Ol Hapi Man Blong “Mekem Ol Samting We Tok Ya i Talem”
“God i putum tok we i save sevem yufala i stap finis long tingting blong yufala, nao yufala i mas mekem tingting blong yufala i stap daon, blong harem tok ya. Be i nogud yufala i . . . stap lesin long tok ya blong God, be yufala i no mekem. Yufala i mas mekem ol samting we tok ya i talem.”—JEMES 1:21, 22.
1. ?Wanem tingting we yumi mas gat long stampa vas blong yia 1996?
“YUFALA I MAS MEKEM OL SAMTING WE TOK YA I TALEM.” Sotfala tok ya i karem wan mesej we i gat bigfala paoa. Hem i kamaot long “Leta Blong Jemes” long Baebol, mo long 1996, bambae oli putum tok ya long ol Haos Kingdom olsem vas blong yia blong ol Wetnes blong Jeova.
2, 3. ?From wanem i stret nomo we Jemes i raetem leta we i karem nem blong hem?
2 Jemes, wan haf brata blong Masta Jisas, i wan impoten man long faswan Kristin kongregesen. Wan taem, afta we Masta blong yumi, Jisas, i laef bakegen long ded, hem i kamtru long Jemes, mo biaen i kamtru long ol narafala aposol. (1 Korin 15:7) Biaen, taem aposol Pita i aot long kalabus tru long wan merikel, hem i talem long wan grup blong ol Kristin we oli hivap wanples se: “Yufala i mas talemaot store ya long Jemes, mo long ol narafala brata ya blong yumi.” (Ol Wok 12:17) Nating se Jemes i no wan aposol, i luk olsem we hem nao i presiden blong miting blong hed kampani long Jerusalem, taem ol aposol mo ol elda oli agri se ol Hiten man we oli kam Kristin oli no nid blong sakomsaes. Jemes i mekem wan tok long ol bigfala poen long bisnes ya, nao oli sanem tingting ya we tabu speret i sapotem, i go long ol kongregesen.—Ol Wok 15:1-29.
3 I klia se waes fasin blong Jemes blong toktok i pulum tingting blong ol narafala bigwan. Be, wetem tingting daon, hem i luksave se hem i ‘wan slef nomo blong God, mo blong Jisas Kraes Masta blong yumi.’ (Jemes 1:1) Long leta blong hem we i kamaot long God, i gat plante gudgudfala advaes mo ol tok blong leftemap tingting blong ol Kristin tede. Hem i finisim leta ya samwe long fo yia bifo long faswan taem we ol ami blong Rom we Jenerol Cestius Gallus i lidim olgeta, oli girap agens long Jerusalem. Hemia afta we ol man oli talemaot gud nyus ya long “olgeta man long wol.” (Kolosi 1:23) Laef i strong tumas long taem ya, mo ol man blong Jeova oli savegud se, i no longtaem biaen, bambae hem i mekem jajmen blong hem i kamtru long nesen blong ol man Jyu.
4. ?Wanem i soemaot se ol faswan Kristin oli trastem fulwan ol Tok blong God?
4 Ol Kristin ya oli gat fulwan Hibru haf blong Baebol finis, mo plante buk blong Grik haf blong Baebol. I klia se ol Kristin we oli raetem Baebol oli trastem fulwan Tok blong God, from plante taem oli talemaot tok blong ol faswan hanraet bakegen. Long sem fasin, yumi tede, yumi mas stadi oltaem long Tok blong God mo mekem i wok long laef blong yumi. Blong stanap strong longtaem, yumi nidim paoa mo strong tingting we Tabu Baebol i givim.—Ol Sam 119:97; 1 Timote 4:13.
5. ?From wanem yumi nidim ol spesel advaes blong lidim yumi tede, mo weples bambae yumi faenem ol advaes ya?
5 Tede, yumi stap kolosap nomo long “bigfala trabol tumas, we neva man i luk olsem bifo, i stat long taem we God i mekem wol, i kam kasem tede. Yes, mo bambae i no moa gat sam bigfala trabol olsem bakegen samtaem.” (Matyu 24:21) Blong stap sef, yumi nidim se God i lidim yumi. ?Olsem wanem yumi save kasem samting ya? Yumi mas wantem long hat blong yumi blong kasem ol tijing blong Tok blong God we i kamaot from tabu speret. Samting ya bambae i lidim yumi blong “mekem ol samting we tok ya i talem,” olsem ol trufala man blong Jeova long taem bifo. Yumi mas ridim mo stadi oltaem long Tok blong God mo yusum Tok ya blong presem Jeova.—2 Timote 2:15; 3:16, 17.
