Ol Miting We Oli “Mekem Yumi Strong Blong Lavem Ol Man, Mo Blong Mekem Ol Gudfala Fasin”

!I STRET nomo we ol Kristin oli mekem miting oltaem blong wosip long God mo blong kasem kakae long saed blong spirit! Yumi evriwan i nidim blong kam wanples mo blong lesin long Tok blong God. Olsem nao, yumi save lanem ol samting we hem i wantem yumi blong mekem, mo olsem wanem blong mekem wok blong hem. Ol yangfala mo ol olfala tu oli mas joen long ol miting, olsem neson blong Isrel bifo. God i givim tok long Moses blong i talem long olgeta, wanem blong mekem evri seven yia long saed blong Lafet blong ol Wansaed Haos. Hem i se: “Long taem ya, bambae yufala i mas singaot olgeta man wetem ol woman oli kam wanples, wetem ol pikinini mo ol strenja ya we oli stap long ol ples blong yufala, blong olgeta evriwan oli save harem tok ya, mo blong oli save lanem fasin ya blong ona long Hae God, mo blong oli save obei long olgeta toktok blong hem oltaem.”​—Dut. 31:12.

Sem mak tede, ol man blong God oli mekem miting blong oli save lesin, lanem plante samting, mo blong ‘Jeova i tijim olgeta.’ (Aes. 54:13) Taem ol man Isrel bifo oli joen wanples blong wosip, hemia i wan taem blong glad. Tok blong Deved i soemaot samting ya i se: “Taem ol man oli talem long mi se ‘Yumi go long haos blong Hae God,’ mi mi glad tumas.” (Sam 122:1) Aposol Pol i tokbaot wan narafala risen from wanem yumi glad taem yumi joen wanples wetem ol narafala Kristin long ol miting. Hem i raetem se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin.” (Hib. 10:24) Ol miting blong kongregesen oli givim janis long ol faswan Kristin blong oli savegud olgeta, mo blong oli leftemap tingting blong olgeta, mo blong oli kam strong moa taem oli kampani wetem ol Kristin brata mo sista blong olgeta. Tede tu, ol Witnes blong Jeova oli glad tumas taem oli kam wanples blong wosip long Jeova.

OL MITING BLONG KONGREGESEN

Baebol i talem se i impoten we yumi joen wanples blong mekem wosip long Jeova mo blong presem hem. (Sam 26:​8, 12; Mat. 18:20) Ol man we oli kasem trutok long Pentekos long yia 33 K.T., oli luksave se ol miting oli impoten. Oli gohed oltaem blong lesin long ol tijing we ol aposol oli givim long olgeta, mo “evri dei, olgeta oli stap joen wanples long haos blong God.” (Wok 2:​42, 46) Biaen, taem ol Kristin oli mekem miting blong wosipim God, oli ridimaot ol hanraet blong tok blong God, mo oli ridimaot ol leta we oli kasem long ol aposol mo long sam narafala disaepol. (1 Kor. 1:​1, 2; Kol. 4:16; 1 Tes. 1:1; Jem. 1:1) Taem oli joen wanples long kongregesen, oli prea tugeta. (Wok 4:​24-29; 20:36) Oli talemaot sam stori blong misinari wok blong olgeta. (Wok 11:​5-18; 14:​27, 28) Oli tokbaot ol tijing blong Baebol mo ol profet tok we God i givim. Oli kasem advaes long saed blong ol gudfala fasin blong ol Kristin man mo fasin blong fasgud long God. Mo tu, ol miting oli pulum olgeta blong oli gat strong tingting blong talemaot gud nius.​—Rom 10:​9, 10; 1 Kor. 11:​23-26; 15:58; Efes. 5:​1-33.

