Ol Man Blong Talemaot Gud Nius
OL RIPOT LONG WOK BLONG PRIJ
Longtaem finis i kam, ol man blong Jeova oli glad blong harem ol ripot se wok blong Jeova i stap kam bigwan moa. Jisas i talem long ol man blong hem se oli mas talemaot gud nius long olgeta ples long wol. Ol tru Kristin oli wantem tumas blong luk olsem wanem samting ya i stap kamtru.—Mat. 28:19, 20; Mak 13:10; Wok 1:8.
Bifo, ol man blong Jisas Kraes oli glad blong harem ol ripot long wok blong prij. (Mak 6:30) Buk blong Ol Wok i talem se samwe long 120 disaepol oli stap long lafet blong Pentekos, nao tabu spirit i kamdaon long olgeta. Smoltaem afta, namba blong ol Kristin ya i gru, i kasem 3,000, mo biaen 5,000. Oli harem gudfala ripot ya se: “Evri dei, Hae God i stap sevem ol man, i stap joenem olgeta long grup ya blong ol aposol.” Mo “plante pris tu oli bilif long Jisas.” (Wok 1:15; 2:5-11, 41, 47; 4:4; 6:7) !Ol disaepol oli glad blong harem ol ripot ya, se ol man blong Jeova oli stap kam plante moa! !I klia se ol ripot ya oli pulum olgeta blong wok strong moa long wok ya we God i givim long olgeta, nating we ol lida blong skul blong ol man Jiu oli mekem bigfala trabol long olgeta!
Samwe long yia 60-61 K.T., Pol i raetem leta i go long ol Kristin long Kolosi. Hem i talem se gud nius ya “i stap goaot moa yet long olgeta ples long wol, i stap mekem i gud long olgeta man,” mo “ol man oli talemaot [gud nius ya] finis long olgeta man long wol.” (Kol. 1:5, 6, 23) Ol faswan Kristin oli obei long Tok blong God, taswe tabu spirit i givim paoa long olgeta blong prij long olgeta ples, bifo we fasin blong laef blong ol man Jiu i finis long yia 70 K.T. Oli mekem wan wok we i luk olsem se i bigwan tumas long olgeta. !Ol gudfala Kristin ya oli glad tumas taem oli harem ripot blong ol frut we i kamaot long wok blong olgeta!
Tede tu, ogenaesesen blong Jeova i kipim ol ripot blong wok ya we i mekem Matiu 24:14 i kamtru. Vas ya i talem se: “Bambae ol man oli stap talemaot gud nius ya [“blong Kingdom,” NW]. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae [“en,” NW] i save kam.” Yumi, we yumi givim laef blong yumi i go long God finis, yumi save se yumi gat wan impoten wok blong mekem. Yumi wanwan i mas wantem we wok ya i finis bifo we en i kam. Jeova bambae i meksua se wok ya i finis. Sipos yumi tu yumi joen long wok ya, bambae Jeova i glad long yumi.
RIPOT BLONG YU
?Yu mas raetem wanem samting long ripot blong yu? Ogenaesesen i wokem wan pepa we oli kolem Ripot Blong Wok Blong Prij, mo pepa ya i soemaot ol save we yu mas givim. Sam samtaem Kingdom Wok Blong Yumi i tokbaot ol samting we yumi mas putum long ripot. Mo maet ol save we i kam biaen oli givhan long yu tu.
Aninit long tok ya “Ol Buk,” “Ol Buklet,” mo “Ol Magasin,” yu save raetem hamas buk, buklet, mo magasin yu bin givimaot long ol man we oli no baptaes olsem Witnes.
Taem yu gobak blong luk wan man we i no baptaes, mo yu givim moa save long hem long saed blong Baebol, hemia i wan visit. Evri taem we yu mekem olsem yu makem wan visit long ripot blong yu aninit long “Ol Visit.” Be blong makem wan visit, yu mas mitim bakegen semfala man we yu bin storian long hem fastaem. Sipos Sevis Komiti blong kongregesen i talem long yu blong mekem stadi long wan brata no sista we i baptaes finis be i no moa prij, yu save makem wan visit long ripot blong yu. Sipos yu stadi wetem wan brata no sista we i jes baptaes, mo i nidim help yet blong smoltaem, yu save makem wan visit long ripot blong yu. Yu mekem wan visit taem yu gobak blong luk wan man long haos blong hem, no yu raetem leta long hem, no yu toktok wetem hem long telefon, no yu karem buk no magasin i go long hem. Evritaem we yu mekem Baebol stadi long wan man, yu makem wan visit long ripot blong yu.
