Tingbaot Ol Nambawan Wok Blong God
1 Long Distrik Asembli ya “Yumi Mekem Samting We Tok Blong God i Talem,” yumi bin spenem tri nambawan dei tugeta. Yumi no tingbaot ol wari blong yumi mo yumi putum tingting blong yumi i stap nomo long ol nambawan wok blong Jeova. Program blong asembli ya i wantem mekem bilif blong yumi long God mo Tok blong hem i gru. Hem i mekem fasin fren blong yumi wetem God i kam strong moa, mo tingting blong yumi i strong moa blong prij. ?Olsem wanem ol tijing ya we yumi kasem oli stap mekem i gud long yumi?—Jon 13:17.
2 Ol Famle Oli Obei Long Tok Blong God: Tok ya we i gat tri haf long hem, “Obei Long Tok Blong God,” i halpem yumi blong skelem sipos famle blong yumi i strong long saed blong spirit no nogat. Ol pikinini oli laekem tumas blong lanem samting. Taswe, tok ya i leftemap tingting blong ol papa mama we oli laekem God, blong mekem famle Baebol stadi olsem fandesen we oli nidim blong bildimap wan famle we i strong long saed blong spirit. Plante hed blong famle oli stap yusum niufala buklet ya !Yu Save Kam Fren Blong God! blong storian wetem ol pikinini blong olgeta. Samting ya bambae i halpem ol pikinini blong frengud wetem Jeova long fasin we i mekem oli hapi mo oli harem se oli sefgud. Papa mama, tijim ol pikinini blong yu blong oli luksave ol filing blong God. Mo, yu wan yu mas soemaot lav we yu yu gat long God mo ol wok blong hem. (Sam 103:2) Wok tugeta blong putum mo kasem sam mak long saed blong spirit mo blong joen moa long ol wok blong Jeova.
3 Tok Blong God i Soemaot Rod Long Yumi: Yumi glad tumas blong kasem niufala buk ya Isaiah’s Prophecy—Light for All Mankind I. ?Yu yu stat finis blong ridim faswan buk ya? Buk blong Aesea i talemaot sam strong jajmen agensem ol nesen we oli no laekem God, mo i tokbaot ol nambawan blesing tu we Kingdom bambae i karem i kam long ol man blong God. (Aes. 34:2; 35:10) Mo tu, hem i mekem yumi strong moa blong bilif mo trastem Jeova mo fasin blong hem blong mekem ol samting.—Aes. 12:2-5.
4 Taem yu ridim Isaiah’s Prophecy I, yu harem save finis long stat blong hem se Aesea i holemstrong long Jeova nating se ol rabis fasin oli kam antap raonabaot long hem. Taem Aesea i harem voes ya we i singaot hem blong karem tok blong God, Aesea i ansa se: “!Mi ya, mi save go! !Yu sanem mi!” (Aes. 6:8) Sipos yumi tingting dip long fasin ya blong Aesea we hem i rere blong wok, samting ya bambae i leftemap tingting blong yumi blong gohed long wok blong talemaot gud nius. Bambae yumi joen fulwan long wok ya blong givim ‘witnes long fes blong olgeta man.’—Mat. 24:14.
5 Sipos yumi tingbaot olgeta wok blong Jeova bambae yumi save presem hem from we hem i hae tumas. !Yes, yumi mas holemtaet janis ya we yumi gat blong mekem samting we tok blong God i talem!