Long plante fasin, ol Kristin miting blong yumi tede oli sem mak long ol miting long taem blong ol aposol. Yumi stap folem tok blong Hibrus 10:​25, we i talem se: “I nogud yumi lego ol miting blong [kongregesen], olsem we sam long yumi oli mekem finis. Oltaem yumi mas stap toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.” Yumi stap finis long ol las dei blong rabis fasin ya blong wol, mo laef i had. From samting ya, yumi nidim tumas ol miting we oli leftemap tingting blong yumi, nao yumi save stap strong long saed blong spirit, mo holem strong long ol Kristin fasin. (Rom 1:​11, 12) Olsem long taem blong Pol, ol Kristin tede tu oli stap laef long medel blong ol man nogud mo ol fasin nogud blong wol ya. Yumi livim finis olgeta fasin we oli no stret long fes blong God mo ol samting blong wol ya. (Fil. 2:​15, 16; Taet. 2:​12-14) I no gat wan narafala kampani blong man long wol we i save mekem yumi harem gud olsem ol man blong Jeova. (Sam 84:10) Mo i no gat wan samting we i save givhan long yumi moa, i bitim Tok blong God we yumi harem long ol miting.

Jeova i stap givim fulap gudfala kakae long saed blong spirit. (Sam 145:​14, 15) Hem i yusum Jisas Kraes mo “slef ya we i stret mo waes” blong givim kakae ya long yumi long stret taem blong hem. (Mat. 24:​45, NW) ?Ol man we oli stap long ogenaesesen blong God oli kasem kakae ya olsem wanem? Wan rod, hemia tru long ol miting we kongregesen i mekem evri wik. Naoia yumi save tokbaot olgeta miting ya, mo olsem wanem oli “mekem yumi strong blong lavem ol man, mo blong mekem ol gudfala fasin.”

WAJTAOA STADI

Bigfala rod we Jeova i yusum blong givim kakae long saed blong spirit long ol man blong hem, hemia Wajtaoa i Talemaot Kingdom Blong Jeova. Sam haf blong Wajtaoa oli givim spesel tijing we i stanap long Tok blong God, tru long stadi we kongregesen i mekem evri wik. Taem kongregesen i stadi gud long Wajtaoa, ol save ya i wekemap tingting mo tajem hat blong ol memba blong kongregesen, mo i mekem olgeta oli kam strong moa.

Ol stadi long Wajtaoa, oli tokbaot ol defdefren samting. Plante taem oli tokbaot ol rul blong Baebol mo olsem wanem blong folem ol rul ya long laef blong yumi. Oli pulum ol Kristin blong stanap strong agensem “spirit we i kamaot long wol” mo ol doti fasin. (1 Kor. 2:12) Wajtaoa i givim moa save long yumi long ol tijing blong Baebol, mo ol niufala save long ol profet tok we Jeova i wantem talemaot mining blong olgeta long yumi. Olsem nao, yumi kasem save ol niufala trutok we oli kamaot mo yumi save gohed blong folem stret rod. (Sam 97:11; Prov. 4:18) Sipos yumi kam long Wajtaoa Stadi mo yumi givim ansa, hemia bambae i mekem se oltaem yumi putum tingting blong yumi i stap strong long niufala wol we Jeova bambae i mekem, ale bambae yumi haremgud from. (Rom 12:12; 2 Pita 3:13) Wajtaoa Stadi i halpem yumi blong soemaot frut blong spirit long laef blong yumi mo blong wantem mekem wok blong Jeova oltaem wetem strong tingting. (Gal. 5:​22, 23) Wajtaoa Stadi i mekem bilif blong yumi i strong, nao yumi naf blong stanap strong tru long ol traem, mo blong putum wan gudfala ‘fandesen blong laef blong yumi’ long fiuja, hemia “laef ya we i prapa wan.”​—1 Tim. 6:19; 1 Pita 1:​6, 7.

I klia se ol save we yumi stadi long hem evri wik long Wajtaoa Stadi, oli impoten. Save ya i givhan long yumi blong gru long saed blong spirit, mo blong mekem ol trutok blong Baebol oli kam prapa bilif blong yumi, mo blong mekem laef blong yumi i laenap gud wetem ol tijing blong Baebol, mo blong halpem yumi blong gat wan tingting nomo wetem olgeta brata sista blong yumi long wol. ?Wanwan long yumi i save mekem wanem blong kasem gud ol nambawan kakae ya long saed blong spirit? Yu save reregud Wajtaoa Stadi fastaem, jekemap ol vas blong Baebol we oli no raetem fulwan long paragraf, mo givim ansa long Wajtaoa Stadi. Taem yu givim ansa, yu makem moa ol poen blong stadi long tingting blong yu, nao ol trutok ya bambae oli tajem hat blong yu. Taem ol narafala oli harem ansa blong yu, oli kasem paoa from ol tok we yu talemaot wetem bilif mo strong tingting. Sipos yu lesin gud long ol ansa blong ol narafala, bambae yu kasem ol gudfala samting long stadi blong Wajtaoa evri wik.

