Miting Blong Kingdom Wok Blong Novemba
Wik We i Stat Long Novemba 1
Singsing 156
10 menet: Lokol mesej. Ol Advaes blong Kingdom Wok we oli stret long Kongregesen.
15 menet: “!Ol Profet Tok Blong God Bambae i Mas Kamtru!” Mekem sotfala fastok we i no bitim wan menet, mo gohed wetem kwestin mo ansa. Soemaot sam poen long niufala buk we oli soemaot olsem wanem taem blong yumi i impoten tumas.
20 menet: “?Hu i Save Stadi Long Baebol?” Givim wan tok mo mekem sam pleplei. Folem paragraf 4, givim sam advaes we yumi save yusum blong pulum intres blong ol man blong oli lanem samting we i stap insaed long ol buk blong yumi. Mekem tu sot pleplei blong soemaot samting ya. Askem ol brata sista blong talem olsem wanem oli mekem blong statem ol Baebol stadi.
Singsing 198 mo laswan prea.
Wik We i Stat Long Novemba 8
Singsing 204
5 menet: Lokol mesej. Talemaot nekis haf blong program we bambae i tokbaot leta blong OLGETA KONGREGESEN, blong Oktoba 15, 1999.
30 menet: Presiden elda i givim wan sotfala tok long ol stamba poen blong faswan paragraf long leta blong OLGETA KONGREGESEN, we i kamaot long Oktoba 15, 1999. Biaen brata we i wok olsem sekretari long kongregesen, i askem wanwan long ol kwestin long presiden elda. Presiden elda i mas ridim ol wanwan ansa stret olsem i stap long leta. Brata we i wok olsem Sekretari blong Kongregesen, i givim wan sot tok we i no bitim tu menet, long haf ya we i talem se, “?Yumi Mas Gat Wanem Tingting Taem i Gat Sam Jenis i Kamaot?” Talemaot nekis haf, we bambae i soemaot olsem wanem blong seremaot ol buk long wok blong prij.
10 menet: Elda we i lukaot wok blong prij bambae i mekem haf ya. Hem i mas ridim mo stadi long leta blong OLGETA KONGREGESEN, blong Oktoba 15, 1999. Ol pablisa no ol paenia we oli gat ekspiryens oli mas mekemrere gud ol pleplei.
(2 menet) Brata we i lukaot long wok blong prij i makemaot klia se long taem we i kam bambae i impoten tumas blong reregud mo lanem ol defren rod blong seremaot ol buk mo ol magasin. Brata i soem tu, olsem wanem yumi save askem long olgeta we oli intres, sipos oli wantem givim wan presen blong sapotem wok blong ol Witnes blong Jeova raon long wol. Leftemap tingting blong ol brata sista blong kongregesen blong lesingud long ol trifala pleplei we oli kamaot biaen, mo tekem not long olgeta.
(2 menet) Wan pablisa no wan paenia i serem Save buk long man blong haos, we i bin soem intres long Baebol. Maet pablisa i save talem se: “Ol Witnes blong Jeova oli wok fri nomo, mo oli wantem talemaot gud nius long olgeta man we oli laekem God. Ol Witnes blong Jeova mo sam narafala man oli luksave se wok blong tijim Baebol i impoten tumas. Taswe oli mekem ol presen mane blong sapotem wok ya, mo mekem se mifala i save givim buk ya long man, we mifala i no putum praes long hem. Buk ya i save givhan long man we i rili wantem lanem ol samting we God i wantem blong yumi mekem.” Man blong haos i save askem se: “?Yu yu minim se mi save kasem buk ya?” Pablisa i ansa se: “Yes, yu yu save kasem, sipos yu intres long mesej blong Baebol we i stap insaed. Mo bambae mi glad blong kambak bakegen mo storeyan wetem yu long sam save we i stap insaed long buk ya. Sipos yu wantem mekem wan smol presen blong givhan long wok ya blong tijim Baebol long ol man, yu save mekem. Bambae mifala i glad long presen blong yu mo bambae mifala i yusum presen ya blong mekem se wok blong talemaot gud nius blong Kingdom i gohed gud.” Man blong haos i mekem wan presen, mo pablisa ya no paenia i askem blong putum mane ya long wan envlop, we i save go stret long wok long olgeta ples blong wol.
