!Letem Lav i Pulum Yu Blong Gohed Blong Prij!

1. ?Yumi lanem wanem long anuel miting blong 2023?

LONG anuel miting blong 2023,a yumi kasem sam niufala save long saed blong sam bilif blong yumi mo yumi harem sam gudfala nius long saed blong wok blong prij. Eksampol, yumi lanem se maet i gat sam man we bambae oli gat janis blong joen wetem ol man blong Jehova afta we Bigfala Babilon i lus. Mo tu, long Novemba 2023, yumi kasem nius se ol pablisa oli no moa nid blong raetemdaon evri samting we oli mekem long wok blong prij. ?Olsem wanem? ?Ol jenis ya oli mekem se wok blong prij i no moa impoten? !Nogat!

2. ?From wanem yumi talem se evri dei wok blong prij i kam moa impoten? (Mak 13:10)

² Taem ol dei oli stap pas, wok blong prij i kam moa impoten. ?From wanem? From we i no gat plante taem i stap. Tingbaot tok we Jisas i talem long saed blong wok blong prij long ol las dei ya. (Ridim Mak 13:10.) Folem buk blong Matiu, Jisas i talem se ol man bambae oli talemaot gud nius long olgeta ples long wol bifo we “en” i kam. (Mat. 24:14) Tok ya en, i minim en blong rabis sistem blong wol blong Setan. Jehova i makemaot wan stret “dei mo aoa” finis blong samting ya, mo i no longtaem bambae i kamtru. (Mat. 24:36; 25:13; Wok 1:7) Evri dei yumi stap kam klosap moa long taem ya. (Rom 13:11) Be go kasem taem ya, yumi mas gohed blong prij gogo kasem we en i kam.

3. ?Wanem i pulum yumi blong prij?

³ I gat wan impoten kwestin we yumi evriwan i wantem tingbaot. Hemia se: ?From wanem yumi talemaot gud nius? Ansa i isi nomo. Hemia se lav nao i pulum yumi blong prij. Taem yumi prij, yumi soemaot se yumi laekem gud nius, yumi lavem ol man, mo antap moa yumi lavem Jehova mo nem blong hem. Naoia i gud yumi tokbaot ol samting ya wanwan.

YUMI PRIJ FROM YUMI LAEKEM GUD NIUS

4. ?Wanem filing blong yu taem yu kasem wan gud nius?

⁴ ?Yu yu tingbaot filing we yu gat taem yu kasem sam gudfala nius? Maet yu harem se wan famle blong yu i gat wan niufala bebi, o yu kasem wan wok we yu rili nidim tumas. I sua se long taem ya, yu wantem tumas blong talemaot gud nius ya long ol famle mo fren blong yu. ?Hemia nao sem filing we yu gat, taem yu jes harem beswan nius ya, hemia gud nius blong Kingdom?

5. ?Wanem filing blong yu taem yu jes kasemsave gud long ol trutok blong Baebol? (Mo tu, yu luk pija.)

⁵ Traem tingbaot filing blong yu taem yu jes kasemsave gud long ol trutok blong Baebol. Yu lanem se Papa blong yu long heven i lavem yu, i wantem se yu kam joen long famle blong hem we oli wosipim hem, hem i promes blong finisim fasin safa, mo yu lanem se yu save luk ol famle blong yu we oli ded oli laef bakegen long niufala wol, mo plante moa. (Mak 10:​29, 30; Jon 5:​28, 29; Rom 8:​38, 39; Rev. 21:​3, 4) I sua se ol trutok ya oli mekem yu glad tumas. (Luk 24:32) !Yu laekem ol samting we yu lanem, mo yu wantem tumas blong talemaot long ol narafala!—Skelem wetem Jeremaea 20:9.

6. ?Yu lanem wanem long ekspiriens blong Ernest mo Rose?

⁶ Tingbaot ekspiriens blong wan brata we nem blong hem Ernest. Taem hem i gat ten yia, papa blong hem i ded. Ernest i talem se: “Mi stap tingting se: ‘?Hem i go long heven? ?O Bambae hem i ded blong olwe?’ Mi mi jalus long ol narafala pikinini we papa blong olgeta i laef yet.” Ernest i go oltaem long beregraon, i nildaon long gref blong papa blong hem, mo i prea se: “Plis God. Mi wantem save se papa blong mi i stap wea.” Seventin yia afta we papa blong Ernest i ded, hem i agri blong stadi Baebol. Hem i sapraes tumas taem hem lanem se ol dedman oli no save wan samting, i olsem we oli slip ded, mo Baebol i promes se long fiuja oli save laef bakegen. (Pri. 9:​5, 10; Wok 24:15) !Naoia, Ernest i faenem ansa blong ol kwestin we hem i bin gat blong plante yia! Hem i glad tumas long ol trutok blong Baebol we hem i lanem. Waef blong hem Rose, i joenem hem blong stadi mo hem tu i laekem ol samting we hem i stap lanem. Ale, long 1978 tufala i baptaes. Tufala i wantem tumas blong serem ol sas trutok ya long ol famle, ol fren, mo ol narafala we oli glad blong lesin. From samting ya, Ernest mo Rose i halpem bitim 70 man blong oli save Jehova mo oli baptaes.

