Folem Stret Fasin Blong Jeova
1 “[Jeova] i laekem ol fasin we i stret.” (Sam 37:28) From samting ya, hem i talem se wol ya we i no gat stret fasin long hem i mas lus. Be hem i plan blong givim wan woning fastaem. (Mak 13:10) Woning ya i givim janis long ol man blong oli tanem tingting blong olgeta mo kasem laef. (2 Pita 3:9) ?Yumi stap traehad blong folem stret fasin blong Jeova? ?Fasin blong harem nogud mo fasin safa we ol man oli kasem i pusum yumi blong go talemaot hop blong Kingdom long ol narafala man? (Prov. 3:27) Sipos yumi laekem stret fasin, samting ya bambae i pusum yumi blong gat strong tingting blong prij.
2 Prij Long Enikaen Man: Taem yumi mekem i sem mak long evri man mo yumi talemaot stamba tingting blong God long evriwan, yumi stap “wokem stret fasin.” (Maeka 6:8, NW) Yumi mas blokem slak fasin ya blong yumi ol sinman, hemia blong jajem narafala from samting we yumi lukluk nomo. (Jem. 2:1-4, 9) Jeova “i wantem se olkaen man bambae oli sef, mo we oli kasem stret save long trutok.” (1 Tim. 2:4, NW) Tok blong God we i trutok i save mekem plante jenis i kamaot long laef blong ol man. (Hib. 4:12) Taem yumi luksave samting ya, bambae i pusum yumi blong go toktok long ol man wetem strong tingting, mo long olgeta tu we maet bifo oli no wantem lesin.
3 Wan sista we i wok long wan stoa i stap fraet long wan man we i stap kam evri taem long stoa from klos mo stael blong man ya i narakaen. Nating se i olsem, taem wan janis i kam ale, sista ya i traem blong storian long hem long saed blong promes blong God long wan Paradaes. Man ya i ansa kwiktaem se hem i no bilif long wan ples olsem mo se hem i wan hipi (hemia ol yangfala we oli agensem fasin blong laef long wol, oli traem leftemap pis mo lav, mo plante taem oli gat longfala hea) mo hem i stap tekem drag oltaem. Be sista ya i no lego. Wan dei, man ya i askem long sista ya se wanem tingting blong hem long saed blong longfala hea ya blong hem. Sista ya i eksplenem long hem wanem we Baebol i talem long saed ya. (1 Kor. 11:14) !Sista ya i sapraes blong luk se, long nekis dei, man ya i kambak wetem hea we i sot mo hem i sevem gud mustas blong hem i klin gud! Hem i askem wan Baebol stadi mo sista ya i mekem plan wetem wan brata we i glad blong mekem stadi blong man ya. Man ya i gohed gud mo biaen hem i givim laef blong hem long Jeova mo tekem baptaes. Olsem man ya, tede plante man we oli mekem wok blong Jeova oli gat bigfala tangkiu from fasin ya blong ol Witnes we oli mekem i sem mak long olgeta man mo from bigfala traehad we oli mekem blong talemaot mesej blong Kingdom long olgeta.
4 I no longtaem bambae Jeova i ravemaot ol fasin we i no stret long ful wol. (1 Pita 3:10, 13) Long sotfala taem ya we i stap, yumi mas folem stret fasin blong Jeova. Yumi givim evri janis long ol man blong oli save sef taem Jeova i spolem wol ya blong Setan, we i no gat stret fasin long hem.—1 Jon 2:17.