Ol Olfala Oli No Kam Slak Blong Prij
1 Plante man we oli stap kam olfala, oli wet nomo blong ritae long wok blong olgeta mo haremgud long ol yia blong laef we oli gat biaen, we oli no nid blong wari long wan samting. Maet oli harem se oli bin wokhad long ful laef blong olgeta mo naoia i stret we oli spel. Maet oli jes wantem haremgud long smoltaem we oli gat yet long laef.—Luk 12:19.
2 Yumi we i givim laef blong yumi i go long Jeova, i gat defren tingting long laef. Yumi save se yumi no ritae long wok blong God. Yumi gat wan gudfala tingting long saed blong laef from we yumi stap tingbaot “laef we i no save finis.” (Jud 21) Save mo ekspiryens we wan man i kasem long laef, i save givim moa fasin luksave long hem. From samting ya, hem i save kam moa waes mo skelem ol samting long fasin we i moagud, mo hem i save soem moa tangkyu from laef. Olgeta fasin ya oli givhan bigwan long wan man blong talemaot gud nyus.
3 Fasin blong kam olfala i no jes long saed blong bodi nomo. Hem i joen wetem tingting blong man tu. Sipos yu wantem stap laef longtaem mo yu traehad blong stap yangfala long tingting blong yu, ating bambae yu save winim tufala samting ya. Ol olfala oli save haremgud moa long laef blong olgeta sipos oli traehad blong kasem moa save long saed blong speret mo serem save ya wetem ol narafala.—1 Kor. 9:23.
4 Ol Trufala Eksampel: Wan sista we i gat 86 yia, i talem se: “Taem mi tingting dip long ol 60 yia we oli bin pas stat long taem we mi lanem trutok, hat blong mi i kam fulap long nambawan promes blong God. Yes, Jeova we i no save lego olgeta we oli stap tru long hem, i stap letem mifala i kasem bigfala glad.” (Sam 18:25) Wan olfala brata i tingtingbak long taem we waef blong hem i ded kwiktaem nomo. Hem i harem nogud tumas, mo biaen helt blong hem i godaon bigwan. Hem i talem se: “Be, from gladhat blong Jeova, tu yia biaen we waef blong mi i ded, mi kasem naf paoa blong stat long wok blong paenia. !Mi mi talem bigfala tangkyu long Jeova from we helt blong mi i kamgud moa, stat long taem ya we mi mekem moa long wok blong prij!”
5 I gud tumas we plante olfala oli gat strong tingting blong gohed blong prij kasem mak we i stret long helt mo paoa blong olgeta. !Oli no kam slak! Oli gat gudfala risen blong talem se: “God, yu yu stap tijim mi, i stat long taem we mi mi yangfala, mo mi stap tokbaot yet ol bigbigfala wok ya blong yu.”—Sam 71:17.