Miting Blong Kingdom Wok Blong Ogis

Wik We i Stat Long Ogis 2

Singsing 39

10 menet: Lokol mesej. Ol Advaes blong Kingdom Wok we oli stret long kongregesen. Tokbaot ripot blong prij blong Epril long ol trifala kantri long teritori blong yumi mo long kongregesen blong yumi. Pulum ol pablisa blong joen long wok blong prij long manis Ogis.

17 menet: “Tinghae Long Nem Blong Jeova We i Naes Tumas.” Mekem sotfala fastok we i no bitim wan menet, mo gohed wetem kwestin mo ansa. Eksplenemgud ol vas blong Baebol.​—Lukluk buk Laef Foreva, long ol pej 184-5.

18 menet: “Edukesen Long Skul Mo Ol Wok Long Saed Blong Spirit.” Wan papa i toktok wetem pikinini blong hem. Tufala i save yusum ol tok blong Wekap! blong Desemba 22, 1995, (Engglis mo Franis) long ol pej 7-​11.

Singsing 148 mo laswan prea.

Wik We i Stat Long Ogis 9

Singsing 138

10 menet: Lokol mesej. Ripot blong ol kaon.

20 menet: “?Bambae Yu Talem Wanem Long Wan Budis?” Wetem kwestin mo ansa. Maet ol pablisa oli no save wanem blong talem taem oli mitim wan man Jaena, Taewan, Japan, mo ol man blong ol narafala kantri olsem, from we ol man ya oli no Kristin mo fasin mo bilif blong skul blong olgeta i narakaen long tingting blong yumi. Nating we yumi no faenem plante man olsem, be yumi rere blong givhan long olgeta. Mekem wan pleplei we yufala i rere gud fastaem. Blong kasem moa save long saed blong skul blong ol Budis, lukluk long Febuwari 1998 Kingdom Wok Blong Yumi, long ol pej insaed; lukluk tu long Reasoning buk, pej 21; mo long Mankind’s Search for God, japta 6.

15 menet: Ol Paenia Oli Givhan​—?Wanem Risal Blong Wok Ya? Elda we i lukaot long wok blong prij i mekem tok ya. Lukluk bakegen ol rul we Sosaeti i givim long Kingdom Wok Blong Yumi blong Septemba 1998, pej 4. Talem ol samting we ol elda oli mekem long kongregesen blong folem ol rul ya. Talem olsem wanem ol paenia oli givhan. Askem kwestin long wan no tu paenia, sipos i gat long kongregesen, mo sam long ol pablisa we ol paenia oli bin halpem. Talem long olgeta we bambae ol paenia oli givhan long olgeta, se oli mas joen fulwan long wok ya we i blong trenem olgeta.

Singsing 202 mo laswan prea.

Wik We i Stat Long Ogis 16

Singsing 131

10 menet: Lokol mesej. I gat tu wiken nomo i stap go kasem en blong manis Ogis. Leftemap tingting blong evriwan blong joen long wok blong prij bifo we manis i finis. Tokbaot “Program blong Niufala Spesel Dei Asembli.”

15 menet: Lokol nid.

20 menet: ?Yu Stap Mekem Disaepol? Toktok wetem ol brata sista. Yumi givimaot plante buk mo magasin long ol man. Be yumi wantem go moa, mo statem wan Baebol stadi wetem olgeta. Olsemia nao oli save kasem frut from ol buk we oli tekem. Sam pablisa oli save talemaot tingting blong olgeta long ol problem we i blokem olgeta blong oli no statem sam moa stadi: Hemia nao sam problem olsem: (1) I hadwok blong faenem man we i wantem stadi long Baebol. (2) Sam man we oli intres long trutok, oli talem se oli bisi tumas, oli no gat taem blong stadi. (3) Afta we yumi statem stadi wetem wan man, hem i mestem stadi oltaem, mekem se stadi i no save gohed evri wik. Mo tu, yu save tokbaot ol filing blong samfala pablisa long saed blong ol Baebol stadi: (1) ‘Mi harem se mi no naf blong tij.’ (2) ‘Mi no gat taem blong lidim wan Baebol stadi evri wik.’ (3) ‘Mi no wantem fosem ol man blong mekem stadi.’ (4) ‘Mi glad nomo blong mekem ol narafala haf long wok blong prij, hemia i naf long mi.’ Givim sam positif tingting olsem wanem blong winim ol kaen tingting olsem. Nao evriwan i save joen long wok blong mekem disaepol. Sam paenia we oli gat gudhan oli save talemaot glad blong olgeta taem oli lidim ol Baebol stadi.​—Lukluk Kingdom Wok Blong Yumi blong Epril 1998, long ol pej insaed, haf 3-8, 15.

