Kipim Gud
Sam Fastok Blong Seremaot Ol Buklet
Ol fastok we oli stap long pepa ya oli blong givhan long yu blong mekemrere wan storian blong seremaot ol buklet. Yu save jenisim ol fastok ya blong mekem oli laenap wetem ol man we yu faenem. Yu save yusum sam narafala fastok tu. Yu save yusum ol fastok ya olsem wan eksampol blong mekem rere sam narafala fastok we oli no stap long haf ya.—Lukluk Kingdom Wok Blong Yumi blong Jenuware 2005, pej 8.
Wanwan fastok long pej ya oli gat (1) wan kwestin we i pulum man blong storian, (2) wan haf insaed long buklet we yu save yusum blong storian, mo (3) wan vas we yu save ridim, we i laenap wetem storian ya. Yu save yusum ol prapa tok blong yu blong finisim storian ya, blong mekem se i laenap wetem wanwan man.
!Yu Save Kam Fren Blong God!
“?Samtaem yu stap tingbaot se yu save kam fren blong God, Man ya we i hae moa long olgeta narafala long heven mo wol?”—pej 1, haf 1, 2; Jemes 2:23.
Speret Blong Ol Dedman—?Oli Save Halpem Yu No Spolem Yu? ?Oli Rili Stap?
“Plante man oli gat tingting ya se man i gohed blong laef afta we i ded. ?Yu yu ting se spirit blong dedman i gohed blong laef mo i save mekem man i sik no i kasem narafala trabol?”—pej 5, haf 2-6; Prija 9:5.
The Divine Name That Will Endure Forever (Franis/Inglis)
“Bighaf blong yumi i save prea ya we i stat olsem ‘Papa blong mifala. Nem blong yu i tabu.’ (Mat. 6:9) ?Be, yu yu save se sipos yumi wantem we God i sevem yumi, yumi mas save nem ya?”—pej 28, haf 1; Rom 10:13.
Taem Wan We Yu Laekem Hem Tumas i Ded
“Tede, plante milian man we oli lusum wan fren no famle blong olgeta, oli haremgud bakegen mo oli kasem hop taem oli ridim buklet ya we mifala i seremaot. ?Samtaem yu yu stap askem se ol dedman oli gat wanem hop?”—pej 27, haf 3; Jon 5:28, 29.
“?Samtaem yu yu tingbaot olsem wanem blong leftemap tingting blong wan man we i lusum wan famle no fren blong hem long ded?”—pej 20, haf 1; Prov. 17:17.
?Wanem Bambae i Hapen Long Yumi Taem Yumi Ded?
“Taem olgeta we yumi laekem olgeta tumas oli ded, i stret nomo we yumi wantem save se oli stap long weples, mo sipos yumi save luk olgeta bakegen samtaem. ?Yu yu stap tingbaot ol kwestin ya?”—Ol kwestin long laswan pej; Job 14:14, 15.
Should You Believe in the Trinity? (Franis/Inglis)
“Ol man oli gat plante defren tingting long saed blong God, se hem i olsem wanem. ?Yu yu ting se samting we yumi bilif long hem i impoten?”—pej 3, haf 3, 7-8; Jon 17:3.
!Yu Save Harem Gud Blong Olwe Long Wol!
“Plante man oli ting se oli mas go long heven blong oli harem gud long laef we i no save finis. ?Be wanem tingting blong yu long laef blong olwe long wol ya?”—Pija long faswan pej; Rev. 21:4.
Gavman Ya We Bambae i Mekem Paradaes
“Plante man oli wantem tumas se i gat wan rod blong stretem ol problem we yumi stap fesem tede. ?Yu yu ting se bambae i gat wan gavman samtaem we i naf blong stretem ol problem ya?”—pej 3, haf 1; Mat. 6:9, 10.
Sam Fastok Blong Seremaot—?God i Rili Kea Long Yumi?
Afta we yu tokbaot wan trabol we i kamaot i no longtaem, yu save talem se:
“?Samtaem yu stap askem from wanem God i letem ol man oli safa sipos hem i rili kea long yumi? [Letem man i ansa.] Buklet ya i givim wan gudfala ansa long kwestin ya, mo hem i soemaot wanem samting bambae God i mekem i no longtaem. [Soemaot ol pija long pej 27, mo ridim Ol Sam 145:16 we i stap long haf 22.] ?Olsem wanem God bambae i tekemaot olgeta samting we oli stap mekem ol man oli safa tede? Mi wantem tokbaot poen ya long nekis taem we bambae mi kam luk yu.” Soemaot buklet, mo mekem plan blong gobak.
Taem yu gobak, yu save talem se:
“Las taem, yumitu bin ridim vas ya. [Ridim no tokbaot Ol Sam 145:16.] Biaen, mi bin askem kwestin ya: ?Olsem wanem God bambae i tekemaot olgeta samting we oli stap mekem ol man oli safa tede?” Askem long hem blong i karem buklet blong hem. Biaen, openem i go long pej 27-28, mo tokbaot haf 23-25. askem long hem sipos i wantem stadi Baebol, no mekem plan blong tokbaot haf 26 mo 27 long nekis visit.
**********
Wan yangfala pablisa i save talem olsem:
“Plante yangfala olsem mi, oli wari se long 10 no 15 yia, wol bambae i olsem wanem. ?Yu yu ting se bambae laef i olsem wanem long ol yia ya? [Letem man i ansa.] Ol trabol we yumi luk tede, oli soemaot se yumi stap laef long ol las dei. [Ridim 2 Timoti 3:1-3.] Buklet ya i givim ansa long ol kwestin ya. [Ridim ol kwestin we oli stap long fored blong buklet, mo givim buklet ya.] Taem bambae mi kambak, sipos yu gat smol taem, mi wantem serem wan gudfala tingting wetem yu long saed blong taem ya we bambae sik mo fasin blong kam olfala oli finis.” Mekem plan blong kambak.
Taem yu gobak, yu save talem se:
“Lastaem, mi bin talem se mi wantem serem wan gudfala tingting wetem yu long saed blong taem ya we bambae sik mo fasin blong kam olfala oli finis. Poen ya i stap long ples ya.” Askem hem blong i karem buklet blong hem, ale ridim mo tokbaot haf 6 mo 7 long pej 23-24. Mekem plan blong tokbaot haf 8 mo 9 long nekis taem.
**********
Sipos wan pablisa i prij wetem wan pikinini, hem i save talemaot nem blong tufala, mo talem se:
“Sipos yu agri, ________ i wantem ridim wan vas long yu. [Pikinini i ridim Ol Sam 37:29 mo i talem smol tok.] Buklet ya i tokbaot olsem wanem God bambae i mekem stamba tingting blong hem long saed blong ol man mo wol ya i kamtru. [Soem ol pija long pej 24-27.] Taem bambae mitufala i kambak, mi wantem soemaot wan nambawan promes we Baebol i talem long saed blong laef bakegen.” Givim buklet, mo mekem plan blong kambak.
Taem tufala i gobak, maet pablisa ya i save talem se:
“Lastaem we mi bin kam, yumi bin ridim Ol Sam 37:29, mo mi bin talem se mi wantem soemaot long yu wanem samting Baebol i talem long saed blong laef bakegen. Makem wanem samting oli raetem long ples ya.” Askem long hem blong i karem buklet blong hem, mo tokbaot haf 12-14 long pej 24-25. Askem sipos hem i wantem stadi, no mekem plan blong kambak mo tokbaot haf 15-16.