Stanap Strong Longtaem Wetem Glad
6. ?From wanem yumi mas haremgud nating se yumi fesem plante traem?
6 Long ol faswan vas long leta blong Jemes, hem i tokbaot glad, namba tu frut blong tabu speret blong God. Hem i raetem se: “Ol brata mo sista, taem plante samting oli stap kam blong traem yufala, bambae yufala i save luk olgeta olsem samting blong haremgud from. From we yufala i save, taem bilif blong yufala i strong, nao yufala i winim ol samting ya blong traem yufala, bambae yufala i save kam strong moa blong stanap longtaem. Mo yufala i mas stanap strong olwe gogo kasem en blong rod, blong bambae yufala i stret gud, yufala i no sot long wan samting, mo yufala i gat olgeta samting blong Kristin laef blong yufala.” (Jemes 1:2-4; Galesia 5:22, 23) ?Olsem wanem Jemes i save talem se fasin blong fesem plante traem i “olsem samting blong haremgud from”? Yes, Jisas tu i talem long Bigfala Toktok blong hem antap long Hil se: “Yufala we ol man oli stap spolem nem blong yufala, oli stap ronem yufala, mo oli stap gyaman, oli stap talem ol rabis tok agens long yufala, from we yufala i man blong mi, yufala i save haremgud. Yufala i save hapi, yufala i save glad, from we i gat bigfala pei blong yufala i stap long heven.” (Matyu 5:11, 12) Yumi haremgud tumas blong luk we Jeova i blesem yumi from traehad blong yumi taem yumi stap gohed strong blong kasem mak ya, laef we i no save finis.—Jon 17:3; 2 Timote 4:7, 8; Hibrus 11:8-10, 26, 35.
7. (a) ?Wanem samting i save givhan long yumi blong stanap strong? (b) ?Olsem wanem yumi save kasem blesing olsem Job?
7 Jisas hem wan i stanap strong from “i luksave we bambae i save haremgud.” (Hibrus 12:1, 2) !Sipos yumi luk oltaem long eksampel blong Jisas, we hem i gat strong tingting, yumi tu yumi save stanap strong longtaem! Olsem Jemes i talem kolosap long en blong leta blong hem, Jeova i givim bigfala pei long olgeta we oli holemstrong long hem. Jemes i talem se: “From we olgeta oli stap stanap strong longtaem, yumi talem se God i mekem olgeta oli haremgud. Mo yufala i harem tok finis blong fasin blong Job, we hem i mekem tingting blong hem i longfala. Mo yufala i save finis ol samting we [Jeova] i mekem long hem biaen. [Jeova] i kaen tumas, mo hem i gat sore long man.” (Jemes 5:11) Tingbaot blesing we Job i kasem from fasin blong holemstrong long God. Sik blong hem i finis, mo hem i haremgud long laef we i gat mining mo i hapi wetem ol famle blong hem. Fasin blong holemstrong long God longtaem i save mekem se bambae yu tu yu kasem glad long Paradaes we God i promes long nyufala wol, antap long glad we yu stap kasem naoia taem yu mekem wok blong Jeova.
Lukaot Waes
8. ?Olsem wanem yumi save faenem trufala waes we i stret long laef blong yumi, mo olsem wanem prea i save givhan long yumi blong kasem samting ya?
8 Taem yumi stadi oltaem long Tok blong God, mo mekem i wok long laef blong yumi, yumi kasem waes we i kam long God, we i save givhan long yumi blong stanap strong tru long ol traem long rabis wol ya blong Setan we i stap lus. ?Olsem wanem yumi save sua se bambae yumi faenem waes olsem? Jemes i talem long yumi se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem. From we fasin blong God, hem i no save tok nogud long man we i askem samting long hem, hem i stap givim presen long ol man long gladhat blong hem. Be taem yufala i prea, yufala i mas bilif tru, we tingting blong yufala i no hafhaf, from we man we tingting blong hem i hafhaf, hem i olsem solwora nomo. Taem win i blu, solwora bambae i save go olbaot, olsem we win i pusum.” (Jemes 1:5, 6) Yumi mas prea oltaem, mo bilif fulwan se bambae Jeova i harem samting we yumi askem, mo bambae hem i ansa long prea blong yumi long rod we hem i wantem mo long stret taem blong hem.