Nating se yu mekem Baebol stadi evri wik long wan man, yu makem Baebol stadi ya wan taem nomo long ripot blong yu long en blong manis. Long ol kantri we i gat pepa ya Stadi Ripot, ol pablisa oli mas fulumap wan pepa long en blong manis blong ol wanwan Baebol stadi we oli mekem long ol man we oli no baptaes, no blong ol narafala we paragraf biaen i tokbaot. Afta we yu fulumap pepa ya blong ol wanwan stadi, raetem fulnamba blong ol Baebol stadi long Ripot Blong Wok Blong Prij, long raetsaed blong hem daon. Namba we yu raetem long ples ya i mas sem mak long namba blong ol Stadi Ripot we yu bin fulumap.
Aninit long “Ol Aoa” yu mas raetem stret namba blong aoa we yu mekem long wok blong prij. Hemia ol aoa we yu spenem blong prij long ol haos wanwan, prij long rod, mekem ol visit mo Baebol stadi, tekem janis blong prij, mo ol narafala fasin blong prij long pablik ples long ol man we oli no baptaes. Sipos Sevis Komiti blong kongregesen i askem long yu blong mekem Baebol stadi long wan brata no sista we i no moa prij, yu yu save makem Baebol stadi ya long ripot blong yu. Sipos Baebol stadi blong yu i tekem baptaes, be i nidim help yet ale yu gohed blong mekem Baebol stadi long hem blong smoltaem, yu save gohed blong makem aoa blong stadi ya long ripot blong yu. Sipos tu pablisa i stap prij tugeta, tufala evriwan i save makem aoa we tufala i spenem long wok blong prij sipos tufala evriwan i toktok blong givim witnes. Be i gat sam narafala impoten wok we yumi no makem ol aoa blong hem long ripot blong prij. Hemia ol aoa we yumi spenem blong rere from wok blong prij, blong kam long miting blong prij, mo blong wokbaot i go long teritori mo kambak.
Yu save stat blong kaontem ol aoa taem yu stat prij long faswan man, gogo yu finisim toktok blong yu long laswan haos long wok blong prij. Sipos yu spel smol blong kakae no dring, yu no kaontem taem ya. Ol haftaem paenia, fultaem paenia, spesel paenia mo ol misinari, oli gat wan stret namba blong aoa we oli mas kasem. Ol pablisa tu oli mas putum ol wok blong Kingdom fastaem long ol narafala wok blong olgeta, mo traem bes blong olgeta long wok blong prij folem ol samting we i stap long laef blong olgeta. Yes, olgeta we oli givim laef blong olgeta long Jeova finis, oli mas mekem wok blong hem wetem ful paoa blong olgeta. (Kol. 3:23) Ol brata we oli mekem pablik tok oli save makem aoa blong hem long ripot blong olgeta. Wan papa no mama we i stadi wetem ol pikinini blong hem we oli no givim laef blong olgeta long God yet, i save makem wan aoa evri wik from stadi ya.
Yu no mas makem ol haf aoa long ripot blong yu. Nomo se, sipos wan pablisa i olfala, i no save aot long haos, i stap long hospital, no i handikap, hem i save makem 15 minit, haf aoa, 45 minit long ripot blong hem. Sipos hem i givim witnes blong 15 minit nomo long wan manis, hem i mas makem taem ya long ripot blong hem, olsem nao kongregesen i save kaontem hem olsem wan pablisa. Plan ya i stret tu long pablisa we i kasem wan trabol, maet wan strong sik no wan kil, mo i no save prij blong wan no tu manis. Plan ya i blong olgeta nomo we wan bigfala trabol i blokem wok blong olgeta. Sevis Komiti bambae i tekem desisen hu nao pablisa we i save folem plan ya.
