Adam, hem i naf blong givim ol nambawan blesing long ol pikinini blong hem. Be hem i tingbaot hem wan nomo, i mekem fasin rebel, ale hem i givim wan nogud laef long ol pikinini blong hem we bambae i finis long ded. Taem Jisas i kam, hem i soem fasin blong stap tru long God mo fasin obei we i stretgud olgeta, ale hem i openem rod long ol man we oli bilif blong kasem laef we i no save finis.—Jon 3:16; Rom 5:12.
3 I no gat narafala samting we i gud olsem sakrifaes we Jisas i givim taem hem i ded. Ded blong hem i jenisim histri blong man. Ded blong hem i mekem se plante bilyan man bambae oli save laef bakegen long ded. Mo hem i mekem se Kingdom ya we bambae i stap blong olwe, i save finisim olgeta rabis fasin mo mekem wol i kam paradaes. Ded blong hem bambae i mekem olgeta man oli fri long evri samting we i holemtaet olgeta mo ol kaen fasin slef.—Sam 37:11; Wok 24:15; Rom 8:21, 22.
4 Olgeta samting ya i halpem yumi blong luksave from wanem Jisas i talem long ol disaepol blong hem blong tingbaot ded blong hem evri yia long lafet blong Memoriol. (Luk 22:19) From we yumi save bigfala mining blong hem, yumi glad blong joen wetem ol kongregesen blong ol Wetnes blong Jeova long ful wol afta we san i godaon long Fraede, Epril 14. Bifo long taem ya, i gud sipos yu ridim olsem wan famle, ol store long Baebol long saed blong ol laswan dei blong laef blong Jisas long wol, mo fasin blong hem blong no fraet blong stanap long saed blong trutok. (Ol haf we yumi save ridim oli stap long 1995 Calendar, Epril 9-14.) Jisas i soem rod long yumi olsem wanem blong onagud long Man we i wokem yumi. (1 Pita 2:21) Yumi mas traehad fulwan blong singaot ol fren mo famle blong yumi, wetem ol man we yumi stadi Baebol wetem olgeta mo ol narafala man we oli intres, blong oli kam long impoten miting ya. Eksplenem fastaem long olgeta wanem bambae i kamaot long miting ya mo mining blong bred mo waen.—1 Kor. 11:23-26.
5 Ol elda oli mas mekem gudfala plan longtaem lelebet bifo long miting ya, blong mekem sua se Haos Kingdom i klin mo evri samting i stap long stret ples blong hem. Oli mas mekem plan blong kasem bred mo waen. Oli mas mekem plan long saed blong fasin blong pasem bred mo waen. Ol advaes blong talem olsem wanem blong soem respek long Lodsapa i stap long Wajtaoa (Engglis) blong Febuwari 15, 1985, pej 19. I gud sipos kongregesen i mekem plan blong prij moa long sam dei bifo long lafet ya mo long sam dei biaen.
6 Las yia, 12,288,917 man long wol oli joen blong tingbaot impoten taem ya. From we dei ya i impoten moa long ol narafala dei long kalenda, yumi evriwan i mas stap long lafet ya.