Miting Blong Kingdom Wok Blong Epril

Wik We i Stat Long Epril 1

Singsing 132

10 min: Lokol mesej. Sam Advaes long Kingdom Wok Blong Yumi. Tokbaot sam nambawan store we oli bin kamaot raonabaot long taem blong Memoriol.

20 min: “!Yumi Mas ‘Strong Blong Mekem Ol Gudfala Samting’ Long Epril!” Elda we i lukaot long wok blong prij i mekem kwestin mo ansa long haf 1 kasem 10. Eksplenem (1) ol lokol plan blong mekem moa long wok blong prij long Epril, (2) olsem wanem blong halpem evriwan blong joen long wok ya, mo (3) olsem wanem blong halpem ol nyuwan mo ol yangfala blong joen tu.

15 min: “Traem Faenem Olgeta We Oli Stret Blong Kasem Laef.” Tokbaot ol rod blong storeyan we oli stap ya, mo mekem tu pleplei blong soem olsem wanem blong yusum ol rod ya. Sipos i gat taem, tokbaot sam advaes olsem wanem blong seremaot ol magasin, we i stap long Kingdom Wok Blong Yumi, Septemba 1995, pej 5.

Singsing 20 mo laswan prea.

Wik We i Stat Long Epril 8

Singsing 72

15 min: Lokol mesej. Ripot blong ol kaon. Tokbaot leta we Sosaeti i bin sanem blong talem tangkyu from ol presen mane. Tokbaot ol gudfala rod blong halpem ol nyuwan we oli bin kam long Memoriol, blong oli kam strong moa long saed blong speret. Storeyan long Wajtaoa, Epril 1, 1991, pej 9 kasem 12.

15 min: “Mekem Tabu Wok Long Dei Mo Long Naet.” Kwestin mo ansa. Ridim haf 5 mo 6.

15 min: “!Yumi Mas ‘Strong Blong Mekem Ol Gudfala Samting’ Long Epril!” Kwestin mo ansa long haf 11 kasem 15. Leftemap tingting blong evriwan blong skelem laef blong olgeta mo traem faenem rod blong sapotem moa wok blong prij.

Singsing 113 mo laswan prea.

Wik We i Stat Long Epril 15

Singsing 133

10 min: Lokol mesej. Talem bakegen long kongregesen long saed blong spesel pablik tok long Epril 21, nem blong hem “Holemtaet Fasin Blong No Gat Poen, Long Medel Blong Ol Rabis Man Blong Naoia.” Leftemap tingting blong evriwan blong mekem wan spesel fasin traehad blong halpem ol narafala blong kam.

15 min: “Laef i Stap Jenis.” Kwestin mo ansa. Makemgud se yumi mas talemaot mesej blong Kingdom long wan fasin we i stretgud long ol samting we ol man oli nidim moa. Talem sam problem long saed blong famle mo fasin joen blong ol man, we olgeta man tede oli stap tingbaot, olsem Wajtaoa blong Janewari 1, 1994, pej 22 mo 23, i tokbaot.

20 min: “Man i Save Bilif From Ol Samting We Hem i Harem.” Tokbaot olsem wanem blong yusum ol magasin we yumi livim wetem ol man blong mekem intres blong olgeta i gru moa, mo blong lidim olgeta blong stadi long buk ya Save. Mekem tu no tri pleplei.

Singsing 204 mo laswan prea.

Wik We i Stat Long Epril 22

Singsing 6

15 min: Lokol mesej. Tokbaot ol bigfala poen long spesel tok we yumi bin harem long wiken we i pas. Storebaot olsem wanem ol save ya i mas pusum ol man we oli intres blong mekem disisen blong joen long trufala wosip. Mo tu, tokbaot “Gohed Blong Kasem Stret Save,” mo makem se i impoten blong kam oltaem long Buk Stadi.

