?Yu Yu Jajem Man Long Samting We Yu Luk Nomo?

¹ Long wok blong prij blong yumi, faswan samting we yumi luk long man, samtaem i save mekem se yumi fraet blong serem gud nius wetem olgeta. Eksampel, maet yu stap mekem visit long wan man we i soem intres long trutok, be taem yu kam visitim hem, wan narafala man klosap long haos blong hem i stap lukluk yu oltaem wetem strong fes. ?Wanem tingting blong yu nao? Hemia wanem we i hapen long wan paenia sista. Ale, hem i mekem disisen blong go luk man ya we i stap klosap long visit blong hem, blong storeyan wetem hem. Man ya i talem halo long fasin we i strong. Be, sista ya i sapraes tumas from we man ya i lesin long mesej blong Baebol mo i agri blong stadi. Yes, gudfala frut i kamaot from we sista ya i no jajem man long samting we hem i luk nomo. Nao hem i givim jans long man ya mo waef blong hem blong lanem trutok.

² Wan narafala sista i fraet fastaem, long wan yangfala man we i gat longfala hea. Be, hem i gohed blong prij long man ya evri taem we hem i kam long stoa we sista ya i wok long hem. Ol traehad blong sista ya oli karem gudfala frut from we yangfala man ya i tekem baptaes. ?Wanem i save blokem yumi blong talem kwiktaem se, ‘Man ya bambae i no wantem lesin long mesej blong mi’?

³ Folem Eksampel Blong Jisas: Jisas i save se hem i mas givim laef blong hem blong sevem olgeta man. Taswe, hem i no letem ol samting we ae nomo i luk i blokem hem. Hem i luksave se sam long olgeta we oli gat ol rabis fasin, maet oli rere blong jenisim laef blong olgeta sipos narafala man i halpem olgeta mo leftemap tingting blong olgeta blong mekem gudfala fasin. (Mat. 9:9-13) Taswe Jisas i traem halpem ol rij man mo ol pua man long sem fasin. (Mat. 11:5; Mak 10:17-22) I nogud blong jajem man we yumi mitim long wok blong prij, jes from samting we yumi luk nomo. Fasin ya i save satem ae blong yumi nao yumi no givhan long wan man we maet i gat gudfala hat. (Mat. 7:1; Jon 7:24) ?Wanem i save halpem yumi blong folem gudfala eksampel blong Kraes?

⁴ Taem yumi stadi Baebol, yumi luksave se Tok blong God i gat paoa blong jenisim tingting, fasin, mo laef blong man. ( Eph. 2:22–24; Hib. 4:12) From samting ya, wetem fasin waes yumi mas prij long olgeta man, mo letem Jeova i lidim wok ya from we hem nomo i save ridim hat blong ol man.​—1 Sam. 16:7; Wok 10:34, 35.

⁵ I gud yumi talemaot gud nius long enikaen man, mo yumi no wari long samting we ae blong yumi i luk, ale bambae yumi karem plante gudfala frut long wok blong yumi long ol lasdei ya.​—1 Tim. 2:3, 4.