Leta Blong Hed Kampani

“Prea blong mi, we God, Papa blong yumi, wetem Jisas Kraes, Masta blong yumi, tufala bambae i stap givhan long yufala long gladhat blong tufala, tufala i putum pis i stap wetem yufala.” Hemia fastok we Pol i yusum long ol leta we hem i raetem i go long ol kongregesen. Ol tok ya oli soemaot wanem samting we mifala i wantem se i mas kamtru long yufala.​—Efes. 1:2.

!Yumi gat bigfala tangkiu from gladhat we Jeova i soemaot tru long ransom sakrefaes blong Jisas Kraes! From ransom ya, God i save agri long yumi mo yumi save stanap long fored blong hem. Yumi neva save kasem mak ya long prapa paoa blong yumi, nomata sipos yumi gohed strong blong stadi Baebol, prij long saed blong gud nius, no yumi mekem ol narafala gudfala wok. Jeova i fogivim ol sin blong yumi mo i givim laef we i no save finis long yumi. Hem i no givim ol samting ya olsem pei from ol traehad we yumi mekem, be olsem presen we i soemaot gladhat blong hem tru long Jisas Kraes.​—Rom 11:6.

Pol i raet i go long ol Kristin i se: “From we mifala i stap joen blong wok wetem God, mifala i talem long yufala . . . se God i givhan long yufala finis, long gladhat blong hem. Plis yufala i no letem gudfala wok ya blong hem i go blong nating nomo. I gud yufala i harem tok blong hem we i talem se, ‘Long taem ya blong givhan long man, mi mi harem yufala. Long dei ya blong sevem man, mi mi givhan long yufala.’ Yufala i mas harem tok ya. Naoia i taem blong God i givhan long man. Tede i dei blong hem i sevem man.” Long faswan handred yia, bifo we bigfala trabol i kasem Jerusalem, i bin gat wan ‘taem blong givhan long man.’ Ol man we hat blong olgeta i stret we oli laekem Jeova, oli sef long saed blong spirit. Mo samting ya i mekem se, long yia 70 K.T., olgeta we oli stap tru long Jeova oli no ded, from we oli ronwe long Jerusalem bifo we ami blong Rom i kam spolem taon ya.​—2 Kor. 6:​1, 2.

Tede tu, yumi laef long wan ‘taem blong givhan long man’ mo long “dei blong [God] i sevem man.” Olgeta we Jeova i agri long olgeta blong oli kam ol man blong wok blong hem mo we oli stap sef long saed blong spirit, oli gat hop ya blong laef tru long ‘Bigfala Dei blong Jeova’ we i stap kam klosap moa.​—Sef. 1:​14, NW.

Dei blong Jeova we i stap kam i mekem se yumi gat wan bigfala wok blong mekem. Yumi mas givim woning long ol man long saed blong dei ya mo givhan long olgeta we hat blong olgeta i stret, blong oli kasem gladhat blong Jeova, nao oli sef. Pol i kasem savegud se wok ya i impoten tumas. Hem i raetem se: “Sipos mi no moa talemaot gud nius ya, hemia bigfala trabol blong mi ya, bambae mi harem nogud tumas from.” Mo tu, hem i talemaot filing blong hem tru long ol tok ya: “Mi mi harem se God i givim wok ya long mi we mi mas mekem blong givhan long olgeta man, nating we oli man blong taon, no oli man blong bus, no oli man we oli gat save, no oli man we oli no save samting. From samting ya, mi mi wantem tumas blong talemaot gud nius ya long yufala tu.”​—1 Kor. 9:16; Rom 1:​14, 15.

Jeova bambae i askembak kaon long yumi sipos yumi no mekem impoten wok ya blong givim woning long ol man blong sevem laef blong olgeta. Yumi save long tok ya we Jeova i talem long profet Esikel, se: “Man blong wol ya. Mi mi mekem yu yu kam wan wajman blong lukaot long ol laen blong Isrel. Bambae yu tekem strong tok ya blong mi we mi talem long yu, yu go talem long olgeta blong wonem olgeta. Sipos mi talemaot se wan man nogud bambae i ded, be yu yu no go tok long hem, blong hem i jenisim fasin blong hem blong i sevem laef blong hem, man ya bambae i ded from ol sin ya blong hem, be ded blong hem bambae i fol blong yu.”​—Esik. 3:​17, 18.

Laef blong ol lasdei ya i had tumas. I no isi blong skelemgud ol defren wok we yumi mas mekem long famle, long wok blong yumi blong kasem vatu, long kongregesen, mo long wok blong prij. Antap long hemia, plante long yufala oli mas laef wetem sik, tingting we i foldaon, fasin blong kam olfala, mo fasin agens tu. Bighaf blong yufala i “stap karem ol hevi samting.” Mifala i wantem soemaot sore blong mifala long yufala, we i laenap wetem tok ya blong Jisas, se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.” (Mat. 11:28) Wetem lav, mifala i presem yufala evriwan we i stap traehad blong stap tru long Jeova blong mekem wok blong hem, nomata we yufala i fesem ol traem we oli bigwan no smol.

Frut we i kamaot from we yufala i gat strong tingting blong mekem wok blong prij mo tijim ol man mo from blesing blong Jeova, hemia se long olgeta ples long wol i gat klosap 4,762 man we oli baptaes evri wik. Long laswan seves yia, oli stanemap 1,375 niufala kongregesen. Mifala i hop mo prea se niufala buk ya ?Wanem Samting We Baebol i Rili Tijim?, we i stap finis long bitim 120 lanwis, bambae i givhan long plante milian man blong oli haremgud long gladhat mo pis blong Jeova long ‘dei ya blong God blong sevem man.’

Yufala i mas save se Hed Kampani i lavem yufala mo se mifala i stap prea from yufala. Mifala i talem tangkiu long yufala tu from ol prea we yufala i mekem blong mifala.

Ol brata blong yufala,

Hed Kampani blong ol Witnes blong Jeova