KAD BLONG PABLISA
Taem kongregesen i kasem ripot blong yu evri manis, oli raetem i go long Kad Blong Pablisa. Ol kad ya oli stap long fael blong kongregesen, oli no blong wanwan pablisa. Sipos yu muv i go long wan narafala kongregesen, yu mas talemaot long ol elda. Sekretari blong niufala kongregesen bambae i raetem leta i go long olfala kongregesen blong yu, blong askem ol elda blong sanem Kad Blong Pablisa blong yu. Sipos sekretari blong olfala kongregesen blong yu i save nem blong kongregesen we bambae yu go long hem, hem i no nid blong wet blong ol elda oli askem kad ya. Hem i save sanem i go nomo wetem wan leta blong talemaot yu. Olsem nao, ol elda long niufala kongregesen bambae oli savegud ol nid blong yu long saed blong spirit mo oli save gohed blong givhan long yu. Sipos yu gowe blong smoltaem nomo we i no bitim tri manis, yu mas sanem ripot blong prij i gobak long kongregesen evri manis.
?FROM WANEM YUMI PUTUM RIPOT BLONG PRIJ?
?Olsem wanem? ?Yu yu stap fogetem blong putum ripot blong prij long en blong manis? Ating yumi evriwan i save fogetem sam samtaem. Be sipos yumi gat stret tingting long saed blong ripot blong prij mo yumi luksave se i impoten blong putum, ating bambae i isi moa blong tingbaot ripot ya evri manis.
Samfala oli askem se: “?From wanem mi mas putum ripot blong prij? Jeova i save ol wok we mi mi mekem.” I tru, Jeova i save ol wok blong yumi wanwan, mo hem i save gud sipos yumi stap wok wetem ful paoa blong yumi no nogat. Be tingbaot we Jeova i raetemdaon long Baebol hamas dei stret we Noa i stap long sip, mo hamas yia stret we ol man Isrel oli bin wokbaot long draeples. Mo God i talem hamas man oli stap tru long hem mo hamas man oli no obei long hem. Hem i raetemdaon stori blong ol man Isrel taem oli winim ol taon long Kenan, mo stori blong ol gudfala jaj long Isrel. Hem i raetemdaon plante smosmol samting we ol man blong Hem bifo oli mekem. God i putum ol save ya long tingting blong ol man we oli raetem Baebol. Samting ya i soemaot se Hem i tinghae long ol ripot.
Ol samting we oli raetemdaon long Baebol long taem bifo, oli soemaot se ol man we oli karem nem blong Jeova oli mekem ol ripot we oli stretgud. Long plante stori, sipos oli no bin raetem ol namba stret, bambae stori i no gat bigfala paoa. Tingbaot ol stori ya long Jenesis 46:27 mo Eksodas 12:37; Jajes 7:7; 2 King 19:35; 2 Kronikel 14:9-13; Jon 6:10; 21:11; Ol Wok 2:41; 19:19.
Tede, i gat plante risen blong putum ripot blong prij. I klia se ol ripot ya oli no soemaot evri wok we yumi mekem i go long Jeova. Be ripot i wan gudfala tul we i givhan long evriwan insaed long ogenaesesen blong Jeova, wetem ol elda tu.
Ripot i save soemaot wanem wok we yumi slak long hem. Ol namba oli save soemaot ol wok we yumi kamgud moa long hem, oli save soemaot tu sipos i no moa gat plante niufala pablisa, mo ol narafala wok we i no gohed strong. Maet wan pablisa i nidim narafala blong leftemap tingting blong hem, no maet hem i gat sam trabol we i nidim help blong stretem. Ol elda oli jekemgud ol ripot, mo oli traehad blong stretem eni samting we i stap blokem wanwan pablisa no fulwan kongregesen blong i no gohed gud.