7. ?Yumi mekem wanem taem yumi laekem ol trutok blong Baebol mo oli stap dip insaed long hat blong yumi? (Luk 6:45)

⁷ I tru se taem yumi laekem ol trutok blong Baebol, mo oli stap dip insaed long hat blong yumi, yumi no save stap kwaet. (Ridim Luk 6:45.) Yumi gat sem filing olsem tufala disaepol blong Jisas we tufala i talem se: “Mitufala i no save stop blong tokbaot samting we mitufala i luk mo mitufala i harem.” (Wok 4:20) Taem yumi laekem ol trutok blong Baebol, yumi wantem tumas blong talemaot long eni man.

YUMI PRIJ FROM YUMI LAVEM OL MAN

8. ?Wanem i pulum yumi blong talemaot gud nius long ol narafala? (Yu luk bokis ya “Lavem Ol Man—Mekem Disaepol.”) (Mo tu, yu luk pija.)

⁸ Yumi lavem ol man olsem Jehova mo Jisas. (Prov. 8:31; Jon 3:16) Yumi sore tumas long olgeta we oli “no gat God” mo oli “no gat hop.” (Efes. 2:12) Olgeta ya oli fesem plante problem long laef blong olgeta, mo maet oli harem olsem se oli stap draon long solwota. Be yumi gat laef jaket we i save sevem laef blong olgeta, hemia gud nius blong Kingdom blong God. From we yumi lavem olgeta mo yumi sore long olgeta, yumi mekem bes blong yumi blong talemaot gud nius long olgeta. Gud nius ya i givim hop long olgeta, i givhan long olgeta blong oli gat wan gudfala laef naoia, mo long fiuja oli save gat “laef ya we i prapa wan,” hemia laef we i no save finis long niufala wol.—1 Tim. 6:19.

9. ?Wanem woning we yumi stap talemaot long saed blong fiuja, mo from wanem? (Esikel 33:​7, 8)

⁹ Yumi lavem ol man taswe yumi wantem tumas blong givim woning long olgeta, se en blong rabis wol ya i stap kam klosap moa. (Ridim Esikel 33:​7, 8.) Yumi sore long ol neba blong yumi, mo long ol famle blong yumi we oli no bilif. Plante man tede oli no save se bambae i gat wan “bigfala trabol i kam we i neva hapen bifo, stat long taem we God i mekem wol ya kam kasem naoia. Mo neva bambae i gat wan trabol olsem bakegen.” (Mat. 24:21) Yumi wantem we oli save se samting ya bambae i hapen long dei blong jajmen. Fastaem, ol giaman skul bambae oli lus, biaen rabis wol ya bambae i lus long Amagedon. (Rev. 16:​14, 16; 17:​16, 17; 19:​11, 19, 20) Taswe, yumi prea se plante moa man bambae oli lesin long woning we yumi stap talemaot, mo oli kam joenem yumi long tru wosip naoia. ?Be olsem wanem long ol famle blong yumi, mo long ol man we oli no wantem lesin long woning ya naoia?

10. ?From wanem i impoten we yumi gohed blong givim woning long ol man?

¹⁰ Olsem we yumi bin tokbaot long las stadi, maet Jehova bambae i sevem ol man we oli stat blong bilif long hem, taem oli luk we Bigfala Babilon i lus. Sipos i olsem, naoia i moa impoten we yumi gohed blong talemaot woning ya long ol man. Tingbaot se: Samting we yumi talem long olgeta naoia, maet hemia nao samting we bambae oli tingbaot long taem ya. (Skelem wetem Esikel 33:33.) Maet bambae oli tingbaot woning we yumi stap talemaot long olgeta, mo bambae oli wantem joenem yumi long tru wosip bifo we i let. Maet sam man we oli no lesin long yumi naoia, bambae oli jenisim tingting blong olgeta afta we Bigfala Babilon i lus. Sem mak olsem gad ya long Filipae we i jenisim tingting blong hem afta we “graon i seksek bigwan.”—Wok 16:​25-34.

YUMI PRIJ FROM YUMI LAVEM JEHOVA MO NEM BLONG HEM

11. ?Olsem wanem yumi givim glori, ona, mo paoa blong yumi long Jehova? (Revelesen 4:11) (Mo tu, yu luk pija.)

