Mekem Lafet Blong Ded Ya We i Givim Hop Blong Laef We i No Save Finis
1 Afta we san i godaon finis long Epril 6, 1993, bambae yumi mekem lafet blong ded blong man ya we i stampa blong laef. (Ol Wok 3:15) I stret nomo blong tingbaot laef mo ded blong Jisas Kraes. Hop blong yumi blong laef we i no save finis i stanap long blad blong Jisas we i ron.
2 Memoriol i soem mining blong ded blong Kraes i mekem plan blong Jeova i kamtru. Plan ya i blong givim wan man we i stretgud olgeta olsem sakrifaes we i nidim blong pemaot ol laen blong Adam, mekem i isi blong milian man oli soem bilif mo laef blong olwe long paradaes long wol.—Jon 3:16.
3 Olgeta we oli laekem tru tok mo laef oli stap luk long taem ya we bambae oli mekem kakae blong Masta blong soem fasin obei long oda blong Jisas. (Luk 22:19) ?Wanem samting we yumi wanwan i save mekem blong soem fasin tangkyu long ransom sakrifaes blong Kraes? Blong luk save mining blong lafet ya, i impoten tumas blong mekem gudfala plan from. ?Wanem plan we yu stap mekem rere long spesel taem ya?
4 Mekem Plan i Rere Fastaem: I tru, bambae yumi mas mekem se olgeta memba blong famle oli stap long taem ya. Yumi mas rere long tingting tu taem yumi ridim mo tingting dip long ol vas blong Baebol we oli makem long 1993 kalenda blong Epril 1-6. I gud se long taem blong famle stadi blong yumi bifo long Epril 6, yumi save tokbaot mining blong memoriol. Mekem plan blong kam bifo mo stap smol taem afta long lafet ya blong memoriol blong mekem welkam long ol nyuwan we maet i fastaem blong olgeta blong kam.
5 Long ol wik bifo memoriol, askem ol man we yumi save se oli intres blong kam long lafet ya. Ol pepa blong invaetem ol man, oli bin sanem finis wetem ol fom blong kongregesen we oli stap sanem evri yia. Taem yufala i yusum pepa ya, tingbaot blong talem adres mo taem blong lafet ya long ples blong yufala long man we i intres. Mekem rere wan lis blong ol man we yu wantem invaetem olgeta. ?Olgeta we oli wantem kam oli gat transpot? ?Sipos no, yu save mekem wanem blong halpem olgeta? Sipos yu gat sam rum long trak blong yu, maet i gud blong askem elda sipos i gat man we i nidim transpot.
6 From lafet ya i wan impoten lafet blong yia mo i save gat bigfala namba blong man we bambae oli kam, ol elda oli mas mekem wan spesel plan blong rere fastaem. (1 Korin 14:40) Sam wik bifo Epril 6, ol elda bambae oli mas mekem wan spesel miting wetem ol brata we bambae oli mekem wok long taem ya blong lafet, blong mekem sua se oli save olsem wanem ol laen blong ol jea oli stap mo olsem wanem blong pasem waen mo bred. Sipos yu gat wok blong mekem long taem blong lafet ya, olsem wan man blong welkam no wan man blong pasem waen mo bred, yu mas folemgud tok blong ol elda we oli stret long ol wok ya. Taem ol elda oli jekem ol tok we oli stap long bokis long pej 7, oli save mekem sua se olgeta plan blong ol man blong welkam, ol man blong pasem waen mo bred, ol waen mo bred, mo man we i mekem tok oli reregud bifo taem ya.
7 Ol brata blong Kraes we oli stap long wol tede oli no plante, mo i no longtaem long fyuja, bambae lafet blong kakae blong masta bambae i kasem en blong hem. (1 Korin 11:25, 26) From we naoia i jans blong yumi blong mekem lafet ya, yumi gohed nomo blong mekem lafet blong ded we i givim hop blong laef we i no save finis.