‘Yumi Mekem Ol Samting Blong Yumi Kam Strong Moa’
1 Taem yumi wok wetem ol brata blong yumi, yumi mas mekem ol samting long fasin we i gud blong mekem oli strong moa. Hemia i min se yumi no wantem mekem wan samting we i save spolem olgeta long saed blong spirit. Sipos yumi joen long wan bisnes blong salem wan prodak no blong sapotem wan kampani, yumi mas meksua se bambae yumi no mekem ol brata blong yumi oli foldaon.—2 Kor. 6:3; Fil. 1:9, 10.
2 Samfala oli joen long ol defdefren kaen bisnes, mo oli ting se maet ol Kristin brata blong olgeta bambae oli save kam ol kastoma blong olgeta. I gat sam ogenaesesen we oli trenem ol man blong wok blong olgeta, blong oli luk evri man olsem wan kastoma—wetem ol man blong skul blong olgeta tu. Sam brata oli bin mekem ol bigfala miting wetem ol narafala Witnes blong traem mekem bisnes wetem olgeta. Sam narafala oli mekem pablisiti from bisnes blong olgeta, taem oli sanem sam prodak, magasin, kaset video blong olgeta no infomesen long Intenet i go long ol brata blong olgeta, we oli no askem fastaem sipos oli wantem. ?Yu ting se i stret blong wan Kristin i yusum fasin fren we hem i gat long saed blong spirit wetem ol brata blong hem, blong winim mane from olgeta? !Nogat!—1 Kor. 10:23, 24, 31-33.
3 Ol Brata Oli Mas Lukaotgud: Samting ya i no minim se wan Kristin i no save mekem bisnes wetem brata blong hem. Hemia i bisnes blong olgeta nomo. Be, i gat sam man we oli mekem wan kaen bisnes we i leftemap fasin griri, mo oli kwik blong pulum ol brata blong joenem olgeta long bisnes ya no givim smol mane blong sapotem bisnes ya. Plante long ol bisnes ya oli foldaon, mekem se olgeta we oli bin joen long hem oli lusum bigfala mane. I tru se olgeta ya we oli bin putum mane insaed long bisnes ya, oli mekem olsem from we oli wantem kam rij kwiktaem. Be man ya we i pulum olgeta blong joen long bisnes ya i no mas ting se i no fol blong hem nating, sipos bisnes ya i foldaon mo oli lusum mane. Hem i mas tingbaot fastaem se, sipos bisnes i foldaon, ol brata blong hem oli save harem olsem wanem long saed blong spirit mo long saed blong bodi. Olgeta we oli gat ol tiokratik wok insaed long kongregesen, oli mas lukaotgud taem oli tingbaot blong mekem ol bisnes olsemia, from we ol brata oli gat respek mo oli trastem olgeta from wok ya we oli gat long kongregesen. I nogud blong yusum tras we oli gat long yumi, blong kasem samting we yumi wantem. Sipos wan brata i lusum respek blong ol narafala, hem i save lusum ol tabu wok blong hem tu insaed long kongregesen.
4 Yumi mas wantem tumas blong “mekem ol man oli kam strong moa.” (1 Kor. 14:26) Yumi mas lukaotgud blong no mekem ol bisnes long saed blong mane insaed long kongregesen. Baebol i no talem se ol samting ya oli wan risen from wanem yumi kam tugeta long ol miting.—Hib. 10:24, 25.