Advaes

◼ Buk we yumi seremaot long manis Jenuware: My Book of Bible Stories. Sipos no yu save seremaot buk ya Learn From The Great Teacher. Sipos man i talem se hem i no gat pikinini, soemaot buklet ya Wanem long hem. Traehad blong statem Baebol stadi wetem buklet ya. Februari: Revelesen​—Kolosap i Kasem Nambawan En Blong Hem! Maj: Save Blong Lidim Yu Long Laef We i No Save Finis, mo traehad blong statem ol Baebol stadi. Epril: Wajtaoa mo Wekap! Taem yumi visitim bakegen ol man we oli intres, yumi no mas fogetem olgeta ya tu we oli stap kam long ol Memoriol mo long ol narafala spesel miting blong yumi. Traem givim Wosipim Trufala God buk long olgeta. Bambae yumi traem bes blong yumi blong statem Baebol stadi wetem olgeta ya, antap moa sipos oli bin stadi finis long Save buk mo buklet Wanem.

◼ Bifo long Maj 6, ating long manis Februari finis, ol seket elda bambae oli stat givim niufala pablik tok ya, “Yumi Mas Gat Waes Long Wol Ya We i Krangke Nomo.”

◼ Memoriol long yia ya, hemia long Tasde, Maj 24, afta we san i godaon. Ol kongregesen oli mas mekem ol stret plan from. Tok i save stat bifo we san i godaon, be yumi mas pasem bred mo waen afta we san i godaon. Faenemaot wanem taem stret we san i godaon long ples blong yufala. I moagud sipos ol wanwan kongregesen oli gat prapa Memoriol blong olgeta, be maet samtaem i no gat rod blong mekem olsem. Sipos plante kongregesen oli stap yusum semfala Haos Kingdom, maet sam long ol kongregesen ya i save faenem wan narafala ples blong mekem Memoriol. Taem tu kongregesen i mekem Memoriol long semfala Haos Kingdom, i moagud se i gat 40 menet bitwin long tufala Memoriol ya, blong givim taem long evriwan blong storiangud mo haremgud tugeta. Yumi mas tingbaot tu, ol trak we bambae oli kam, mo ples blong putum ol trak, mo olsem wanem blong lego mo pikimap ol pasenja. Ol elda oli mas tekem disisen se wanem plan nao i moagud blong folem long ples blong yufala.