Wajtaoa Stadi i givhan long yumi blong stap strong long saed blong spirit mo strong long bilif. Yumi no mas tingbaot miting ya olsem samting we i no impoten tumas. Evriwan long kongregesen oli mas stap, oli no mas mestem impoten rod ya we Jeova i yusum blong mekem famle blong ol Kristin brata sista oli stap strong.

PABLIK TOK

Klosap oltaem, kongregesen i mekem se Pablik Tok i joen wetem Wajtaoa Stadi. Be Pablik Tok i defren long Wajtaoa Stadi. Long Wajtaoa Stadi oli askem ol kwestin we oli stap long Wajtaoa, mo olgeta long kongregesen oli givim ansa. Be Pablik Tok i wan tok we i stanap long Baebol. Tufala miting ya i givhan gud long ol niuwan mo ol narafala long kongregesen tu, blong oli kasem ol gudfala kakae we oli nidim long saed blong spirit.​—Wok 18:4; 19:​9, 10.

Sipos yumi singaot olgeta we oli intres long trutok mo ol narafala man tu blong oli kam long miting, hemia i save givhan bigwan long olgeta blong oli kasem ol stamba save blong Baebol. Pablik Tok i save halpem yumi evriwan blong yumi tingting oltaem long ol tijing we ol Kristin oli mas folem, mo i save pulum yumi blong yumi stanap strong long wok blong talemaot Kingdom.

Ol Pablik Tok oli tokbaot plante samting, olsem, ol tijing blong Baebol, ol profet tok, ol rul mo advaes blong Baebol long saed blong famle laef, mared, ol trabol we ol yangfala oli fesem, mo ol Kristin fasin. Sam Pablik Tok oli pulum yumi blong tingbaot ol gudfala samting we Jeova i bin wokem. Sam narafala tok oli long saed blong ol man long Baebol we oli gat strong bilif, oli no fraet, oli holemstrong long Jeova, mo oli soemaot olsem wanem yumi save folem fasin blong olgeta. Yes, Pablik Tok i rili wan gudfala miting we i givim save long yumi mo ol gudfala kakae long saed blong spirit.

Be sipos yumi wantem we Pablik Tok i halpem yumi fulwan, yumi mas kam oltaem long miting ya, lesingud long ol tok blong hem, jekem ol vas blong Baebol, mo ridim ol vas ya long semtaem we brata we i givim tok i ridim mo i eksplenem olgeta. (Luk 8:18) Fasin ya bambae i halpem yumi blong save gud weples blong faenem ol buk blong Baebol, mo bambae yumi kasem save moa long ol tok blong Baebol. Taem yumi pruvum finis ol samting we yumi harem long ol tok olsem, yumi mas mekem tingting blong yumi i strong blong folem ol tok ya mo mekem i wok long laef blong yumi.​—1 Tes. 5:21.

Sipos i gat plante brata blong mekem ol tok, bambae i gat Pablik Tok evri wik. Plante taem, wan brata blong narafala kongregesen i kam mekem Pablik Tok. Sipos i no gat naf brata blong mekem Pablik Tok evri wik, kongregesen bambae i mekem bes blong hem nomo blong gat Pablik Tok oltaem.

