Yumi ’Talemaot Tok Blong God’
1 Stret long ol tok we Baebol i talem long saed blong ’ol las dei,’ bighaf blong ol man tede oli ’folem fasin blong Kristin man,’ be oli stap gyaman nomo. (2 Tim. 3:1, 5) Hemia from we ol lida blong skul oli no lidimgud ol sipsip blong olgeta long saed blong speret. Ol lida blong Krisendom oli no tokbaot Baebol. Oli laekem moa blong talem bakegen mo bakegen ol gyaman tijing blong ol waesman blong wol mo ol man blong hae save long jyos. Mo oli laekem moa blong tokbaot ol problem blong ol man long wol mo politik, i bitim se oli talemaot Tok blong God. Plante lida blong skul oli no bilif long Baebol. Oli ting se Baebol i wan buk blong bifo nomo. Ale, wetem wan tingting we i nogud, oli glad moa blong leftemap ol tijing long saed blong evolusen, i bitim tijing blong Baebol se wan Bigfala Man i wokem olgeta samting. Bighaf blong ol lida blong skul oli no yusum prapa nem blong God tu. Mo oli agri nomo sipos ol man oli wantem karemaot nem ya long ol nyufala Baebol we oli mekem tede.
2 Sem mak long ol lida blong skul long taem blong Jisas, ol lida blong skul tede oli prij blong nating nomo. (Mat. 15:8, 9) Olsem profet Emos i talemaot, ol man oli “hanggri, i no from bred, mo oli tosta, i no from wora, be blong harem ol tok blong Jeova.” (Emos 8:11) Bitim olgeta narafala samting, ol man oli nidim kakae long saed blong speret we i stap long Tok blong God.
3 Olsem Wanem Blong Givim Kakae We Ol Man Oli Nidim Long Saed Blong Speret: Pol i talem long Timote blong holemstrong ’ol Tok blong Baebol, we i save mekem yumi waes mo i save lidim yumi long rod ya we God i stap yusum blong sevem man.’ Taswe, hem i talem strong long Timote se hem i mas ’talemaot Tok blong God’ long ol narafala. (2 Tim. 3:14, 15; 4:2) Yumi, ol Wetnes blong Jeova, yumi mas holemstrong long samting we Baebol i tijim taem yumi stap prij. Olsem nao, yumi stap folem Man we i givim Eksampel long yumi, Jisas, we hem i talem se: “Ol tok ya we mi stap tijim ol man long hem, oli no blong mi nomo, oli kamaot long hemia we i sanem mi.” (Jon 7:16) Yumi yusum Tok blong God olsem stampa blong ol tijing blong yumi, from we yumi luksave se hem i fulap long ol waes blong God, mo yumi wantem se ol man oli save wanem nao i stampa blong ol save we yumi stap serem wetem olgeta.—1 Kor. 2:4-7.
4 Fastaem, ol man oli mas harem trutok blong Baebol. Nao biaen, oli save kasem save long saed blong Jeova, mo bilif long hem. Tok blong Pol i stret taem hem i raetem se: “?Sipos man i no go talemaot nyus blong God, bambae ol man oli save harem nyus ya olsem wanem? ?Mo sipos ol man oli no harem nyus ya, bambae oli save bilif long hem olsem wanem?” (Rom 10:14) Taem yumi talemaot Tok blong God, yumi givhan long ol narafala blong kasem bilif from stret save. Ol save olsem i save jenisim mo i stap jenisim laef blong ol man. Engglisman we i raetem plante buk, Charles Dickens, i raet long saed blong Baebol se: “Hem i moagud bitim olgeta narafala buk we oli bin stap mo we bamabe oli stap long wol ya, from we hem i tijim yu long ol nambawan fasin. I no gat ol narafala fasin we oli moagud blong wan man i folem, sipos hem i stap traehad blong mekem stret fasin mo holemstrong long bilif.”
5 Olgeta we oli hanggri from trutok long saed blong speret, oli luksave se Tok blong God i stampa blong trutok ya. Long 1913, taem Frederick W. Franz i wan yangfala studen long haeskul, hem i kasem wan smol buk, nem blong hem, Where Are the Dead? Hem i intres bigwan taem hem i ridim ansa we Baebol i givim long kwestin ya, nao hem i talem se: “Hemia trutok ya.” Plante milyan man we oli stap lukaot trutok, oli kasem sem tingting ya. Yumi mas gohed blong talemaot Tok blong God strong mo wetem fulhat blong yumi. Olsem nao, yumi save kasem glad tu, taem yumi harem narafala i talem se “Hemia trutok ya.”