(2 menet) Yusum semfala pleplei, soemaot olsem wanem pablisa bambae i seremaot Save buk, putum buk ya long han blong man blong haos, mo biaen askem sipos hem i wantem mekem wan presen blong givhan long wok blong olgeta ples blong wol. Long taem ya, man blong haos i talem se, “Mi no ting se mi wantem ridim buk ya.” Pablisa i tekembak buk long man blong haos, mo i se: “Bambae mi givim buk ya long wan narafala man we i glad blong tekem. Be fastaem, maet bambae yu intres blong ridim traket ya.”
(2 menet) Wan pablisa no wan paenia i soemaot olsem wanem blong seremaot ol niufala magasin. “Gud moning. Nem blong mi ______. Mi kam blong serem sam impoten save long saed blong [talem stamba tok blong hem]. Mi mi rili laekem poen ya. [Soem stret poen no tokbaot wan pija.] Hem i givhan long mi [tokbaot olsem wanem i givhan long yu], mo mi ting se bambae yu haremgud long hem tu. Sipos yu wantem ridim magasin ya, bambae mi mi glad blong givim long yu.” Man blong haos i askem se, “?Hamas long magasin ya?” Pablisa no paenia i ansa se, “Mifala i no askem mane long ol magasin blong mifala. Be sipos yu wantem mekem wan smol presen long wok blong mifala blong tijim Baebol long olgeta ples blong wol, bambae mifala i glad blong akseptem presen ya.” Man blong haos i mekem wan presen mo pablisa no paenia i tekem mane ya mo i putum long wan envlop blong givhan long wok blong ful wol.
(2 menet) Brata we i lukaot long wok blong prij i talem bakegen long ol pablisa se oli mas waes mo oli mas gat kwaet fasin taem oli eksplenem long ol man we oli soem intres mo olgeta we i tekem ol buk, se oli save givim presen mane. Sipos yumi wantem kasem frut long wok ya, yumi mas givim ol magasin blong yumi long olgeta we oli wantem kasem trutok, i minim olgeta we oli soem intres long mesej mo wok blong yumi. Yumi luksave samting ya, long faswan taem we yumi storeyan wetem man. I no gat wan samting we i mas blokem ol pablisa blong givimaot ol magasin. (Mat. 10:11) Long narafala rod, yumi no mas givim buk long ol man we oli no rili laekem mesej blong Baebol. Makem klia se, maet sam long ol yangfala pablisa oli nidim blong wok klosap long papa mama blong olgeta long wok blong prij, go kasem taem we oli lanem blong storeyan wetem ol man blong haos. Ol niufala pablisa mo olgeta we oli no gat ekspiryens, bambae oli wantem wok wetem olgeta we oli save tijim olgeta, long wanem tok we oli mas yusum. Mo biaen oli save eksplenem wok long saed long niufala plan blong seremaot ol buk. Taem yumi folem rod ya long wok blong prij, yumi save putum tingting blong yumi i stap moa long wok blong prij, mo yumi naf moa blong luksave ol man we oli rili intres. Stamba mak blong yumi i blong traem faenem mo fidim ol sipsip blong Masta, mo givhan long olgeta blong oli naf blong kasem sef mo go insaed long niufala wol blong Jeova. Long ol haf blong Kingdom Wok we bambae oli kamaot biaen, taem yumi givimaot ol buk no magasin, bambae i gat ol pleplei blong soemaot olsem wanem wan pablisa i save luksave sipos i stret blong livim buk wetem man we i intres, no nogat. I gud tu sipos wan pablisa i soemaot olsem wanem blong talemaot long ol man se yumi akseptem ol presen mane blong givhan long wok blong yumi long olgeta ples blong wol.
Singsing 208 mo laswan prea.
Wik We i Stat Long Novemba 15
Singsing 211
8 menet: Lokol mesej.
25 menet: “!Lukaot Long Ol Denja Taem Yu Yusum Internet!” Kwestin mo ansa.
12 menet: Ol Papa Mama—?Yufala i Stadi Oltaem Wetem Famle Blong Yufala? Wan tok wetem kwestin mo ansa. Eksplenem from wanem ol famle oli nidim blong stadi tugeta. (Luk School Guidebook, pej 37-8.) Tokbaot ol tingting we oli save blokem famle blong stadi tugeta: (1) yumi ting se pikinini i yang tumas blong kasem save, (2) yumi gat tingting ya se fasin blong joen long ol miting i naf, (3) yumi taed from we yumi folem wan program we i bisi tumas, mo (4) yumi spenem tumas taem blong lukluk televisin. (luk Mei 15, 1994, Wajtaoa, pej 11-12.) Askem ol hed blong famle, blong talem olsem wanem oli winim ol traem we i save blokem olgeta, blong oli save stadi oltaem wetem famle blong olgeta. Makem se evriwan i mas traehad, mo wokgud tugeta.