9. ?Olsem wanem Jemes i tokbaot waes we i kamaot long God mo fasin blong folem waes ya?
9 Waes we i kamaot long Jeova i wan presen we hem i givim. Jemes i tokbaot presen ya, i se: “Evri samting we oli gud mo evri presen we oli nambawan oli aot long heven nomo, oli kam long yumi. God ya we i mekem olgeta laet blong skae, hem i stap givim ol gudfala samting ya long yumi. Fasin blong hem i no save jenis, mo hem i no save tanem baksaed blong hem long yumi blong livim yumi long tudak.” Biaen, long leta blong Jemes, hem i eksplenem frut we i kamaot taem man i kasem trufala waes. Hem i talem se: “Sipos i gat sam long yufala we oli waes, oli man blong save, i gud oli soemaot samting ya. Laef blong olgeta i mas stret, tingting blong olgeta i mas stap daon, mo fasin blong olgeta i mas waes. . . . Fasin blong man we i kasem waes long heven, hem i narafala. Nambawan samting blong hem, laef blong hem i klin gud. Hem i man blong pis, i kwaet man, i man blong joen gud long ol narafala man, mo i man we i gat sore. Waes blong man ya i gat plante gudfala frut long laef blong hem. Man ya i no save jajem man long fasin we i no stret, mo hem i no gat tu tingting.”—Jemes 1:17; 3:13-17.
10. ?Olsem wanem gyaman wosip i defren long trufala wosip?
10 Long ogenaesesen blong ol gyaman skul raonabaot long wol, nating se long Krisendom no long ol narafala kantri, plante taem ol man blong wosip oli gat fasin blong singim ol singsing, lesin long ol sem kaen prea bakegen mo bakegen mo harem wan tok we pasta i givim. I no gat wan tok we i pulum olgeta blong talemaot mesej blong hop, from we long bighaf blong ol skul, ol man oli no stap tingbaot wan gudfala fyuja. Oli no tokbaot nambawan hop long saed blong Kingdom blong God long han blong Mesaea. Sipos oli tokbaot, oli putum rong mining long hem. Jeova i talem wan profet tok long saed blong ol man blong Krisendom se: “I gat tufala rabis samting we ol man blong mi oli mekem: Oli lego mi, stampa blong wora blong laef, blong oli save digim ol prapa wel blong olgeta, ol wel we oli brobrok, we wora i no save stap insaed long olgeta.” (Jeremaea 2:13) Oli no moa gat wora blong trutok. Oli no gat waes we i kamaot long heven.
11, 12. (a) ?Olsem wanem waes we i kamaot long God i save pusum yumi? (b) ?Waes we i kamaot long God i givim woning long yumi long saed blong wanem samting?
11 !I defren olgeta long ol Wetnes blong Jeova tede! Wetem bigfala paoa we God i givim long olgeta, oli stap talemaot gud nyus blong Kingdom we i kolosap nao, long olgeta ples long wol. Waes we oli talemaot i stanap fulwan long Tok blong God. (Skelem wetem Proveb 1:20; Aesea 40:29-31.) Tru ya, oli yusumgud trufala waes mo save blong talemaot ol nambawan stampa tingting blong God we i Wokem yumi. Yumi mas wantem tumas se evriwan insaed long kongregesen ‘oli waes, oli man blong luksave, blong bambae oli savegud olgeta samting we God i wantem.’ (Kolosi 1:9) Sipos hemia i stap olsem wan faondesen, bambae strong tingting i pusum ol yangfala mo ol olfala oltaem blong gohed blong “mekem ol samting we tok ya i talem.”
12 ‘Waes blong heven’ i givim woning long yumi long saed blong ol sin we oli save mekem se God i no moa glad long yumi. Jemes i talem se: “Ol brata mo sista long Kraes. Bambae yufala i no fogetem samting ya. Yufala evriwan i mas rere oltaem blong lesin, be yufala i mas no hareap blong tok. Mo yufala i mas no hareap blong kros, from we fasin blong man we i kros i no save mekem stret fasin blong God bambae i kamtru.” Yes, yumi mas rere oltaem, mo wantem tumas blong lesin long advaes we i kamaot long God mo mekem i wok long laef blong yumi. Be, yumi mas lukaotgud blong no yusum ‘smol samting ya nomo,’ tang, long fasin we i no stret. Sipos yumi tok flas, toktok long baksaed blong narafala, mo toktok blong leftemap yumi wan, tang blong yumi i save kam olsem wan faea we i “bonem ol haos long wan bigfala velej we i finisim olgeta.” Taswe, yumi mas soem kaen fasin mo fasin blong bos long tingting taem yumi joen wetem ol narafala.—Jemes 1:19, 20; 3:5.