¹¹ Impoten risen from wanem yumi talemaot gud nius, hemia se yumi lavem Jehova mo tabu nem blong hem. Yumi luk wok blong prij olsem wan rod blong presem God ya we yumi lavem hem. (Ridim Revelesen 4:11.) Yumi agri fulwan se i stret nomo we Jehova God i kasem glori, ona, mo paoa. Yumi givim glori long hem mo yumi ona long hem, taem yumi pruvum long ol narafala se hem nao i “mekem olgeta samting,” mo se yumi laef from we hem nao i givim laef long yumi. Yumi givim paoa blong yumi long hem, taem yumi yusum taem, paoa, mo ol gudfala samting we yumi gat long wok blong prij nomata wanem situesen yumi fesem. (Mat. 6:33; Luk 13:24; Kol. 3:23) Yes, yumi lavem God tumas, taswe yumi wantem tokbaot nem blong hem long ol narafala, mo talemaot se hem i wanem kaen God. ?From wanem?

12. ?Olsem wanem yumi mekem nem blong Jehova i stap tabu long wok blong prij?

¹² Yumi lavem Jehova taswe yumi wantem mekem nem blong hem i stap tabu. (Mat. 6:9) Yumi wantem talemaot long ol man se tok we Setan i talem long saed blong Jehova i giaman. (Jen. 3:​1-5; Job 2:4; Jon 8:44) Long wok blong prij, yumi wantem tumas blong talemaot long ol man we oli glad blong lesin se Jehova hem i hu, mo se hem i wanem kaen God. Yumi wantem we evriwan oli save se nambawan fasin blong Jehova hemia lav, mo se fasin blong hem blong rul i gud mo i stret, mo se Kingdom blong hem nomo bambae i finisim fasin safa, mo i mekem se olgeta famle long wol oli gat pis mo oli glad. (Sam 37:​10, 11, 29; 1 Jon 4:8) Taem yumi talemaot trutok long saed blong Jehova, yumi stap givhan blong mekem nem blong hem i stap tabu. Mo tu, yumi glad from we yumi stap wok folem nem we yumi karem. ?From wanem yumi talem olsem?

13. ?From wanem yumi praod blong karem nem ya Witnes blong Jehova? (Aesea 43:​10-12)

¹³ Jehova i jusumaot yumi blong yumi kam ol “witnes” blong hem (Ridim Aesea 43:​10-12.) Sam yia i pas, yumi kasem wan leta we i kam long Hed Kampani we i talem se: “Blong karem nem ya Witnes blong Jehova, hemia i wan ona we i bigwan bitim ol narafala ona we yumi save kasem.” ?From wanem yumi talem olsem? Traem tingbaot eksampol ya. Sipos yu nidim wan man blong i witnes blong yu long kot, bambae yu jusum wan man we yu save gud, yu trastem hem, mo we i gat gud nem we i mekem se narafala i save trastem ol tok blong hem. Taem Jehova i jusumaot yumi blong kam Witnes blong hem, hem i soemaot se hem i save gud yumi mo i trastem yumi se bambae yumi naf blong talemaot se hem nomo i tru God. Hemia i wan bigfala ona. Taswe, yumi wantem yusum evri janis we yumi gat blong talemaot nem blong hem long ol narafala, mo pruvum se evri tok we Setan i talem long saed blong Jehova oli giaman. Sipos yumi mekem olsem, yumi stap wok folem nem we yumi karem, hemia !Ol Witnes blong Jehova!—Sam 83:18; Rom 10:​13-15.

BAMBAE YUMI GOHED BLONG PRIJ KASEM EN

14. ?Wanem ol gudfala samting we bambae oli hapen i no longtaem?

¹⁴ !Yumi glad tumas blong luk ol samting we bambae oli hapen i no longtaem! Wetem help blong Jehova, yumi hop se bifo we bigfala trabol i stat, maet plante moa man bambae oli akseptem trutok. Mo tu, yumi glad se long taem blong bigfala trabol, maet plante moa man bambae oli kamaot long wol blong Setan mo oli joenem yumi blong presem Jehova.—Wok 13:48.

15-16. ?Bambae yumi gohed blong mekem wanem, mo yumi mekem olsem kasem wetaem?

¹⁵ Naoia we yumi stap wet blong taem ya i kamtru, yumi gat wan impoten wok blong mekem. Wan wok we bambae yumi neva mekem bakegen samtaem, hemia blong talemaot gud nius blong Kingdom blong God long olgeta ples long wol. Long semtaem, yumi mas gohed blong givim woning long ol man. Ol man oli mas save se en blong rabis sistem blong wol ya i stap kam klosap tumas. Biaen, taem dei blong jajmen i kamtru, bambae oli save se mesej we yumi stap talemaot i kam long Jehova.—Esik. 38:23.

¹⁶ ?Yumi gat strong tingting blong mekem wanem? From we yumi laekem gud nius, yumi lavem ol man, mo antap moa yumi lavem Jehova mo nem blong hem, bambae yumi wantem tumas, yumi gat strong tingting, mo yumi gohed blong wok strong long wok blong Jehova gogo kasem we hem i talem se: “!I naf!”