Singsing 100 mo laswan prea.

Wik We i Stat Long Ogis 23

Singsing 94

8 menet: Lokol mesej. Tiokratik Nius.

25 menet: “?Doa Blong Kam Fultaem Paenia i Open Finis Long Yu?” Wan elda i mekem tok ya wetem kwestin mo ansa. Wetem positif tingting, soemaot ol rod we sam moa pablisa oli save folem blong kam paenia. Askem kwestin long sam paenia we oli talemaot stori blong olgeta, ol trabol we oli winim blong kam paenia. Yusumgud “Ol Program Blong Fultaem Paenia.” Soemaot we sipos yumi mekem gudfala plan fastaem, i isi blong kasem ol aoa blong paenia. Talem se olgeta we oli wantem, oli save askem wan pepa blong fultaem paenia afta miting ya.

12 menet: Halpem Ol Niuwan Blong Oli Save Se Mared i Tabu. Wan elda we i gat ekspiryens long saed ya, i yusum Reasoning buk pej 248-​50 (Franis pej 224-5) blong toktok wetem ol brata sista. Yumi mitim sam hasban mo waef we oli laekem mesej blong Kingdom, be tufala i slou blong gohed gud long trutok, from we tufala i stap tugeta we tufala i no mared. Talem olsem wanem blong soemaot long tufala from wanem ol Kristin oli stap tinghae long mared. (Lukluk Wekap! blong Janewari 8, 1992, long Engglis no Franis.) Givim sam advaes long samting we yumi save talem long man mo woman olsem, blong halpem tufala. Wetem kaen fasin, yumi mas soemaot long man mo woman se tufala i no save kam brata mo sista long kongregesen, go kasem we tufala i rejistarem mared blong tufala long gavman.

Singsing 133 mo laswan prea.

Wik We i Stat Long Ogis 30

Singsing 99

10 menet: Lokol mesej. Talem long evriwan se oli mas putum ripot blong olgeta long manis Ogis. Ol brata we oli lukaot long ol buk stadi oli mas meksua se evriwan long buk stadi i putum ripot blong hem. Long fasin ya, i isi blong finisim ol ripot long Septemba 6.

17 menet: Yumi Laekem Tumas Ol Brata Blong Yumi. Wan elda i mekem tok ya. Hem i askem kwestin long kongregesen we i stanap long Wajtaoa blong Desemba 1, 1995, pej 15-​17, ol haf 7-​11. Soemaot ol frut we yumi evriwan i kasem taem yumi savegud ol brata blong yumi, taem yumi enkarajem olgeta, mo givhan long olgeta blong oli stanap strong long trabol taem. Soemaot olsem wanem yumi save mekem moa long saed ya. Askem ol brata sista blong talemaot sam ekspiryens blong olgeta, olsem wanem sam tok we narafala brata sista i talem long olgeta i leftemap tingting blong olgeta mo i givim paoa long olgeta.

18 menet: Givim Risen Blong Hop Blong Yu. Wan elda i askem sam kwestin long wan no tu yangfala we oli gat klin fasin, mo we oli stap go long skul yet. Oltaem nomo oli save gat sam traem from we ol fren blong wol oli wantem save from wanem oli no wantem joen wetem olgeta long sam wok no pleplei blong olgeta. Ol yangfala oli save yusum jans ya blong talemaot bilif blong olgeta, mo oli mas stanap strong tu blong no joen long ol fasin blong wol ya. Talemaot olsem wanem wan yangfala i save ansa taem wan fren i wantem givim sigaret, no drag, no sam rabis buk long hem. Talemaot wanem i stap long buk ya Young People Ask, pej 277-​81. Soemaot we sipos olgeta oli no fraet blong talemaot tingting blong olgeta blong mekem i gud oltaem, bambae samting ya i protektem olgeta mo i givim wan gud witnes long ol narafala.

Singsing 129 mo laswan prea.