13. ?From wanem i impoten blong harem ‘tok we God i putum long tingting blong yumi finis’?
13 Jemes i raetem se: “Yufala i mas tekemaot olgeta rabis fasin mo olgeta bisnes we i nogud, oli finis long laef blong yufala. God i putum tok we i save sevem yufala i stap finis long tingting blong yufala, nao yufala i mas mekem tingting blong yufala i stap daon, blong harem tok ya.” (Jemes 1:21) Ol man blong wol ya oli fulap long griri fasin, oli flas long ol samting we oli gat, oli ronem ol sas samting, oli tingbaot olgeta fastaem mo oli mekem ol rabis fasin. Kolosap nao bambae oli lus. “Be man we i stap mekem ol samting we God i wantem, hem i stap we bambae i no save lus samtaem.” (1 Jon 2:15-17) !Ale, i impoten tumas we yumi harem tok we ‘God i putum i stap finis long tingting blong yumi’! Waes we i kamaot long Tok blong God i defren olgeta long ol fasin nogud blong wol ya we i stap lus. Yumi no wantem wan long ol fasin nogud ya. (1 Pita 2:1, 2) Yumi mas mekem se lav blong trutok mo strong bilif i gru long hat blong yumi. Olsem nao, yumi save gat strong tingting se neva bambae yumi tanem baksaed long ol stret rod blong Jeova. ?Be yu ting se i naf nomo blong lesin long Tok blong God?
Kam Ol Man Blong “Mekem Ol Samting We Tok Ya i Talem”
14. ?Olsem wanem yumi save kam olsem man we i “lesin” long Tok blong God mo i “mekem” i wok tu?
14 Long Jemes 1:22 yumi ridim se: “I nogud yufala i stap gyaman nomo long yufala, we yufala i stap lesin long tok ya blong God, be yufala i no mekem. Yufala i mas mekem ol samting we tok ya i talem.” !“Yufala i mas mekem ol samting we tok ya i talem”! Hemia i bigfala poen long leta blong Jemes. !Taem yumi lesin finis, yumi mas mekem ‘stret olsem God i talem’! (Jenesis 6:22) Plante man tede oli talem se i naf sipos oli lesin nomo long tok blong pasta long jyos no mekem wosip wanwan taem nomo, be oli no mekem wan narafala samting bakegen. Maet oli ting se sipos oli gat ‘gudfala fasin blong laef’ we i stret long tingting blong olgeta, samting ya i naf. Be Jisas i talem se: “Man we i wantem kam biaen long mi i mas blokem ol samting we hem nomo i wantem, nao i mas karem [pos] blong hem, i mas biaen long mi.” (Matyu 16:24) I klia se ol tru Kristin oli mas lego ol samting we olgeta nomo oli wantem mo oli mas stanap strong longtaem blong folem eksampel blong Jisas blong mekem ol samting we God i wantem. Samting we God i wantem tede i sem mak long faswan handred yia, taem Jisas we i laef bakegen i talem se: “Yufala i mas go long ol man long olgeta ples long wol, blong pulum olgeta oli kam man blong mi.” (Matyu 28:19) ?Olsem wanem? ?Yu yu stap gohedgud long wok ya?
15. (a) ?Jemes i yusum wanem pijatok blong soemaot se yumi save kasem glad taem yumi “mekem ol samting we tok ya i talem”? (b) ?From wanem i no naf blong mekem wan fasin blong wosip nomo?
