!Tokbaot Jeova Evri Dei!
1 Ol man oli glad blong tokbaot ol samting we oli laekem tumas long hat blong olgeta. Oli stap talemaot ol samting we hat blong olgeta i fulap long hem. (Luk 6:45b) ?Wanem samting we yumi laekem tumas long hat blong yumi? Man blong raetem Sam i talem se: “Bambae mi mi talemaot stret fasin blong yu, mo bambae mi stap presem yu evri dei nomo.” (Sam 35:28) Hem i gat bigfala tangkyu long Jeova, mo hem i glad tumas blong tokbaot God mo presem Hem oltaem. Man blong raetem Sam ya i savegud Jeova, taswe hem i save plante gudgudfala samting blong presem Hem from. (Sam 35:9) ?Olsem wanem yumi save folem gudfala eksampel blong hem?
2 Tokbaot Jeova Long Haos: Evri dei, ol famle oli mas toktok tugeta long saed blong Jeova. Bambae i isi nomo long ol papa mama we oli laekem Jeova tumas, blong tokbaot hem long olgeta samting we oli mekem. (Dut. 6:5-7) Taem oli mekem olsem, ol pikinini oli luk se papa mama blong olgeta oli joenem bilif blong olgeta wetem laef blong olgeta, mo se oli laekem loa blong God tumas. Nao ol pikinini ya bambae oli tingbaot famle stadi blong Baebol olsem wan fasin blong papa mama blong olgeta blong soem trufala ona long God.—2 Pita 3:11.
3 Tokbaot Jeova Wetem Ol Kristin Brata: Long ol tiokratik wok we yumi mekem evri wik, yumi gat fulap jans blong tekem kakae long saed blong speret i go long tingting mo hat blong yumi. Yumi neva sot long ol gudfala samting blong tokbaot. (Luk 6:45a) ?Yu bin lanem wan poen we yu laekem tumas long prapa stadi blong yu no long Baebol riding we yu mekem evri wik? Ale, tokbaot poen ya wetem ol Kristin brata blong yu. Long rod ya, bambae yu givhan long olgeta blong laekem Jeova moa.—Sam 35:18; Hib. 10:24.
4 Tokbaot Jeova Long Ol Narafala: Long olgeta samting we yumi mekem evri dei—long wok, long skul, mo taem yumi stap wetem ol famle blong yumi we oli no bilif—ol man oli mas luksave se bigfala samting long laef blong yumi i blong givim wetnes long saed blong Jeova. Ol toktok blong yumi i mas leftemap God, yumi no mas yusum ol tok swea no tok nogud olsem ol man blong wol. Evri dei, yumi mas tekem jans blong tokbaot gud nyus we God i givim long yumi blong talemaot long ol man.—Wok 5:42; Kol. 4:6.
5 Yumi, ol man blong wosip long Jeova long trufala fasin, yumi mas lukaot rod evri dei blong tokbaot nambawan God blong yumi, Jeova.—Sam 106:47.