Gohed Blong Stap Glad Naoia We Yu Olfala

1-2. ?Wanem tingting blong Jehova long ol olfala we oli holemstrong long hem? (Ol Sam 92:​12-14; mo tu, yu luk pija.)

OL MAN oli gat defdefren tingting taem oli kam olfala. Samfala oli glad, be sam narafala nogat. Eksampol, sipos oli luk se oli gat wan waet hea, kwiktaem nomo oli pulumaot. Nating se i olsem, oli no save blokem olgeta wan blong oli no kam olfala.

² ?Be Papa blong yumi long heven i gat wanem tingting long ol gudfala man blong hem we oli kam olfala? (Prov. 16:31) Hem i talem se olgeta oli olsem ol naesfala tri. (Ridim Ol Sam 92:​12-14.) ?From wanem hem i talem olsem? Ol tri we oli stap longtaem, oli naes from we oli gat plante lif mo flaoa. Wan long ol tri ya hemia Prunus serrulata we i stap long Japan, mo i gat ol naesfala flaoa. Sam long ol tri ya oli stap bitim wan taosen yia mo oli naes tumas. Long sem fasin, Jehova i luk ol olfala we oli holemstrong long hem blong plante yia, se oli naes tumas. Hemia from we hem i no luk nomo ol waet hea blong olgeta, be hem i luk gudfala samting long hat blong olgeta. Hem i glad tumas long ol olfala we oli stanap strong mo fas gud long hem blong plante yia.

3. Tokbaot wan eksampol we i soemaot se Jehova i stap yusum ol olfala blong mekem samting we hem i wantem i kamtru.

³ Nating se wan man i kam olfala, be hem i sas yet long Jehova.a Mo plante taem, Jehova i yusum ol olfala blong mekem samting we hem i wantem i kamtru. Eksampol, long taem ya we Sera i olfala, Jehova i talem se bambae hem i kam mama blong wan bigfala nesen mo i kam bubu blong Mesaea. (Jen. 17:​15-19) Taem Moses i olfala, Jehova i talem long hem blong lidim ol man Isrel oli aot long Ijip. (Eks. 7:​6, 7) Mo taem aposol Jon i kam olfala, Jehova i yusum hem blong raetem faef buk blong Baebol.

4. Folem Ol Proveb 15:​15, ?wanem i save givhan long ol olfala blong stanap strong taem oli fesem ol trabol? (Mo tu, yu luk pija.)

⁴ Ol olfala oli stap fesem plante trabol. Wan sista i mekem fani, i se: “Taem yu kam olfala, i gat praes blong hem.” Be sipos ol olfala oli stap glad,b hemia bambae i givhan long olgeta blong stanap strong, nating se oli fesem ol trabol. (Ridim Ol Proveb 15:15.) Long stadi ya, bambae yumi tokbaot sam samting we ol olfala oli save mekem blong stap glad. Mo tu, bambae yumi tokbaot samting we ol narafala oli save mekem blong givhan long ol olfala long kongregesen. Be fastaem, bambae yumi tokbaot from wanem samtaem i had blong ol olfala oli stap glad.

SAMTING WE I SAVE MEKEM SE YU NO MOA GLAD

5. ?Wanem i save mekem se sam olfala oli harem nogud?

⁵ ?Wanem i save mekem se yu harem nogud? Maet hemia from we yu no moa save mekem ol samting olsem bifo. Maet yu stap tingbaot taem ya we yu yangfala mo yu gat paoa. (Pri. 7:10) Eksampol, wan sista we nem blong hem Ruby i talem se: “Samtaem i had blong werem klos blong mi, from we bodi blong mi i stap so. Samtaem i had blong mi mekem wan isi samting nomo olsem blong werem stokin blong mi. Ol han blong mi oli nam mo ol joen blong mi oli soa, mekem se i had blong mi mekem ol smol samting nomo.” Mo Harold, we i bin wok long Betel, i talem se: “Samtaem mi kam kros from mi no save mekem ol samting we mi stap mekem bifo. Bifo, mi wan yangfala we i strong mo mi laekem tumas blong plei besbol. Ol narafala oli stap talem se: ‘Sakem balong i go long Harold, from we hem i neva mestem poen.’ Be naoia, mi no ting se mi save sakem balong.”