15 Tok blong God i olsem wan glas we taem yumi stap lukluk long hem, hem i soemaot long yumi se yumi wanem kaen man. Jemes i talem se: “Loa ya i stret olgeta, mo hem i save mekem man i fri. Mo man we i stap luklukgud long hem, i stap tingbaot hem oltaem, hem i no save fogetem ol samting blong loa ya. Hem i save mekem ol samting we loa ya i talem. Mo taem man i stap mekem olsem, God i stap mekem hem i haremgud long olgeta laef blong hem.” (Jemes 1:23-25) Yes, bambae hem i wan hapi man blong “mekem ol samting we tok ya i talem.” Mo tu, i impoten blong kam wan ‘man blong mekem ol samting ya’ long evri haf blong Kristin laef blong yumi. Yumi neva mas gyaman long yumi wan bakegen se sipos yumi mekem wan fasin blong wosip, hemia nomo i naf. Jemes i givim advaes long yumi blong mekem sam samting long saed blong tru wosip we maet sam gudfala Kristin tu oli mestem. Hem i raetem se: “Prapa fasin blong ona long God ya we i Papa blong yumi, we hem i luk se i klin gud mo i stret gud, hemia. Man i mas goraon long ol pikinini we oli no gat papa blong olgeta, mo long ol widowoman, blong givhan long olgeta long ol trabol we i kasem olgeta. Mo i mas holem laef blong hem i klin we ol rabis fasin blong wol i no save spolem.”—Jemes 1:27.
16. ?Wanem ol samting we Ebraham i mekem blong kam ‘fren blong Jeova,’ mo olsem wanem yumi save kam fren blong Jeova tu?
16 I no naf blong talem nomo se, ‘Mi mi bilif long God,’ be yumi no mekem wan samting. Jemes 2:19 i talem se: “Yu yu bilif we i gat wan God nomo i stap. Hemia i gud ya. Ol [rabis speret] tu oli bilif olsem, mo oli stap seksek from.” Jemes i makemgud poen ya se ‘bilif we i no gat fasin blong laef i go wetem, hem i ded,’ mo hem i tokbaot Ebraham, i se: “Fasin blong bilif blong hem, mo fasin blong laef blong hem, tufala i joen. Fasin blong laef blong hem i mekem fasin blong bilif blong hem i no sot long wan samting.” (Jemes 2:17, 20-22) Ol wok we Ebraham i mekem long laef blong hem, olsem hem i givhan long famle blong hem taem oli kasem trabol, i tekem ol strenja oli kam long haos blong hem, i mekemrere blong kilim Aesak olsem sakrifaes, ol samting ya oli ‘talemaot klia’ se hem i bilif strong long promes blong God long saed blong ‘taon ya long fyuja we faondesen blong hem i save stap oltaem nomo,’ hemia Kingdom blong Mesaea. (Jenesis 14:16; 18:1-5; 22:1-18; Hibrus 11:8-10, 13, 14; 13:2) I stret nomo we ‘ol man oli singaot Ebraham se “Fren blong Jeova.”’ (Jemes 2:23) Yumi tu, yumi save kam olsem ‘fren blong Jeova’ taem yumi wok strong blong talemaot bilif mo hop blong yumi long Kingdom we i stap kam, we stret fasin nomo bambae i stap long hem.
17. (a) ?From wanem Rehab “i kam olsem wan stret woman long fes blong God,” mo wanem ol blesing we hem i kasem from? (b) ?Wanem longfala lis we Baebol i givim long saed blong olgeta ya we oli ‘mekem ol samting we tok ya i talem’? (c) ?Olsem wanem Job i kasem blesing, mo from wanem?
17 Tru ya, olgeta we oli stap “mekem ol samting we tok ya i talem,” ‘oli kam stret man long fes blong God from fasin blong laef blong olgeta, i no from fasin blong bilif blong olgeta nomo.’ (Jemes 2:24) Rehab i wan woman we i mekem fasin blong laef blong hem i joen wetem bilif we hem i gat long “tok ya” we hem i harem long saed blong ol strongfala wok we Jeova i bin mekem. Hem i haedem ol spae blong Isrel mo i givhan long olgeta blong ronwe, mo biaen hem i pulum ol famle blong hem oli kam wanples blong oli stap sef. !Taem hem i laef bakegen long ded, bambae hem i glad tumas blong save se bilif blong hem, we hem i soemaot long ol wok blong hem, i mekem se hem i kam olsem bubu blong Mesaea! (Josua 2:11; 6:25; Matyu 1:5) Hibrus japta 11 i givim wan longfala lis blong sam narafala man we oli ‘mekem ol samting’ blong soemaot bilif blong olgeta, mo bambae oli kasem bigfala pei from. Yumi no mas fogetem Job. Taem hem i kasem bigfala traem, hem i talem se: “Mi mi gohed blong presem nem blong Jeova.” Hem i kasem bigfala pei from bilif mo wok blong hem. (Job 1:21; 31:6; 42:10; Jemes 5:11) Long sem fasin, sipos yumi stanap strong tede blong “mekem ol samting we tok ya i talem,” bambae Jeova i glad long yumi.
