Ol Miting Blong Kingdom Wok

Wik We i Stat Long Julae 8

Singsing 201

15 menet: Lokol mesej. Jusum sam Advaes long Kingdom Wok blong Yumi. Yusum ol advaes long pej 6 blong mekem tu pleplei blong seremaot Wajtaoa blong Julae 15 mo Wekap! (Franis/Inglis) blong Julae 22. Long tufala pleplei ya, soem tu defren rod blong ansa long tok we man i save talem blong blokem yumi se: “Mi mi Kristin finis.”—Lukluk Reasoning buk, pej 19.

10 menet: Ansa Long Wan Kwestin. Wan elda i givim tok ya, mo i soemaot olsem wanem blong folem advaes ya long ples blong yumi.

20 menet: Rere Blong Tekem Evri Janis Blong Prij. Kwestin mo ansa long pej 89 mo 90 blong buk ya Minista Wok Blong Yumi. Yusum advaes long fas pej blong pepa we i stap insaed long Kingdom Wok blong Yumi, Jenuware 2002, ale mekem tu no tri pleplei blong soemaot olsem wanem blong tekem janis blong prij long wan strenja, wan man we i stap long haos klosap, wan famle, no wan fren.

Singsing 139 mo laswan prea.

Wik We i Stat Long Julae 15

Singsing 144

10 menet: Lokol mesej. Ripot blong ol kaon.

15 menet: Lokol nid.

20 menet: Ol Gudfala Risen Blong Yusum Baebol Long Wok Blong Prij. Wan tok wetem kwestin mo ansa. Jisas i save gud Baebol mo i yusum oltaem long wok blong hem blong tijim ol man. (Luk 24:27, 44-47) Hem i no tijim ol man long samting we i kamaot long prapa tingting blong hem. (Jon 7:16-18) I impoten we yumi tu yumi yusum Tok blong God. Tok ya i gat moa paoa i bitim eni samting we yumi save talem. (Jon 12:49, 50; Hib. 4:12) Ol tok blong Baebol we i leftemap tingting mo i givim gudfala promes blong fiuja, i pulum ol man we hat blong olgeta i stret. Putum wan mak blong ridim wan vas blong Baebol, no bitim wan vas, long evri man we yu storian long hem. Makem gud se long manis ya, long ol fastok blong seremaot ol magasin, i gat wan vas we yumi save yusum. Askem samfala long kongregesen blong talemaot olsem wanem oli stap yusum Baebol long wok blong prij, mo wanem we fasin ya i mekem long olgeta mo long ol man we oli storian long olgeta.

Singsing 215 mo laswan prea.

Wik We i Stat Long Julae 22

Singsing 47

12 menet: Lokol mesej. Wan papa no mama wetem pikinini blong hem, tufala i yusum advaes long pej 4 blong mekem tu pleplei blong seremaot magasin blong Ogis 1 mo Ogis 8 (Franis/Inglis). Wan i yusum Wajtaoa mo narawan i yusum Wekap! Leftemap tingting blong ol papa mama blong trenem ol pikinini blong olgeta long wok blong prij.

18 menet: “Wan Spesel Taem Blong Leftemap Tingting.” Wan tok. Pulum evriwan blong gat tangkiu from distrik asembli mo mekem se oli wantem joen long hem. Talem long evriwan blong stap long olgeta haf blong asembli ya, stat long Fraede moning go kasem Sande aftenun.

15 menet: Kasem Save Filing Blong Narafala—Stamba Blong Kaen Fasin Mo Sore. Wan elda i mekem tok ya long Wajtaoa blong Eprel 15, 2002, pej 24-27.

Singsing 61 mo laswan prea.

Wik We i Stat Long Julae 29

Singsing 54

10 menet: Lokol mesej. Talem long ol pablisa blong putum ripot blong prij blong manis Julae.

10 menet: “Program Blong Nekiswan Seket Asembli.” Wan tok. Talemaot stret dei blong nekiswan seket asembli. Talem long evriwan blong oli kam mo lesin gud long asembli ya. Leftemap tingting blong ol pablisa we oli no baptaes yet blong oli traehad blong kam naf blong tekem baptaes. Mekem wan spesel traehad blong singaot ol Baebol stadi blong yumi.

25 menet: “Yumi Joen Olsem Wan Bodi Nomo.”a Long haf 3, tokbaot sam poen long Wekap! (Franis/Inglis) Eprel 22, 2000, pej 9 mo 10. Long haf 4, tokbaot sam poen long Wajtaoa Eprel 1, 1995, pej 16 mo 17, haf 4 kasem 6.

Singsing 81 mo laswan prea.

Wik We i Stat Long Ogis 5

Singsing 38

12 menet: Lokol mesej. Talemaot ol spesel plan blong prij long Ogis 15.

18 menet: “Kasem Ol Samting We Yu Nidim Long Saed Blong Spirit.” Wan tok wetem kwestin mo ansa. Tokbaot from wanem yumi evriwan i mas lesin gud long asembli. Makem gud se yumi no lesin nomo, be yumi mas mekem samting we yumi lanem i wok long laef blong yumi. Leftemap tingting blong evriwan blong oli raetem ol smosmol not. Askem long samfala blong talemaot olsem wanem asembli las yia i bin givhan long olgeta.

15 menet: “Klos Mo Hea Blong Yumi i Mas Stret.”b Wan elda i mekem haf ya. Bambae hem i ridim ol wanwan paragraf afta we hem i tokbaot wetem kongregesen. Givhan long evriwan blong luksave from wanem i impoten blong mekem klos mo hea blong olgeta i stret long fes blong ol man.

Singsing 184 mo laswan prea.

[Ol futnot]