Jisas Kraes, ol aposol, mo ol narafala we oli wok wetem olgeta long taem bifo, oli mekem Pablik Tok we i klosap sem mak long olgeta we ol Witnes blong Jeova tede oli mekem. Jisas i mekem ol nambawan Pablik Tok, i winim olgeta man long wol. Long saed blong Jisas, samfala oli talem se: “!I no gat man we i save tok olsem man ya samtaem!” (Jon 7:46) Tok blong Jisas i gat paoa, mo ol man oli sapraes long tok blong hem. (Mat. 7:​28, 29) Ol tok blong hem oli givhan gud long ol man we oli obei long tok blong hem. (Mat. 13:​16, 17) Ol aposol oli folem fasin blong Jisas. Long Ol Wok 2:​22-36 yumi ridim stori blong dei blong Pentekos long yia 33 K.T., mo bigfala paoa we tok blong Pita i gat long ol man. Tok blong hem i pulum plante man blong girap mo mekem wan samting blong folem ol tok ya long laef blong olgeta. Samtaem biaen, Pol i mekem wan pablik tok long Atens mo plante man oli haremgud long tok ya tu. (Wok 17:​22-34) Tede, ol Pablik Tok long kongregesen, wetem ol Pablik Tok long ol seket, distrik, nasnal, mo intenasnal asembli, oli halpem plante milian man finis. Yumi mas gat strong tingting blong kam oltaem long ol Pablik Tok.

MITING BLONG KINGDOM WOK

Miting ya i blong halpem yumi long wok blong prij. Hem i rerem yumi blong joen fulwan long wok blong talemaot gud nius blong Kingdom, mekem disaepol, mo talemaot jajmen we klosap nao God bambae i mekem i kamtru long ol man nogud. (Mat. 28:20; Mak 13:10; 2 Pita 3:7) Bighaf blong wok ya yumi mekem taem yumi storian long ol man wanwan long haos blong olgeta, mo taem yumi givim ol buk long olgeta we oli tokbaot Baebol. Be fasin blong yumi blong folem ol stret rul blong Jeova long laef blong yumi bambae i mekem se yumi gat gudhan blong prij mo yumi karem frut long wok ya. (Mat. 13:23; Jon 15:8) Long wok blong prij, yumi soemaot ol gudfala fasin we oli kamaot taem yumi folem ol tok blong Baebol long laef blong yumi. Ol Miting Blong Kingdom Wok i tokbaot olgeta haf ya blong wok blong God we yumi mekem.

Evri manis, Kingdom Wok Blong Yumi i gat program blong Ol Miting Blong Kingdom Wok. Yu save kasem wan Kingdom Wok Blong Yumi long kongregesen blong yu. Taem wan niufala Kingdom Wok Blong Yumi i kamaot, presiden elda i ridimgud ol save long hem, nao i givimaot ol haf blong miting long ol brata we oli nafgud blong mekem. Maet hem i askem long wan narafala elda blong givimaot ol haf ya.

Ol elda mo ol man blong givhan we oli nafgud, oli mekem ol tok long Ol Miting Blong Kingdom Wok. Oli mas lukaotgud blong no ademap sam narafala save, oli mas mekem ol tok ya folem wanem we Kingdom Wok Blong Yumi i talem. Blong mekem olsem, oli mas stadigud fastaem long ol save ya. Oli mas luksave ol impoten poen we oli mas tijim kongregesen long hem. Oli mas tingbaot olsem wanem blong tokbaot ol poen ya, blong mekem se ol brata oli kasem save gud long olgeta, mo blong oli no fogetem olgeta. Mo oli mas tingting gud olsem wanem ol save ya i laenap wetem kongregesen.

I gat plante gudfala fasin blong mekem wan tok. Be fasin we brata i yusum blong mekem tok i no bigfala samting. Save we hem i givimaot, hemia nao bigfala samting. Ol pleplei oli no blong mekem sinema, mo i no nid blong putum plante samting long platfom blong yusum long ol pleplei ya. Oli save mekem pleplei olsem we oli stap long ples blong wok, long wok blong prij, long wan Baebol stadi, taem famle i stap storian tugeta, no long wan narafala wei we i stret long ples blong yumi. Olsem nao, ol pablisa bambae oli luksave se ol pleplei ya oli save givhan long olgeta.

Maet ol brata we oli gat tok long miting oli askem long sam pablisa we oli givim laef blong olgeta i go long God finis mo oli soemaot gudfala eksampol, wetem sam pikinini blong olgeta we oli gat gudfala fasin, blong oli joen long sam haf blong miting ya, olsem ol pleplei. Brata we i mekem tok i save askem sam kwestin long olgeta, no i save askem long olgeta blong oli storian long wan samting we i bin hapen long wok blong prij. Sipos oli askem long yu blong mekem samting olsem, yu mas glad blong mekem mo traehad long hem. Hemia i wan wok we Jeova i givim long yu.