18, 19. ?Olsem wanem ol brata we oli kasem trabol blong plante yia finis oli “stap mekem samting we tok ya i talem,” mo wanem blesing i kamaot from wok blong olgeta?
18 Sam long olgeta we oli bin stanap strong blong plante yia tru long ol bigfala traem, hemia ol brata blong yumi long Is Yurop. Naoia we gavman i tekemaot plante tabu long wok blong olgeta, oli “stap mekem samting we tok ya i talem” long ples blong olgeta we i jenis bigwan. Ol misinari mo ol paenia long ol kantri kolosap, oli go finis long ol ples ya blong givhan long wok blong tijim ol man, mo blong mekem ol wok i rongud folem wan gudfala plan. Branj ofis blong Finlan mo ol narafala branj ofis blong Watch Tower Society we oli stap kolosap, oli sanem ol nambawan man blong bildim haos, mo ol brata raonabaot long wol oli givim mane wetem gladhat blong olgeta, blong wokem ol nyufala branj ofis mo Haos Kingdom long ol ples ya.—Skelem wetem 2 Korin 8:14, 15.
19 !Ol brata mo sista ya we oli no fri blong mekem wok blong olgeta longtaem finis, naoia oli wok strong blong talemaot gud nyus! Oli stap ‘traehad tumas, mo oli stap hadwok.’ I olsem we oli stap pembak taem we oli lusum long ‘taem ya blong trabol,’ we oli no gat jans blong wok. (1 Timote 4:10; 2 Timote 4:2) Eksampel, long Albania, we bifo oli mekem i strong tumas long ol Kristin, long manis Epril blong yia ya, long tri dei nomo, oli givimaot olgeta smol pepa ya Kingdom News we nem blong hem “?From Wanem Laef i Fulap Tumas Long Trabol?” Nambawan wok ya i kamaot jes biaen long Memoriol blong ded blong Jisas, we 3,491 man oli kam long hem—namba ya i bitim bigwan 538 man blong talemaot gud nyus we oli stap long kantri ya.
20. ?Namba blong ol man we oli kam long Memoriol long ol yia we oli jes pas i soem wanem, mo olsem wanem yumi save givhan long olgeta?
20 Long plante narafala kantri tu, i gat bigfala namba blong man oli kam long Memoriol. Long ol yia we oli jes pas, i gat bitim 10 milyan man oli kam long Memoriol long ful wol. Long plante ples, ol nyuwan we bilif blong olgeta i kam strong from we oli kam mo joen long Memoriol, oli kam man blong “mekem ol samting we tok ya i talem.” ?Yumi save leftemap tingting blong plante moa nyuwan we oli joen wetem yumi, blong oli kam naf blong mekem wok ya?
21. ?Folem stampa vas blong yia, yumi mas gohed blong mekem wanem, mo yumi mas traem kasem wanem mak?
21 Olsem ol Kristin we oli wok strong long faswan handred yia, mo plante narafala afta long taem ya, yumi mas gat strong tingting blong traehad blong “resis i go stret long mak” blong kasem laef we i no save finis, nating se laef ya bambae i stap long Kingdom blong heven no long wol. (Filipae 3:12-14) Yumi mas traehad fulwan blong kasem mak ya. Naoia i no taem blong kam slak we yumi stap lesin long tok blong God nomo. Be naoia i moa impoten bitim ol narafala taem blong ‘stap strong mo wok.’ (Hagae 2:4; Hibrus 6:11, 12) From we ‘God i putum tok blong hem long tingting blong yumi finis,’ yumi mas stap olsem ‘ol hapi man blong mekem ol samting we tok ya i talem,’ naoia mo blong olwe.
?Bambae Yu Yu Ansa Olsem Wanem?
◻ ?Olsem wanem yumi save stanap strong wetem fasin glad?
◻ ?Wanem ya “waes we i kamaot long heven,” mo olsem wanem yumi save kasem waes ya?
◻ ?From wanem yumi mas ‘mekem samting we tok ya i talem, bitim we yumi lesin long tok ya nomo’?
◻ ?Wanem ol ripot we oli mas pusum yumi blong “mekem samting we tok ya i talem”?
[Tok Blong Pija Long Pej 17]
Yumi tu i mas openem hat blong yumi blong kasem tijing blong God
[Tok Blong Pija Long Pej 18]
Blesing we Job i kasem from we hem i holemstrong long God se, wan laef we i gat mining mo i hapi wetem famle blong hem