Ol Miting Blong Kingdom Wok

PLIS TINGBAOT: Kingdom Wok Blong Yumi bambae i putum program blong ol Sevis Miting evri wik long hot taem. Be ol kongregesen wanwan oli save jenisim ol miting olsem oli nidim, blong mekem oli laenap wetem taem we bambae oli aot blong go long Distrik Asembli ya, “Leftemap Nem Blong God.” Sipos yufala i luk se i stret, tekem 15 menet long laswan Miting blong Kingdom Wok bifo long asembli, blong tingting bak long ol advaes long pepa we i stap long medel blong Kingdom Wok blong manis ya. Long program blong manis Oktoba, bambae i gat wan ful Miting blong Kingdom Wok we yumi save tingting bak long ol bigfala poen blong asembli. Blong reregud from miting ya, yumi evriwan i save raetem ol gudfala not long asembli, wetem wan lis blong ol poen we yumi wanwan i wantem mekem i wok long laef blong yumi mo long wok blong prij. Nao yumi save talemaot olsem wanem yumi stap folem ol advaes ya afta long asembli. Bambae olgeta evriwan long kongregesen oli glad blong harem olsem wanem ol tijing blong asembli oli stap givhan long yumi.

Wik We i Stat Long Julae 14

Singsing 56

10 menet: Lokol mesej. Sam Advaes long Kingdom Wok Blong Yumi. Yusum ol fastok we oli stap long pej 6 blong mekem tu pleplei. Tufala i soem olsem wanem blong seremaot Wajtaoa blong Julae 1 mo Wekap! blong Julae 8 long teritori blong yumi. Long tufala pleplei ya, pablisa i mas soemaot tugeta magasin, nating se hem i tokbaot wan nomo.

15 menet: ?Olsem Wanem Wosip Blong Jeova i Mekem Laef Blong Yumi i Moagud? Wan tok we kongregesen i save ansa long sam kwestin. Trufala wosip hemia rod blong gat wan laef we i hapi mo we i fulap long ol gudfala wok. (1) Hem i halpem yumi blong dil wetem ol problem mo wari blong laef. (Fil. 4:​6, 7) (2) Hem i pulum yumi blong wokem ol fasin we God i glad long olgeta. (2 Pita 1:​5-8) (3) Hem i halpem yumi blong yusum taem mo olting blong yumi long waes fasin. (1 Tim. 6:​17-19) (4) Hem i givim hop long fiuja. (2 Pita 3:13) (5) Hem i givhan long yumi blong frengud wetem Jeova. (Jem. 4:8) Soem olsem wanem ol man we oli no save Jeova mo we oli no stap mekem wok blong Jeova oli no gat olgeta samting ya.

20 menet: “Yumi Tangkiu Long God We i Soem Sore Long Yumi.”a Taem yu tokbaot paragraf 3, givim sam advaes olsem wanem blong statem wan rod magasin. Yusum ol eksampol we oli stap long Kingdom Wok Blong Yumi blong Oktoba 1998, pej 8. Askem wan no tu pablisa we oli nafgud, blong talem wanem rod we oli faenem se i givhan long olgeta blong statem ol Baebol stadi. Leftemap tingting blong evriwan blong oli putum mak ya blong statem mo mekem wan Baebol stadi.​—om pej. 87.

Singsing 176 mo laswan prea.

Wik We i Stat Long Julae 21

Singsing 184

10 menet: Lokol mesej. Ripot blong ol kaon.

15 menet: “Yumi Kam Wanples Blong Presem Jeova.”b Yusum ol kwestin we oli stap. Pulum tingting blong evriwan blong oli stap long evri dei blong asembli ya, stat long Fraede moning go kasem Sande aftenun. Makem bigfala poen ya se yumi mas mekem ol advaes we yumi kasem oli wok long laef blong yumi i bitim we yumi lesin nomo. Ridim toktok antap long saed blong plan we i stap blong Miting Blong Kingdom Wok long manis Oktoba. Talem long evriwan se i gud oli tekem sam not.

20 menet: “Yumi Glad Taem Yumi Joen Olsem Wan Grup Blong Prij.”c Taem yu tokbaot paragraf 3, yusum sam haf blong Ansa Long Wan Kwestin long Kingdom Wok Blong Yumi blong Septemba 2001. Askem sam kwestin long wan brata we i lukaot long wan buk stadi blong kongregesen. Askem long hem wanem plan we hem i mekem long saed blong prij long buk stadi blong hem mo olsem wanem plan ya blong prij tugeta i stap givhan long grup.

Singsing 201 mo laswan prea.

Wik We i Stat Long Julae 28

Singsing 45

8 menet: Lokol mesej. Talem long ol pablisa se oli mas givim ripot blong olgeta blong manis Julae. Yusum ol fastok long pej 6 blong mekem tu defren pleplei, we tufala i seremaot Wajtaoa blong Julae 15 mo Wekap! blong Jul./Sept. Long tufala pleplei ya, i gud we pablisa i holem tugeta magasin nating se hem i tokbaot wan nomo. Long wan long tufala pleplei ya, pablisa i save mekem olsem we hem i tekem janis blong prij.

17 menet: “Serem Ol Buk Long Teritori We Ol Man Oli Toktok Ol Defdefren Lanwis.”d Yusum ol kwestin we oli stap. Taem yufala i tokbaot paragraf 3, mekem wan sotfala pleplei. Long pleplei ya, pablisa i prij long wan man long lanwis blong man ya, we i no gat kongregesen yet i mekem miting long lanwis ya.​—km 7/02 pej 1 haf 4.

20 menet: “Soem Eksampol Taem Yu Jenis Gud Mo Mekem Ol Gudfala Wok.”e Wan elda bambae i mekem tok ya. Yusum ol kwestin we oli stap. Askem long wan brata we i save ridgud, blong hem i ridimaot ol paragraf 3 kasem 7.

Singsing 36 mo laswan prea.

Wik We i Stat Long Ogis 4

Singsing 178

8 menet: Lokol mesej. Talemaot wanem buk we bambae yumi seremaot long manis ya. Mekem wan sot pleplei blong soem wan rod blong seremaot buk ya.

12 menet: Lokol nid.

25 menet: “?From Wanem Yumi Lavem Olgeta Brata Blong Yumi Long Wol?” Go stret long ol kwestin we oli stap wetem haf ya long saed blong video kaset ya Our Whole Assocation of Brothers.

Singsing 49 mo laswan prea.

[Ol futnot]