Olgeta Kristin oli mas gat wan fasin blong laef we i save pulum ol narafala man blong oli wantem biaen long Jisas Kraes mo givim laef blong olgeta i go long Jeova blong kam Witnes blong Hem. Blong givhan long ol Kristin long rod ya, Ol Miting Blong Kingdom Wok i mekem olsem: (1) Hem i pulum yumi blong joen fulwan long wok blong prij long ol haos wanwan, prij long rod, mo long eniples we yumi faenem ol man, mo i pulum yumi tu blong traem kamgud moa long wok blong prij; (2) Miting ya i tijim yumi olsem wanem blong mekem ol visit long ol man we oli soem intres no ol man we oli karem wan buk; (3) Miting ya i pulum yumi blong makemaot taem evri wik blong mekem Baebol stadi long ol man mo blong lidim olgeta oli kam long ogenaesesen; (4) Miting ya i soemaot long yumi olsem wanem blong tekem janis blong prij; (5) Miting ya i soemaot olsem wanem yumi save givhan long ol man we oli jes stat blong intres long trutok, ol pikinini blong yumi, mo ol narafala yangfala, blong oli givim laef blong olgeta i go long God mo kam ol disaepol blong Kraes.

Miting ya bambae i givhan moa long yu sipos yu rerem ol haf blong hem folem program long Kingdom Wok Blong Yumi. Sam tok long miting ya oli save kamaot long ol buk blong ol Witnes blong Jeova. Sipos yu ridim ol haf ya fastaem, bambae yu kasem moa save, mo bambae yu rere blong givim ansa long miting tu. Moa we yu lanem long Ol Miting Blong Kingdom Wok, moa we bambae yu gat gudhan long wok blong prij.

Taem evriwan long kongregesen oli go long olgeta Ol Miting Blong Kingdom Wok, kongregesen i stap wok wetem wan tingting nomo. Olgeta Witnes we oli baptaes finis oli man blong prij, taswe oli nidim blong go long olgeta Ol Miting Blong Kingdom Wok, from we ol miting ya oli blong halpem olgeta blong mekemgud wok ya. Mo tu, miting ya i givhan gud long olgeta we oli gat tingting se oli wantem givim laef blong olgeta i go long God blong kam wan man blong hem. Yu mas mekem se miting ya i stap long program blong yu evri wik.

I no naoia nomo we yumi jes stat blong mekem ol miting olsem. Baebol i soemaot se long taem bifo finis, oli mekem miting olsem. Bifo we Jisas i sanem ol disaepol blong hem oli goaot blong prij, hem i tijim olgeta long wanem samting we oli mas talem mo mekem. (Mat. 10:5–11:1; Luk 10:​1-16) Biaen, ol disaepol ya oli gohed blong mekem ol miting olsem. Oli tokbaot ol samting we i hapen long wok blong prij, mo samting ya i givim paoa long olgeta blong gohed strong blong talemaot Kingdom. (Wok 4:​23-31) Tede, yumi mekem sem mak.

TIOKRATIK SKUL

Tiokratik Skul i wan rod we i gohed oltaem blong tijim yumi evriwan long kongregesen. Long skul ya, i gat ol Baebol riding, ol tok we oli stanap long Baebol, ol studen oli mekem tok olsem we oli stap long wok blong prij, mo i gat sam narafala trening we skul ya i givim long wok blong prij. Ol studen oli kasem advaes blong givhan long olgeta blong kamgud moa long ol tok blong olgeta. Tiokratik Skul i givim plante save we i pulum intres blong yumi evriwan long kongregesen mo i givhan long yumi. Antap long hemia, skul ya i givim janis long ol wanwan studen mo ol narafala, blong oli kamgud moa long ol defren haf blong wok blong prij we oli mekem. Sam samtaem i gat tingtingbak, we i givhan long yumi blong skelem sipos yumi stap kamgud moa from trening we yumi stap kasem long wok blong prij.