6. (1) ?Wanem sam narafala samting we i save mekem se sam olfala oli harem nogud? (2) ?Wanem i save halpem ol olfala blong skelem sipos oli save gohed blong draev o nogat? (Yu luk atikol ya “?Mi Mas Stop Blong Draev?” we i stap long magasin ya.)

⁶ Maet yu harem nogud from we yu no moa save mekem samting yu wan, speseli sipos narafala i mas lukaot long yu o sipos yu mas muv i go stap wetem wan pikinini blong yu. O maet yu harem nogud from yu gat problem blong helt o yu no moa save lukluk klia, nao yu no moa save go aot yu wan o draevem wan trak. !I tru, hemia i save mekem yu harem nogud! Be i gud yu tingbaot se yu sas yet long ae blong Jehova mo ol narafala. Yumi sua se Jehova i kasemsave long ol filing blong yumi. Hem i save se yumi lavem hem mo ol brata mo sista, mo hemia nao samting we i mekem se yumi sas long ae blong hem.—1 Saml. 16:7.

7. ?Wanem i save halpem olgeta we oli harem nogud from we oli ting se oli no save laef kasem we en i kam?

⁷ Maet yu harem nogud from yu ting se yu no save laef kasem we en i kam. Sipos i olsem, ?wanem i save givhan long yu? I gud yu tingbaot se Jehova i gat gudfala risen blong no spolem rabis wol ya kwiktaem. (Aes. 30:18) ?From wanem hem i gat longfala tingting olsem? Hemia from we hem i wantem we plante milian man oli gat janis blong save hem mo wosipim hem. (2 Pita 3:9) Taswe taem yu harem nogud, i gud blong tingbaot se from we Jehova i gat longfala tingting, plante moa man oli save gat janis blong save hem bifo we en i kam. Maet sam long olgeta oli ol memba blong famle blong yu.

8. Taem ol olfala oli sik, ?oli save mekem wanem?

⁸ Nating se yumi yangfala o olfala, be taem yumi sik, samtaem yumi save talem sam samting we biaen yumi rigret from. (Pri. 7:7; Jem. 3:2) Eksampol, taem gudfala man ya Job i safa, ol tok blong hem oli “olbaot nomo.” (Job 6:​1-3) Antap long hemia, maet sam olfala oli kasem wan kaen sik o tekem wan meresin we i save jenisim tingting o fasin blong olgeta, nao oli talem o mekem sam samting we i narakaen. Be nating se yumi sik o olfala, yumi no mas yusum hemia olsem wan eskius blong no kaen long narafala o askem tumas samting long olgeta. Mo sipos yumi luksave se yumi talem wan samting we i spolem narafala, yumi mas kwik blong talem sore.—Mat. 5:​23, 24.

SAMTING WE YU SAVE MEKEM BLONG STAP GLAD

9. ?From wanem yu mas letem ol narafala oli halpem yu? (Mo tu, yu luk ol pija.)

⁹ Letem ol narafala oli halpem yu. (Gal. 6:2) Fastaem, maet bambae yu harem se i had. Wan sista we nem blong hem Gretl i talem se: “Samtaem mi harem se i had blong letem narafala i halpem mi, from we mi harem olsem se mi stap mekem baden long olgeta. I tekem taem blong mi jenisim tingting blong mi mo gat tingting daon blong talem se mi nidim help.” Taem yu letem ol narafala oli halpem yu, yu stap mekem olgeta oli glad. (Wok 20:35) Mo hemia bambae i mekem yu sua se ol narafala oli lavem yu mo oli kea long yu.

10. ?From wanem yumi mas tingbaot blong talem tangkiu? (Mo tu, yu luk pija.)

¹⁰ Talem tangkiu. (Kol. 3:15; 1 Tes. 5:18) Taem ol narafala oli mekem ol gudfala samting long yumi, yumi glad from, be maet yumi foget blong talem tangkiu. Be sipos yumi smael mo yumi talem tangkiu, yumi mekem olgeta oli haremsave se yumi glad long samting we oli mekem blong yumi. Leah, we i stap lukaot long ol olfala long Betel, i talem se: “Wan sista we mi stap lukaot long hem, oltaem hem i raetem ol smol kad blong talem tangkiu. Hem i raetem ol sot toktok nomo, be ol toktok ya oli kaen tumas. Mi laekem tumas blong ridim ol smol kad ya, from we oli mekem mi glad mo mi luksave se hem i glad long ol samting we mi mekem blong givhan long hem.”