12 min: Wan Kwestin. Wan elda i givim tok ya. Eksplenem from wanem ol brata we oli lidim ol miting oli no mas singaot olgeta long kongregesen long fas nem blong olgeta nomo, we i no soem respek long taem blong miting.

18 min: Wan elda mo wan man blong givhan tufala i storeyan long haf ya “Ol Famle Blong Bifo We Oli Obei Long God​—Wan Eksampel Long Yumi Tede,” we i stap long Wajtaoa blong Septemba 15, 1995, pej 20 kasem 23. Soem olsem wanem ol poen ya oli save givhan long ol famle long ples blong yumi.

Singsing 143 mo laswan prea.

Wik We i Stat Long Epril 29

Singsing 144

12 min: Lokol mesej. Samfala oli tokbaot ol Wetnes blong Jeova olsem “wan krangke skul we i folem wan man nomo.” Samting ya i givim rong tingting long ol man long saed blong wok blong yumi mo ol mak we yumi wantem kasem. Yusum Reasoning buk, pej 202, blong eksplenem smoltaem olsem wanem blong ansa long ol man we oli talem olsemia.

15 min: Wokemgud Olgeta Teritori Blong Yumi. Elda we i lukaot long wok blong prij i givim tok ya. Maet yumi no stap prij plante long ol ples mo aelan farawe. Maet samfala oli no wantem prij long eria blong ol rijman no ol man we oli strong long skul blong olgeta. Maet yumi no stap prij long ol stoa mo ofis. Maet sam pablisa oli askem evritaem blong karem sem teritori we oli laekem, bitim we oli wok long teritori we oli mas mekem. Sipos kongregesen i gat teritori farawe, yufala i mas reregud fastaem. Maet yumi save mekem plan blong ol grup oli go long ol wanwan trak. Long ol ples we yumi save tekem jans blong prij nomo, ol pablisa oli mas reregud fastaem, mo oli mas luksave kwiktaem wan jans blong prij. Long ol ples we oli no letem yumi blong prij long ol haos wanwan, ol pablisa oli save visitim ol fren mo famle blong olgeta. Sam pablisa oli mekem wan program finis blong mekem olsem. Sam samtaem, yumi save askem bakegen long ol jif sipos yumi save prij long ol ples ya. Mekem sua se yumi kavremap olgeta teritori, wetem ol haos we oli no gat man, bifo we yumi givimbak teritori ya. Samfala oli no wantem we yumi kam long haos blong olgeta, be oli glad sipos wan pablisa we oli savegud hem i kam visitim olgeta. Talem sam moa gudfala advaes blong soem olsem wanem olgeta evriwan oli save givhan blong kavremap olgeta teritori blong yumi.

18 min: Seremaot Wajtaoa mo Wekap! Long Mei. Soemaot ol wanwan magasin. Long teritori we yumi wok long hem plante taem, seremaot wan long ol buklet we i stret long teritori ya. Raetemdaon nem blong ol man we yumi livim magasin wetem olgeta, wetem tingting blong statem wan rod magasin. Yumi no mas fraet blong askem man blong mekem sabskripsen. Makemgud se wok blong seremaot ol magasin i wan nambawan rod blong talemaot mesej blong Kingdom long ol man, from we oli save kasem plante man long ol ples farawe. Mekem sua se yumi karem plante magasin taem yumi go prij. Askem man blong karem magasin long evri jans we yu kasem. Wanwan man i save mekem plan blong gat wan Dei blong Seremaot Magasin evri wik. Hemia wan gudfala rod blong seremaot moa magasin. Wok blong seremaot magasin long ol stoa mo long rod i gud tu. Gobak long ol man we oli intres mo yusum ol toktok we i lidim olgeta oli go long wan Baebol stadi long buk ya Save. Mekem wan no tu sot pleplei wetem ol nyufala magasin. Maet yu save yusum sam rod we Kingdom Wok Blong Yumi long Septemba, 1995, pej 3, haf 3 kasem 5, i tokbaot. Ridim haf 6.

Singsing 195 mo laswan prea.