Wan Wok We i Nidim Tingting Daon
1 Tok blong God i givim advaes ya se yumi mas mekem ‘tingting blong yumi i stap daon, yumi no givimbak, . . . be yumi mas askem long God blong hem i mekem i gud long ol man.’ (1 Pita 3:8, 9) Advaes ya i stret long wok blong prij. Yes, Kristin wok blong prij i save soemaot sipos yumi gat tingting daon no nogat.
2 Tingting daon i save halpem yumi blong gohed nating sipos i gat sam samting we oli mekem yumi harem nogud. Taem yumi prij, yumi go long ol man we yumi no save olgeta mo oli no singaot yumi blong kam, taswe yumi save se sam long olgeta bambae oli no glad. I nidim tingting daon blong gohed long wok blong prij taem man i no mekem i gud long yumi. !Long wan teritori we ol man blong hem oli strong tumas, tufala paenia sista i go long evri haos wanwan, gogo tu yia i pas, be i no gat wan man i openem doa long tufala! Nating se i olsem, tufala i gohed, mo tede i gat tu kongregesen long ples ya.
3 ?Olsem Wanem Taem Man i Tok Nogud Long Yumi?: Tingting daon bambae i halpem yumi blong folem fasin blong Jisas taem ol narafala oli no kaengud mo no soem respek long yumi. (1 Pita 2:21, 23) Long wan haos, wan sista i mitim wan woman we i swea long hem, mo biaen hasban blong woman ya tu i tok strong long sista ya se i mas aot long yad blong olgeta. Sista ya i smael nomo mo i talem se hem i hop we nekis taem bambae hem i save storian wetem tufala. Man ya wetem woman blong hem, tufala i sek long fasin blong sista ya. Ale, nekis taem we wan Witnes i pas long haos blong tufala, tufala i lesin long hem mo tufala i agri blong kam long wan miting long Haos Kingdom. Sista ya we tufala i bin sakemaot hem, i stap long miting ya mo i kam sekhan long tufala. Hemia i givim gudfala witnes long tufala ya. Yumi save mekem sem mak. Yumi save kwaetem ol man we maet fastaem oli no wantem lesin, sipos yumi ‘toktok gud long olgeta mo ona long olgeta.’—1 Pita 3:15, 16a; Prov. 25:15.
4 Blokem Flas Fasin: Save we yumi gat long saed blong Baebol i no givim raet long yumi blong tingting se ol narafala oli daon moa long yumi, mo blong yumi toktok nogud long saed blong olgeta. (Jon 7:49) Tok blong God i givim advaes ya se yumi “no mas tok nogud long nem blong narafala man.” (Taet. 3:2) Taem tingting blong yumi i stap daon, olsem Jisas, yumi mekem ol man oli haremgud. (Mat. 11:28, 29) Mo taem yumi toktok long ol man wetem tingting daon, yumi pulum olgeta blong oli laekem ol tok we yumi stap talemaot.
5 Yes, tingting daon i save halpem yumi blong gohed long wok blong prij nating se teritori blong yumi i strong. Fasin ya i save kwaetem tingting blong ol man we oli kros, mo pulum olgeta blong lesin long tok blong Kingdom. Antap moa, fasin ya i save mekem Jeova i glad. ‘Hem i stap givhan long gladhat blong hem, long olgeta we tingting blong olgeta i stap daon.’—1 Pita 5:5.