11. ?Yu save mekem wanem blong halpem ol narafala? (Mo tu, yu luk pija.)

¹¹ Traehad blong halpem ol narafala. Taem yu yusum taem mo paoa blong yu blong halpem ol narafala, bambae yu no tingbaot tumas ol problem blong yu. Wan waestok blong Afrika i tokbaot ol olfala se oli olsem ol buk we oli fulap long waes we oli stap long wan laebri. Be sipos ol buk ya oli stap nomo long laebri, bambae oli no save talem stori o tijim man. Long sem fasin, sipos yufala ol olfala, yufala i no tokbaot ol ekspiriens mo save blong yufala, bambae ol yangfala oli no save lanem samting long yufala. Taswe, blong save gud ol yangfala, yufala i save askem kwestin long olgeta mo lesin gud long olgeta. Biaen, yufala i save tokbaot olsem wanem Jehova i halpem yufala, blong soemaot se taem yumi folem ol loa blong Jehova, oltaem hemia i mekem i gud long yumi mo yumi glad. I sua se sipos yu leftemap tingting blong ol yangfala mo yu mekem bilif blong olgeta i strong, bambae yu glad.—Sam 71:18.

12. Folem Aesea 46:​4, ?Jehova i promes blong mekem wanem long ol olfala? (Mo tu, yu luk pija.)

¹² Prea blong Jehova i givim paoa long yu. Nating se bodi blong yu i no moa strong o yu kam taed, i gud blong tingbaot se Jehova i “neva kam taed mo i neva kam slak.” (Aes. 40:28) ?Olsem wanem Jehova i yusum bigfala paoa blong hem? Wan rod, hemia blong givim paoa long ol olfala. (Aes. 40:​29-31) Hem i promes blong halpem olgeta. (Ridim Aesea 46:4.) Mo oltaem Jehova i holem ol promes blong hem. (Jos. 23:14; Aes. 55:​10, 11) Taem yu prea mo yu luksave se Jehova i lavem yu mo i stap sapotem yu, hemia bambae i mekem se yu glad.

13. Folem 2 Korin 4:​16-18, ?yumi mas tingbaot wanem? (Mo tu, yu luk pija.)

¹³ Tingbaot se ol problem we yu stap fesem oli blong smoltaem nomo. Sipos yu tingbaot samting ya, bambae i moa isi blong yu stanap strong. Mo Baebol i talem se i no longtaem, ol man bambae oli no moa kam olfala mo sik. (Job 33:25; Aes. 33:24) Taswe yu save glad sipos yu tingbaot se ol beswan dei long laef blong yu oli stap yet long fiuja, be i no ol dei we i pas finis. (Ridim 2 Korin 4:​16-18.) ?Be ol narafala oli save mekem wanem blong givhan?

SAMTING WE OL NARAFALA OLI SAVE MEKEM BLONG GIVHAN

14. ?From wanem i impoten blong visitim ol olfala mo ring long olgeta?

¹⁴ Visitim mo ring long ol olfala brata mo sista oltaem. (Hib. 13:16) Ol olfala oli save harem se oli stap olgeta wan. Wan brata we nem blong hem Camille i talem se: “Mi stap nomo insaed long haos fuldei. Taswe mi harem se mi les, mi no gat samting blong mekem. Samtaem mi harem se mi olsem wan olfala laeon we i stap insaed long wan kej. Mi wari mo mi kam kros.” Taem yumi visitim ol olfala, yumi mekem oli haremsave se yumi tinghae long olgeta mo lavem olgeta. Samtaem, yumi wantem visitim o ring long wan olfala long kongregesen, be biaen yumi no mekem from we laef blong yumi i bisi tumas. Taswe, ?olsem wanem blong mekem “ol samting we oli moa impoten,” we i minim tu blong visitim ol olfala? (Fil. 1:10) Yumi save putum wan not long kalenda blong yumi, olsem nao bambae yumi no foget blong ring long ol olfala long kongregesen o sanem wan teks mesej long olgeta. Mo tu, yumi save jusum wan stret dei blong go visitim olgeta, mo putum long program blong yumi.

