Kasem Gudfala Frut Taem Yumi Stadi Long Revelesen Buk
1 “Olgeta evriwan we oli harem tok ya, oli mas talem olsem tu, se ‘Yu kam.’ Yufala we i tosta, yufala i kam. Yufala we i wantem, yufala i kam tekem wora ya blong laef, we i olsem presen blong yufala.” ?Gudfala toktok i kamaot long wea? Long buk ya Revelesen—Kolosap I Kasem Nambawan En Blong Hem! ?I tru se buk blong Revelesen, i givim wan hapi en long Baebol? !Yes! Stamba tok long saed blong hapi i kamaot klia nomo long buk ya. (Rev. 22:7) Taswe, i gud tumas blong stadi long haf ya blong Tok blong God long Buk Stadi. Stadi ya bambae i leftemap tingting blong yumi bigwan. ?Bambae yu joen long stadi ya evri wik blong haremgud long hem? ?From wanem i impoten blong mekem olsem?
2 Long Revelesen 1:3, aposol Jon i talem se: “Man we i ridimaot tok ya we God i givim, hem i save harem gud. Mo olgeta we oli harem tok ya, mo oli holem long tingting blong olgeta, olgeta ya tu bambae oli save harem gud, from we taem blong ol samting ya i kam klosap finis.” Olgeta Kristin wanwan oli mas lesingud taem Jeova i tijim olgeta tru long Tok blong hem, mo tru long ol buk long saed blong Baebol we “slef we i stret mo waes” i givim. (Mat. 24:45, NW; Aes. 48:17, 18) Hemia i tru tumas long saed blong buk ya Revelesen. ?Olsem wanem yu yu save kasem gudfala frut taem yu stadi long buk ya?
3 Reregud Blong Ansa: Makemaot taem evri wik blong rerem stadi ya. Ridim ol wanwan paragraf. Tingbaot ol wanwan kwestin. Makem ol ansa long buk blong yu. Ol vas we oli kamaot stret long Baebol, oli stap long raeting we i blak. Ridimgud ol vas ya. Long saed blong ol vas we oli no raetem ol tok blong olgeta long paragraf, jekem olgeta long Baebol, blong faenemaot olsem wanem oli joen wetem stadi ya. Tingting dip long wanem we yu stap lanem. Ale biaen, tokbaot ol samting ya long buk stadi blong yu.
4 Brata we i lidim buk stadi i mas givhan long olgeta we oli joen long miting ya blong oli yusum gud Baebol, mo blong oli luksave olsem wanem stadi ya i save givhan long laef blong olgeta. Sipos yu yu faswan blong ansa long wan kwestin, i gud blong talem wan ansa we i klia mo i go stret long kwestin ya. Sipos wan man i mekem olsem finis, yu save ademap sam moa samting long saed blong poen ya. Maet yu save soem olsem wanem wan impoten vas i sapotem stamba tok. Traem givim ansa long prapa toktok blong yu, mo haremgud blong joen long miting ya.
5 I gud we yumi glad tumas blong stadi tugeta long ol nambawan tok we i stap long buk blong Revelesen. !Stadi ya bambae i leftemap tingting blong yumi blong laef evri dei wetem wan tingting we i glad, mo wet long dei blong Jeova blong sevem man!—Rev. 1:1.