Miting Blong Kingdom Wok Blong Janewari
Wik We i Stat Long Janewari 6
Singsing 6
10 menet: Lokol mesej. Jusum sam Advaes long Kingdom Wok Blong Yumi. Tokbaot ripot blong wok blong prij long Oktoba, long ful kantri mo long kongregesen blong yufala.
20 menet: Yusum taem blong yu long waes fasin long hot taem. Sekretari i givim wan tok mo askem sam kwestin long kongregesen. Makem se i impoten blong joen wetem wan kongregesen taem yu go spel long hot taem. Yu save haremgud tumas blong joen wetem wan narafala kongregesen long ol miting mo long wok blong prij. Blong mekem olsem, yu mas mekem wan program bifo we yu go spel, olsem we yu mekem program blong ol narafala samting we yu wantem mekem long hot taem. Mo tu, yu mas reregud blong tekem olgeta jans blong prij. Sipos wan pablisa i spel longwe long kongregesen blong hem blong plante wik, hem i mas mekem plan longtaem lelebet bifo we hem i go spel, blong wan narafala brata no sista i mekem ol Baebol stadi blong hem. Ol pablisa we oli no stap wetem kongregesen blong olgeta long en blong manis, oli mas meksua se oli sanem ripot blong prij blong olgeta i gobak long sekretari blong kongregesen. Pulum tingting blong kongregesen long ol narafala samting we i stret long nid blong olgeta. Lukluk “Ol Samting We Yumi Mas Tingbaot Long Hot Taem” long Kingdom Wok Blong Yumi, Desemba 1995, pej 7.
15 menet: “Nafgud Mo Reregud Blong Tijim Ol Narafala.” (Haf 1-6) Toktok blong smoltaem long haf 1 mo 2. Makem se yumi nidim blong gat strong tingting se, wetem help blong Jeova, yumi naf blong tijimgud ol narafala. Askem tu pablisa wetem tu narafala we tufala i mekem man blong haos, blong mekem ol pleplei long haf 3-6. Oli save soem olsem wanem blong storeyan long fastaem we yumi mitim ol man, mo olsem wanem blong visitim olgeta bakegen.
Singsing 14 mo laswan prea.
Wik We i Stat Long Janewari 13
Singsing 16
13 menet: Lokol mesej. Ripot blong ol kaon. Tokbaot sam poen we yumi save yusum taem yumi seremaot ol nyufala Wajtaoa mo Wekap! Talem sam fastok we yumi save yusum taem yumi tekem jans blong prij. Askem long kongregesen blong talem wanem fastok we oli bin yusum taem oli toktok wetem ol narafala long ol stoa, long rod, long ples blong spel, long ol sevis bas mo taksi, mo long ol narafala ples olsem.
15 menet: “Nafgud Mo Reregud Blong Tijim Ol Narafala.” (Haf 7-9) Tokbaot store blong prij long saed blong ol visit bakegen, we i stap long 1995 Yearbook, pej 45. Makem se i impoten blong gobak long olgeta man we oli soem intres. Askem long wan pablisa we i prij plante, blong mekem ol pleplei long haf 7 mo 8. Nating se fastaem yumi bin livim wan narafala buk wetem man blong haos, biaen yumi mas traehad blong statem wan stadi long Save buk. Pulum evriwan long kongregesen blong makemaot taem long wik we i kam, blong mekem ol visit bakegen.
17 menet: Taem Blong Fulumap Wan Nyufala Kad Blong Hospital. Elda we i nafgud i tokbaot from wanem i impoten blong fulumap kad ya fulwan mo karem i go wetem yu oltaem. Kad ya i save toktok long ples blong yu sipos i gat wan akseden no sik we i mekem se yu no save toktok. (Skelem wetem Proveb 22:3.) Yumi mas fulumap wan nyufala kad evri yia, blong talemaot ol toktok blong yumi bakegen blong soem from wanem yumi no wantem tekem blad. Hemia from we sam dokta mo sam narafala oli bin talem se ol kad we yumi fulumap bitim wan yia bifo, maet oli no talemaot tingting blong yumi naoia. Afta long miting, olgeta pablisa we oli baptaes finis, bambae oli kasem wan Kad blong Hospital. Ol pikinini we oli no baptaes mo we oli smol yet, papa mama blong olgeta bambae oli kasem wan Aedentiti Kad blong olgeta wanwan. Eksplenem se oli mas fulumapgud ol kad ya long haos mo saenem olgeta. Olgeta pablisa we oli baptaes finis, oli mas fulumapgud kad blong olgeta mo saenem. (Ridim bakegen tufala leta blong Desemba 15, 1991 mo Janewari 10, 1996.) Sipos ol pablisa we oli no baptaes yet oli wantem, oli save jenisim toktok insaed long kad ya blong mekem i laenap wetem laef mo bilif blong olgeta wanwan. Oli save raetem prapa pepa blong olgeta mo blong ol pikinini blong olgeta. Sipos yumi yusum waes fasin blong lukaotgud long ol impoten wok ya, bambae Jeova i glad long yumi.—Prov. 16:20.
Singsing 15 mo laswan prea.
Wik We i Stat Long Janewari 20
Singsing 21
10 menet: Lokol mesej.
15 menet: “Olgeta Kaen Man Bambae Oli Kasem Laef.” Kwestin mo ansa. Askem long kongregesen blong talem kwiktaem, sam store we oli soem olsem wanem sam man we oli kamaot long ol defren kaen laef oli laekem trutok.
20 menet: Givim Wetnes Tru Long Gudfala Fasin Blong Yumi. Wan elda i toktok wetem tu no tri yangfala. Oli tokbaot ol store insaed long haf blong Wajtaoa blong Ogis 15, 1987, pej 10 kasem 20 (Engglis no Franis). Tokbaot ol store we oli raetem long ol buk blong Sosaeti mo sam store long ples blong yufala tu, blong soem olsem wanem ol man we oli lukluk yumi oli save laekem trutok from gudfala fasin blong ol yangfala Kristin.
Singsing 23 mo laswan prea.
Wik We i Stat Long Janewari 27
Singsing 20
5 menet: Lokol mesej.
10 menet: Sekretari i tokbaot haf ya Ansa Long Wan Kwestin.
15 menet: “Yumi ‘Talemaot Tok Blong God.’” Kwestin mo ansa. Talem sam tok tu blong soem from wanem yumi gat bigfala tangkyu from ol gudfala samting long Tok blong God.—Lukluk Wekap! (Engglis) blong Maj 22, 1984, pej 9-11, (Jun 22, 1984, pej 10-12 long Franis).
15 menet: Tokbaot Buk We Yumi Seremaot Long Februari. Makem sam gudfala samting long saed blong buk ya, olsem: (1) Nem blong ol japta i pulum intres blong ol man, (2) ol pija we oli gat kala, (3) ol bokis blong tijim man mo ol jat, mo (4) ol kwestin we oli wekemap tingting blong man. Blong joengud wetem lashaf we yumi tokbaot long miting ya, leftemap tingting blong kongregesen blong jusumgud wan vas blong Baebol blong yusum long storeyan blong olgeta. Talem long kongregesen blong no fogetem blong karem sam buk blong yusum long wik we i kam.
Singsing 26 mo laswan prea.