Fulap Man Oli Stap Joen Wetem Yumi
1 Tede, Kristin kongregesen i stap gru bitim mak, olsem long faswan handred yia. (Wok 2:41; 4:4) !Las yia, 366,579 nyufala disaepol oli tekem baptaes, hemia i bitim 1,000 evri dei! Bitim wan milyan oli tekem baptaes long tri yia we i jes pas. Yes, Jeova i stap gohed blong pulum fulap man we oli bilif, blong oli joen wetem yumi.—Wok 5:14.
2 Bigfala namba blong ol man we oli jes tekem baptaes, oli bin folem Kristin laef blong smoltaem nomo. Taswe, oli nidim se olgeta we oli strong long bilif oli givhan long olgeta mo trenem olgeta. (Rom 15:1) Sam long ol faswan Kristin, nating se oli tekem baptaes plante yia finis, oli no “kam bigman long Kraes.” (Hib. 5:12; 6:1) Hemia from wanem, long leta we Pol i raetem long ol Hibru Kristin, hem i makem ol fasin we ol Kristin oli mas gru moa long olgeta long saed blong speret. ?Wanem ol fasin ya? ?Mo olsem wanem yumi save givhan long olgeta olsem oli nidim?
3 Wokem Ol Gudfala Fasin Blong Stadi: Folem advaes we Pol i givim, wan gudfala studen i mas kasem save gud, tingtingbak, mo yusum ol “strong kakae” we ogenaesesen blong Jeova i stap givim. (Hib. 5:13, 14; lukluk tu long Wajtaoa, Ogis 15, 1993, pej 12-17.) Sipos yu storeyan wetem ol man we oli jes kasem bilif, long ol samting long saed blong speret, mo serem wetem olgeta ol nambawan trutok we yu bin faenemaot long prapa stadi blong yu wan, maet yu save pulum olgeta blong wokem ol gudfala fasin blong stadi. Maet sam samtaem yu save singaot wan nyuwan blong joen wetem yu long prapa stadi blong yu wan no long famle stadi.
4 Go Long Ol Miting Oltaem: Gudfala eksampel blong yu mo ol tok blong yu blong soem lav mo leftemap tingting, bambae oli givhan long ol nyufala memba blong kongregesen blong no foldaon long wan narafala samting we Pol i tokbaot—‘kastom’ we samfala oli folem blong mestem plante Kristin miting. (Hib. 10:24, 25) Halpem ol nyuwan blong luksave se ol miting oli olsem wan rop we i joenem olgeta long kongregesen mo we i save sevem laef blong olgeta long saed blong speret. Yu mas mekem ol samting blong givhan long olgeta blong harem se oli welkam long ol miting, olsem we oli haf long bigfala kampani blong ol brata blong yumi.
5 Kam Kolosap Long Jeova Wetem Strong Tingting: Blong winim ol prapa slak fasin mo nogud fasin blong yumi, yumi mas kam kolosap long Jeova long prea. Yumi mas talemaot long hem ol dip tingting mo wari blong yumi, we maet yumi no save talemaot long wan narafala man. Ol nyuwan oli mas kasem save se, taem oli askem long Jeova wetem fulhat blong olgeta blong givhan long olgeta, olsem Pol i talem, oli save gat strong tingting. (Hib. 4:15, 16; 10:22) Sipos yu talemaot long nyuwan ya ol samting we i bin kamaot long laef blong yu wan long saed ya, samting ya i save mekem tingting blong hem i strong se Jeova i stap lesin long ol prea we yumi talem wetem fulhat blong yumi.
6 Makemaot Taem Blong Prij: Pol i soem tu se, sipos oltaem yumi ‘stap givim long God wan sakrifaes blong presem hem,’ samting ya i save mekem yumi kam strong moa long saed blong speret. (Hib. 13:15) ?Yu save singaot wan nyufala pablisa blong joen wetem yu blong prij long wik? Maet yutufala i save kam wanples blong mekemrere ol rod blong storeyan mo rod blong seremaot ol buk, no blong tokbaot wan fasin blong prij we maet nyuwan ya i no bin traem yet.
7 Yumi kasem bigfala glad taem yumi luk we fulap man oli stap joen wetem yumi. Sipos yumi traehad blong trenem mo givim advaes long ol nyufala memba blong kongregesen, samting ya bambae i givhan long olgeta blong wokem strong bilif we oli nidim blong ‘sevem laef blong olgeta.’—Hib. 3:12, 13; 10:39.