Evri yia, ogenaesesen blong Jeova i rerem wan program blong Tiokratik Skul blong ful yia. Program ya i talem ol save we yumi mas yusum long ol tok blong yumi, mo olsem wanem blong mekem ol tok. Plante yia finis, Tiokratik Skul i mekem bigfala wok blong trenem ol Witnes blong Jeova blong oli gat gudhan long wok blong talemaot Kingdom. Olgeta we oli stap go long ol miting blong kongregesen, wetem olgeta we oli jes stat blong joen long ol miting, oli save putum nem blong olgeta blong joen long skul ya, be oli mas agri wetem olgeta tijing blong Baebol mo oli mas stap folem ol Kristin rul long laef blong olgeta.

Taem yumi putum nem blong yumi blong joen long Tiokratik Skul, yumi soemaot se yumi wantem gohed long saed blong spirit. Tijing we yumi kasem long skul ya i save givhan long yumi blong mekem “ol gudgudfala wok” blong presem Jeova, taem yumi prij. (Mat. 5:16) Tijing ya i save mekem se yumi yusumgud taem we yumi gat blong prij, mo yumi givim ol gudfala ansa long miting we oli pulum ol narafala blong wok. Long saed blong ol brata, tijing ya i givhan bigwan long olgeta blong oli kasem mak we oli naf blong kam man blong givhan mo elda. Sloslo bambae i givhan long olgeta blong mekem ol impoten tok long Ol Miting Blong Kingdom Wok mo blong givim ol pablik tok.

Blong mekem se ol studen oli save reremgud ol tok blong olgeta, longtaem lelebet bifo we oli mekem wan tok, oli kasem wan pepa blong talemaot wanem tok we oli mas mekem. Taem yumi mekem wan tok long skul ya, i impoten we yumi kasem Haos Kingdom bifo we miting i stat. Yumi mas mekem bes blong yumi blong mekem evri tok we oli givim long yumi. Sipos wan samting i hapen long las minit we i mekem se yu no save mekem tok blong yu, yu mas talemaot kwiktaem long elda we i lukaot long Tiokratik Skul no long brata we i givhan long hem. Olsem nao, tufala i save askem long narafala blong i mekem tok ya.

Tiokratik Skul i stap givhan bigwan long yumi, from we i stap givim kakae long saed blong spirit oltaem long yumi. Profet Aesea i talem se: “Hae God i Masta blong mi, mo hem i tijim mi finis long ol tok we hem i wantem blong mi mi talem, blong mi save mekem olgeta we oli slak oli strong bakegen.” (Aes. 50:4) Skul ya i mekem bigfala wok finis blong trenem plante milian man blong talemaot ol tok we Jeova i tijim olgeta long hem. Plante yia finis, skul ya i givhan long olgeta we oli joen long hem blong oli gohed moa long saed blong spirit, mo blong oli lanem blong kamgud moa long wok blong talemaot gud nius blong Kingdom. Tabu spirit i lidim trening ya we i mekem se ol man blong God oli save givim ansa long ol man we oli askem long olgeta from wanem oli bilif long wan gudfala fiuja. Tijing ya we yumi kasem blong yusumgud Baebol, hem i wan blesing.

Laebri blong Haos Kingdom i save givhan bigwan long olgeta we oli stap mekem ol tok long Tiokratik Skul. Long laebri, i mas gat ol buk blong ol Witnes blong Jeova, ol Watch Tower Publications Index, ol defren Baebol, konkodens, mo sam narafala buk blong givim save. Yumi save ridim ol buk ya long Haos Kingdom, bifo mo afta long ol miting.

BUK STADI

Buk Stadi i save givhan bigwan long evriwan long kongregesen mo ol narafala we oli kam long ol miting blong yumi. Plante man oli kam long ol miting blong kongregesen, be ol Buk Stadi grup oli smol nomo. Maet long wan grup, i gat sam famle nomo wetem sam narafala. Ol Buk Stadi oli stap long ol defren ples long teritori blong kongregesen, ale, i no hadwok tumas blong ol man oli go long olgeta. Plante taem oli stap long haos blong sam brata sista, be kongregesen i save yusum Haos Kingdom tu blong mekem Buk Stadi.