Ol ripot oli givhan tu long ogenaesesen blong i save weples i nidim moa pablisa. Oli soemaot weples i gat moa frut long wok blong prij mo weples i no gat frut. Oli soemaot wanem kaen buk ol man oli nidim blong kasem save long trutok. From ol ripot, ogenaesesen blong Jeova i save hamas buk we ol defdefren ples oli nidim, nao oli wokem naf buk mo Baebol blong ol pablisa oli yusum long wok blong prij.
Ol ripot oli leftemap tingting blong yumi. Taem yumi harem nius blong wok blong prij long ol narafala ples blong wol, yumi harem gud. Ol ripot we oli soemaot se namba blong ol pablisa i kam antap, oli givhan long yumi blong luksave olsem wanem ogenaesesen blong Jeova i stap kam bigwan. Yumi harem stori blong wanwan brata sista we oli mekem yumi glad tumas mo oli pulum yumi blong wok strong moa. (Wok 15:3) Taswe i impoten we yumi wokgud folem plan blong kongregesen blong putum ripot. Hemia i soemaot se yumi tingbaot ol brata blong yumi long ol narafala ples. Putum ripot i wan smol samting nomo, be i soemaot se yumi folem gud plan blong ogenaesesen blong Jeova.—Mat. 24:45-47.
YUMI WANWAN I PUTUM SAM MAK BLONG KASEM
I nogud yumi skelem ripot blong yumi wan wetem narafala. (Gal. 5:26; 6:4) I no waes blong mekem olsem, from we laef blong ol wanwan man i defdefren. I moagud yumi wan yumi putum sam mak we yumi naf blong kasem. Olsem nao, bambae yumi save luk olsem wanem yumi stap kamgud moa long wok blong prij. Mo tu, sipos yumi putum ol mak we oli no strong tumas blong yumi wan i kasem, yumi haremgud taem yumi kasem ol mak ya.
YUMI JOEN LONG LASWAN RIPOT
Long taem bifo, profet Esikel i luk wan vison, mo wok we sam man oli stap mekem long vison ya i pija blong wok blong prij tede. Ol man long vison ya oli mas mekem wan ripot taem oli finisim wok blong olgeta. Esikel i luk sikis man we oli holem ol nalnal, oli rere blong mekem jajmen i kamtru long ol man Jerusalem we oli lego Jeova. Hem i luk namba seven man i kamtru we i holem samting blong raet long han blong hem. Nao Jeova i talem long hem se: “Yu go long evri ples long taon ya, yu putum mak long fored blong olgeta man we oli trabol, oli stap harem nogud from ol samting nogud ya we ol narafala man ya oli stap mekem insaed long taon ya.” Taem man ya i finisim wok ya blong putum mak long fored blong ol man we ol sikis man ya oli no mas kilim olgeta, hem i kambak blong mekem ripot. Hem i se: “Olgeta samting ya we yu yu talem, mi mi mekem finis.”—Esik. 9:1-11.
Yumi no save wanem laswan ripot we Jeova bambae i askem yumi blong mekem long saed blong bigfala wok blong prij we Matiu 24:14 i tokbaot. Be yumi save soemaot tangkiu from smol wok we Jeova i letem yumi blong mekem, sipos yumi putum ripot blong prij evri manis. Long en blong manis, kwiktaem nomo ol pablisa oli mas putum ripot blong prij. Sipos yu mekem olsem, ol brata we oli rerem ripot blong kongregesen blong sanem i go long branj ofis, bambae oli glad tumas.
Tru ya, i klia nomo se naoia Jeova i stap mekem wok i spid blong hivimap ol man we bambae hem i sevem olgeta long taem blong “bigfala trabol.” Yumi laef long stret taem we profet tok blong Aesea i stap kamtru, se: “Man ya we i smolwan bambae i kam taosen man, mo hemia we i olsem nating nomo bambae i kam wan strongfala nesen. Mi, Jeova, mi mekem wok ya i spid moa long stret taem blong hem.” (Rev. 7:9, 14; Aes. 60:22, NW) Yumi joen long kampani blong ol brata long ful wol we God i talem long olgeta se oli mas prij. Yumi wantem se bambae yumi save mekem ripot olsem man ya long vison blong Esikel, we hem i talem se: “Olgeta samting ya we yu yu talem, mi mi mekem finis.”—Esik. 9:11.