Lav i Pusum Yumi Blong Prij
1 Ol man oli savegud se yumi ol Witnes blong Jeova i wok strong blong talemaot mesej blong Kingdom. (Mat. 24:14) Long fulwol i gat bitim sikis milian Witnes we oli mekem wok ya, mo namba ya i gru taem ol niuwan oli joenem yumi long wok blong prij. Namba i minim nomo olgeta we oli joen long wok ya.
2 ?Wanem i pusum yumi blong wantem mekem wok ya we i no isi? I no from we wan man i fosem yumi, mo i no blong kasem mane, no wan spesel ona. Fastaem plante long yumi i bin fraet from we yumi harem se yumi no naf, mo plante taem ol man oli no wantem lesin. (Mat. 24:9) Bighaf blong ol man oli no kasemsave wanem i pusum yumi blong mekem wok ya. I mas gat wan gudfala risen blong yumi gohed long wok ya.
3 Paoa Blong Lav: Jisas i bin makemaot rul we i impoten moa i bitim ol narawan taem hem i talem se yumi ‘mas lavem Jeova long olgeta hat, laef, tingting mo paoa’ blong yumi. (Mak 12:30) Lav we yumi gat long Jeova i stanap long ol dip filing we yumi gat from we yumi luksave se hem i Haefala Rula, hem i Man We i Wokem olgeta samting, mo ‘i stret nomo blong ol man oli leftemap nem blong hem, mo blong oli bodaon, oli ona long hem, mo blong oli stap aninit long paoa blong hem oltaem.’ (Rev. 4:11) Ol nambawan fasin blong hem oli bigwan tumas blong yumi skelem wetem narafala man.—Eks. 34:6, 7.
4 Save mo lav we yumi gat long Jeova oli pusum yumi blong letem laet blong yumi i saenaot i kasem ol man. (Mat. 5:16) Laet blong yumi i saen taem yumi presem Jeova, tokbaot ol nambawan wok blong hem, mo talemaot mesej blong Kingdom blong hem. Olsem enjel ya we i stap flae antap long skae, yumi mas talemaot “gud nius ya we i blong stap oltaem nomo, . . . long olgeta man long wol, long olgeta blong evri kala, mo kantri, mo laen, mo lanwis.” (Rev. 14:6) Lav blong yumi hemia nao paoa we i stap mekem wok blong prij i gohed long ful wol.
5 Ol man long wol oli ting se wok blong prij i olsem “krangke tok nomo” we oli no nid blong lesin long hem. (1 Korin 1:18) Long evri ples, plante man oli traehad blong blokem wok ya. Olsem ol aposol, lav blong yumi we i tru i givim paoa long yumi blong talemaot se: “Bambae mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala. . . . Mifala i mas obei long God, mifala i no save obei long man.” (Wok 4:20; 5:29) Nating se man i agensem yumi, wok blong prij i stap gohed long evri ples long wol.
6 Lav we yumi gat long Jeova i olsem wan faea we i bon insaed long tingting blong yumi, i pusum yumi blong talemaot ol gudgudfala wok blong hem long evri ples. (Jer. 20:9; 1 Pita 2:9) !Bambae yumi gohed blong “talemaot ol samting ya we hem i mekem . . . from we hem i mekem ol bigbigfala wok”!—Aes. 12:4, 5.