Buk Stadi i givim sam samting long yumi we yumi no kasem long ol narafala rod. ?Olsem wanem i mekem olsem? Long Buk Stadi yumi stadi gud long Baebol. Mo tu, from we grup i no bigwan, brata we i lukaot long Buk Stadi i save givhan long wanwan brata sista long grup blong hem, blong oli gohed moa long saed blong spirit. Maet hem i serem sam advaes blong Baebol wetem olgeta blong leftemap tingting blong olgeta, mo halpem olgeta long wok blong prij. Mo hem i save halpem olgeta long sam narafala rod long saed blong spirit, olsem we wanwan long olgeta oli nidim. Help ya we yumi wanwan i kasem long Buk Stadi, i soemaot se Jeova i lavem yumi mo i lukaotgud long yumi.​—Aes. 40:11.

Elda we i lukaot long Buk Stadi, hem i stadigud long Tok blong God, mo hem i naf blong halpem ol narafala blong kasem save moa long Baebol mo mekem ol save ya i wok long laef blong olgeta. Hem i lidim Buk Stadi, mo antap long hemia, hem i soem intres long wanwan man long Buk Stadi blong hem, se oli stap strong long saed blong bodi mo long saed blong spirit. Hem i givhan long olgeta long wok blong prij, mo hem i visitim olgeta wetem sam narafala long kongregesen we oli nidim, blong leftemap tingting blong olgeta. Sipos i no gat naf elda, wan man blong givhan we i naf, hem i save lidim Buk Stadi.

Miting ya i wan stadi we grup i mekem long Baebol, wetem wan buk we ol Witnes blong Jeova oli wokem. Oli mekem stadi ya long sem fasin olsem Wajtaoa Stadi. Oli openem mo klosem miting ya wetem prea, oli ridim ol haf long buk, mo oli askem ol kwestin we oli joen wetem wanwan haf. Ol man oli givim ansa, mo oli ridim ol vas we oli gat taem blong ridim. Blong makem ol bigfala poen long tingting blong wanwan man, maet long en blong stadi, brata we i lidim stadi i askem sam kwestin blong tingtingbak. Sipos yumi go long Buk Stadi evri wik, bambae yumi kasem plante save, mo bambae mining blong ol save ya i kam klia. Bambae yumi kasem save from wanem buk i talem ol tok we i talem, mo ol pruf blong Baebol blong sapotem ol tok ya. Bambae yumi lanem olsem wanem blong storian long ol narafala long wok blong prij long saed blong ol save ya. (2 Tim. 2:15) Miting ya bambae i givhan long yumi blong kam gud moa long wok blong tijim ol narafala long Tok blong God.

Long smol grup olsem, i gat plante janis blong givim ansa. Taswe, yumi evriwan, wetem ol niuwan tu, yumi gat janis blong lanem blong talemaot bilif blong yumi long fes blong ol narafala. (Hib. 13:15) Taem yumi givim ansa, i gud blong traem yusum ol prapa tok blong yumi, i bitim we yumi ridim ol ansa nomo we oli stap long buk.

Evriwan oli save ridim ol vas blong Baebol, be wan nomo i save ridim ol paragraf long Buk Stadi. Sipos i gat wan brata we i baptaes finis mo i save rid gud, sam dei bifo, elda we i lukaot long Buk Stadi bambae i askem long hem blong ridim ol paragraf. Evri wik i save gat defren brata i ridim ol paragraf. Sipos i no gat wan brata we i naf, elda we i lukaot long Buk Stadi i save rid, sipos no, hem i save askem long wan sista we i naf, blong hem i rid.

Ol Buk Stadi oli stap long plante ples long teritori blong kongregesen, taswe i no hadwok long yumi mo long ol niuwan blong kam long stadi ya. Yumi mas traehad blong singaot sam narafala oli kam wetem yumi long miting ya. Olsemia, olgeta tu oli save harem gud long ol storian ya long Baebol mo gudfala kampani blong ol brata sista.

Maet ples blong Buk Stadi i wan ples we kongregesen i mekem miting blong prij tu. Sipos i olsem, grup i save putum ol stret taem we ol pablisa oli save mit long ples ya bifo we oli go prij. Sipos ol Buk Stadi grup oli folem ol plan ya, bambae yumi evriwan i wok gud tugeta blong mekem tufala wok ya blong stadi mo prij.