15. ?Ol yangfala mo ol olfala oli save mekem wanem tugeta?

¹⁵ Sipos yu wan yangfala, maet yu no save wanem blong tokbaot o mekem wetem ol olfala. Be yu no mas wari tumas long saed ya. Samting we i moa impoten, hemia blong kam wan gudfala fren blong olgeta. (Prov. 17:17) Taswe i gud yu tekem taem blong storian wetem ol olfala bifo mo afta long miting. Maet yu save askem olgeta blong tokbaot ol vas we oli laekem tumas o wan fani samting we oli mekem taem oli pikinini. Mo tu, yu save singaot olgeta blong kam wajem JW Brodkasting wetem yu. Maet yu save mekem sam narafala samting tu blong givhan long olgeta. Eksampol, yu save givhan long olgeta blong apdetem fon blong olgeta o daonlodem ol niufala samting we i kamaot long JW Library.^® Wan sista we nem blong hem Carol i talem se: “I gud blong singaot ol olfala blong oli joenem yu blong mekem samting we yu laekem. Nating se mi mi olfala, mi wantem harem gud yet long laef. Mi laekem blong soping, go kakae wetem ol fren, mo go long ol ples aotsaed long taon blong lukluk kriesen.” Mo wan sista we nem blong hem Maira i talem se: “Wan long ol fren blong mi i gat 90 yia. Hem i gat 57 yia moa long mi. Be mi no tingbaot samting ya from we plante taem mitufala i laflaf tugeta mo wajem muvi tugeta. Mo taem mitufala i fesem ol problem, oltaem mitufala i givgivhan long mitufala.”

16. ?From wanem i gud blong folem ol olfala i go long hospital?

¹⁶ Folem olgeta taem oli go long hospital. Samtaem i no naf nomo we yu tekem ol olfala i go long hospital. Maet i gud we yu stap wetem olgeta blong meksua se dokta i jekem gud olgeta mo i givim stret samting we oli nidim. (Aes. 1:17) Yu save givhan long olgeta tu taem yu raetemdaon ol samting we dokta i talem. Wan olfala sista we nem blong hem Ruth i talem se: “Taem mi go mi wan blong luk dokta, plante taem hem i no tinghevi long samting we mi talem. Maet dokta i talem nomo se: ‘Yu no sik, hemia tingting blong yu nomo ya.’ Be taem wan narafala i folem mi, dokta i tekem taem blong jekem gud mi. Mi talem tangkiu long ol brata mo sista we oli tekem taem blong folem mi.”

17. ?Yumi save mekem wanem blong prij wetem ol olfala?

¹⁷ Prij wetem olgeta. Maet sam olfala oli no moa naf blong prij long ol haos wanwan. Taswe, ?yu tingbaot wan olfala sista we yu save askem hem blong prij wetem yu long troli? Maet yu save karem wan jea, blong hem i save sidaon klosap long troli. ?O yu tingbaot wan olfala brata we i save joenem yu long wan Baebol stadi, o yu tekem Baebol stadi blong yu i go long haos blong hem? Maet sam olfala oli harem se i isi moa blong joen long grup blong prij sipos i stap long haos blong olgeta. Taswe i gud ol elda oli tingbaot samting ya. Jehova i glad tumas taem yumi mekem eni samting blong soemaot se yumi lavem ol olfala mo yumi respektem olgeta.—Prov. 3:27; Rom 12:10.

18. ?Bambae yumi tokbaot wanem long nekis stadi?

¹⁸ Long stadi ya, yumi bin lanem se Jehova i lavem ol olfala brata mo sista mo i tinghae long olgeta. !Mo hemia sem filing we yumi evriwan long kongregesen tu i gat! I tru se taem yu kam olfala, i no isi. Be wetem help blong Jehova, yu save gohed blong stap glad. (Sam 37:25) I gud tumas blong save se ol beswan dei long laef blong yu oli stap yet long fiuja, be i no ol dei we i pas finis. ?Be olsem wanem long ol brata mo sista we oli stap lukaot long wan famle blong olgeta we i olfala, o wan pikinini o wan fren we i sik? ?Oli save mekem wanem blong oli gohed blong stap glad? Bambae yumi tokbaot ansa blong ol kwestin ya long nekis stadi.