Tiokratik Skul Blong Yia 2002
1 Bighaf blong ol man oli no tingbaot se fasin blong toktok i wan nambawan samting. Be, fasin blong toktok i wan presen we Jeova i givim long yumi. Hemia rod blong yumi blong storian wetem ol narafala mo blong talemaot ol tingting mo filing blong yumi. Antap moa, yumi save yusum fasin blong toktok blong presem God blong yumi.—Sam 22:22; 1 Kor. 1:4-7.
2 Long Tiokratik Skul, ol man, woman, mo pikinini oli kasem trening blong talemaot nem blong Jeova. (Sam 148:12, 13) Program blong skul ya blong yia 2002 i fulap long plante samting we Baebol i tokbaot. Ol save ya i save givhan long yumi wanwan, mo yumi save yusum tu long wok blong prij. Sipos yumi reregud mo tekpat long skul ya, bambae yumi mekem save blong yumi i gru mo yumi save kam moagud long fasin blong tijim Tok blong God.—Sam 45:1.
3 Ridim Baebol Evri Dei: Sipos Baebol i stap klosap long yumi oltaem, yumi save yusum eni fri taem we yumi gat blong ridim. Bighaf blong yumi i gat smoltaem evri dei we yumi save mekem olsem. I gud tumas sipos yumi save ridim wan pej evri dei. !Sipos yumi mekem olsem, hemia inaf blong yumi folem program blong ridim Baebol we i stap long program blong skul ya!—Sam 1:1-3.
4 Fasin blong ridim Baebol bambae i save givhan long yumi blong kasem hat blong man we i lesin mo pulum hem blong presem Jeova. Ol brata we oli mekem rere Tok No.2 oli mas ridim bakegen mo bakegen wetem bigfala voes. Brata we i lukaot long skul bambae i talem sam gudfala toktok blong leftemap tingting, mo givim sam advaes blong mekem riding i kam moagud.
5 Yusum Reasoning Buk: Tok No.3 mo Tok No.4 oli stanap long Reasoning buk. Ating bighaf blong yumi i mas traehad blong yusum moa nambawan buk ya long wok blong prij. Ol sista oli mas jusum ol fasin blong mekem tok we i stret long teritori blong yumi. Brata we i lukaot long skul i mas lukluk olsem wanem studen i tijim man mo i yusum Baebol.
6 !Bambae Tiokratik Skul i givhan long yumi evriwan blong gohed blong yusumgud fasin blong toktok we God i givim olsem presen, blong yumi save talemaot gud nius mo presem nambawan God blong yumi, Jeova!—Sam 34:1; Efes 6:19.