Tiokratik Skul Blong 2001
1 Baebol i givim plante risen we i soem from wanem yumi evriwan i mas joen fulwan long Tiokratik Skul.—Prov. 15:23; Mat. 28:19, 20; Ol Wok 15:32; 1 Tim. 4:12, 13; 2 Tim. 2:2; 1 Pita 3:15.
2 Longtaem finis i gat wan program blong ridim Baebol evri wik long skul ya. Folem program ya, yumi save ridim wan pej blong Baebol evridei. Stat long yia ya, i gat Baebol riding long ol wik we i gat ol kwestin blong tingting bak. Program blong ridim Baebol we yumi bin folem long ol tri yia we i pas, naoia hem i finis. Be sipos yu wantem ridim Baebol moa, yu save mekem prapa program blong yu blong ridim Baebol.
3 Tok No. 2 i blong trenem ol brata blong “ridim Baebol long ol man.” (1 Tim. 4:13) Taem yu kasem tok ya, yu mas ridim hem long bigfala voes bakegen mo bakegen blong savegud.
4 Tok No. 3 mo No. 4 oli stanap long Reasoning buk, mo tufala tok ya i blong givhan long yumi long wok blong prij. Sipos tok we yu kasem i tokbaot plante poen, yu save jusumaot sam poen nomo we i save wok gud long ples blong yufala. Yu save yusum fasin blong storian we i stret long teritori blong yufala.
5 Traem bes blong yu blong rerem gud olgeta tok we yu kasem long skul ya. Tekem taem blong rerem gud tok blong yu, mo talemaot wanem we i stap long hat blong yu. Olsem nao bambae yu leftemap tingting blong kongregesen, mo yu wan bae yu kasem blesing taem yu joen fulwan long Tiokratik Skul blong yia 2001.