Singsing 217 mo laswan prea.
Wik We i Stat Long Novemba 22
Singsing 158
15 menet: Lokol mesej mo ol ekspiryens long wok blong prij.
15 menet: ?Wanem Tingting Blong Yu Long Ol Wok We Yu Kasem? Wan elda i mekem tok ya. I gat wan longfala lis blong ol defren wok blong mekem, blong kongregesen i save gohed blong wok gud: mekemrere program blong ol defren wok; pikimap ol narafala blong kam long ol miting; tekem olgeta blong go long wok blong prij; lukaot long ol olfala; mo klinim, fiksimap, mo lukaot long ol samting long Haos Kingdom. ?Wanem tingting blong yu, taem oli askem long yu blong givhan? Sam oli no wantem mekem, sam oli mekem long fasin we oli stap fosem olgeta, no samfala oli mekem be oli no finisimgud wok blong olgeta. Tokbaot from wanem yumi save glad taem yumi akseptem mo finisim ol wok olsem. Leftemap tingting blong evriwan long Kongregesen, blong soemaot wan tingting blong wantem givhan long ol narafala.—Sam 110:3, ftn.; Aes. 6:8.
15 menet: Lokol nid. No wan tok we i stanap long Wajtaoa blong Septemba 15, 1999, pej 8-11, “?From Wanem Yu Mas Holem Promes Blong Yu?”
Singsing mo laswan prea.
Wik We i Stat Long Novemba 29
Singsing 215
10 menet: Lokol mesej. Talem long ol pablisa se oli mas putum ripot blong olgeta long manis Novemba.
15 menet: Leftemap tingting blong ol niuwan blong oli joen long ol miting. Wan elda i storeyan wetem wan no tu man blong givhan. Toktok blong olgeta i stanap long buklet ya, Ol Wetnes Blong Jeova—Oli Joengud Blong Mekem Wok Blong God Long Olgeta Ples Blong Wol, pej 14-15. Lukluk bakegen from wanem i impoten we ol niuwan oli joen long ol miting. Ol miting oli givhan long olgeta blong kasem moa save, oli leftemap tingting, mo givim help. Talem bakegen ol faef miting evri wik, mo eksplenem olsem wanem oli save givhan long yumi wanwan. Tokbaot olsem wanem ol miting oli givhan long yumi blong gat ol gudfala fasin, kam strong long saed blong spirit, lidim yumi long ogenaesesen, halpem yumi blong kam klosap long ol narafala, mo givhan long yumi blong kasem stamba tingting blong wok blong prij blong yumi. Leftemap tingting blong ol man blong oli yusum buklet ya blong givhan long ol niuwan blong kam long ol miting.
20 menet: Jus blong yumi—New World Translation. Givim wan tok mo mekem pleplei. Long plante skul, i no gat Baebol i olsem Baebol blong yumi, from we yumi prentem, yusum, mo seremaot wan Baebol we ol man blong Jeova we tabu spirit i makemaot oli wokem. Yumi no mekem olsem from we yumi wantem winim mane no serem ol tijing blong yumi long olgeta man. Be, yumi wantem givim ona long nem blong God, mo halpem ol narafala man blong oli savegud hem. Plante taem, i no isi blong kasem save ol narafala Baebol. Taswe lukluk bakegen ol risen from wanem i gud blong yusum New World Translation. (Ridim buk ya “All Scripture,” pej 327-331. Makem ol tok long paragraf 3, soemaot sam eksampel long paragraf 6 we oli tanem i kam moa klia, mo long paragraf 22-23 makemaot ol stamba poen, from wanem Baebol ya i gud.) Mekem tu sotfala pleplei, we oli soemaot olsem wanem yumi save ansa taem ol narafala oli talem se, “Yufala i gat prapa Baebol blong yufala.” (Lukluk Reasoning buk, pej 279-280.) Sipos ol man oli no save Engglis no Franis, yumi save soemaot buk Save nomo, no maet buk ya Man We i Hae Moa.
Singsing 205 mo laswan prea.