Presem Jeova Evri Dei
1. ?Ol man blong wok blong God oli gat strong tingting blong mekem wanem, mo from wanem?
1 King Deved i talemaot strong tingting we hem i gat blong presem Jeova “evri dei,” gogo i no save finis. (Sam 145:2, 7, 21) Yumi tu yumi gat gudfala risen blong presem Jeova evri dei.—Sam 37:10; 145:14, 18; 2 Pita 3:13.
2. ?Olsem wanem famle i save presem Jeova evri dei?
2 Long Haos Blong Yumi: Yumi gat ol buk blong bildimap bilif blong yumi we oli save halpem yumi blong gat ol gudfala samting blong tokbaot, taem yumi ridim vas blong dei evri dei, taem yumi haremgud long Baebol Stadi blong Famle, mo taem yumi rerem ol miting blong kongregesen. Plante famle oli gat fasin ya blong joen tugeta blong kakae wanples, maet wan taem nomo evri dei no maet moa. Ale, samting ya i givim taem long olgeta blong storian tugeta we oli no hareap, mo i givim janis long olgeta blong tokbaot Jeova mo presem hem. Ol storian olsem we ol papa mama oli mekem evri dei wetem ol pikinini blong olgeta, oli wan impoten rod blong ‘stretem ol pikinini mo trenem tingting blong olgeta olsem we Jeova i wantem.’—Efes. 6:4, NW; Dut. 6:5-7.
3. ?Wanem janis we yumi gat blong presem Jeova taem yumi joen wetem ol brata sista blong yumi?
3 Wetem Ol Brata Blong Yumi: Taem yumi stap long wok blong prij mo long miting blong kongregesen, yumi gat ol nambawan janis blong presem Jeova wetem ol Kristin brata sista blong yumi. (Prov. 15:30; Fil. 4:8; Hib. 13:15) From we yumi evriwan i lavem Jeova, i isi long yumi blong tokbaot ol gudfala fasin blong Jeova we yumi laekem, taem yumi storian tugeta.—Sam 106:1.
4. ?Wanem narafala rod blong presem Jeova?
4 Taem Yumi Toktok Wetem Ol Man We Oli No Witnes: Nating se i gat sam samting long laef we i blokem yumi blong joen long wok blong prij evri dei, be yet, yumi save tokbaot Jeova mo stamba tingting blong hem long ol man we oli wok wetem yumi, oli skul wetem yumi, mo ol narafala we oli laef raonabaot long yumi. Olsem nao, ol save ya oli givim hop long man we, long hat blong hem, hem i rili wantem save trutok. (Sam 27:14; 1 Pita 3:15) Wan sista i gat janis blong toktok long wan woman we i stap long plen wetem hem. Ol save we woman ya i harem oli leftemap tingting blong hem mo oli mekem hem i haremgud tumas. From samting ya hem i givim adres mo telefon namba blong hem long sista ya, blong bambae tufala i save gohed moa long storian blong tufala. From we wol ya i stap kam fulap moa long ol trabol mo i stap kam nogud moa, ol man blong Jeova oli gohed blong talemaot “gud nius” blong wan gudfala samting long ol man we oli glad blong lesin. Gud nius ya i givim hop long ol narafala mo i pulum olgeta blong presem Jeova.—Aes. 52:7; Rom 15:11.
5. ?From wanem yumi wantem tumas blong presem Jeova, mo samting ya i save karem wanem frut?
5 !Jeova i mas harem gud tumas blong luk ol man blong hem oli presem Hem evri dei! Ol samting we Jeova i wokem we oli stap raonabaot long yumi oli presem Jeova evri dei. I gud yumi mekem sem mak, yumi presem Jeova evri dei long haos blong yumi, long kongregesen, mo taem yumi storian wetem ol narafala we oli no kam ol man blong presem Jeova yet.—Sam 19:1-4.