Ansa Long Wan Kwestin
◼ I gat sam Witnes we olgeta nomo oli stanemap ol grup mo oli kam wanples blong lukaot moa save long Baebol no blong tokbaot ol defdefren tingting we oli gat long saed blong Baebol. ?Olsem wanem? ?“Slef we i stret mo waes” i agri long fasin ya?—Mat. 24:45, 47, NW.
No, hem i no agri. Nating se i olsem, long ol defdefren ples long wol, sam brata mo sista oli stanemap ol grup blong olgeta nomo we oli no wok wetem “slef,” blong traem faenem moa save long saed blong sam samting we Baebol i tokbaot. Samfala oli stanemap ol grup ya blong stadi long tufala lanwis ya Hibru mo Grik, we ol man oli bin yusum blong raetemdaon Baebol. Be risen from wanem ol grup ya i wantem mekem stadi ya hemia blong skelem sipos New World Translation i stret. Hemia i no wan plan we slef i stanemap. Sam narafala oli lukaot moa save long saed blong saens we i joen wetem Baebol. Oli mekem sam Web saet mo sam ples long Intenet we ol man oli save go long hem blong talemaot mo tokbaot ol defdefren tingting blong olgeta. Oli mekem ol konfrens mo oli wokem sam buk blong talemaot save we oli faenem, mo oli ting se ol save ya i blong halpem yumi blong go moa long ol save we yumi stap lanem long ol Kristin miting mo ol buk blong yumi.
Raonabaot long wol, ol man blong Jeova oli stap kasem fulap save finis long saed blong Baebol, mo oli kasem plante toktok tu we i leftemap tingting blong olgeta taem oli go long ol miting blong kongregesen, ol asembli, ol distrik asembli, mo taem oli ridim ol buk blong ogenaesesen blong Jeova. Jeova i yusum tabu spirit blong hem mo Tok blong hem blong givim wanem we olgeta man blong hem oli nidim, nao oli save ‘joen gud we oli gat wan tingting nomo, mo we fasin blong olgeta i wan nomo,’ mo oli save gat wan ‘bilif we i stap kam strong moa oltaem.’ (1 Kor. 1:10; Kol. 2:6, 7) I sua se yumi gat bigfala tangkiu from ol samting long saed blong spirit we Jeova i stap givim long taem blong ol las dei ya. Taswe, “slef ya we i stret mo waes” i no agri long fasin ya we samfala oli wokem narafala buk, miting, no Web saet we i no kamaot long hem.—Mat. 24:45-47, NW.
I gud tumas blong luk we samfala oli wantem yusum save we oli gat blong sapotem gud nius blong Kingdom. Be, yumi no mas letem save we yumi wan i wantem faenemaot i pulum tingting blong yumi i gowe long wanem we Jisas Kraes i stap mekem tru long kongregesen blong hem long wol tede. Long faswan handred yia, aposol Pol i bin givim woning long ol Kristin blong oli lukaot long fasin ya blong stadi long ol samting we oli westem taem mo we i mekem man i taed blong nating nomo, olsem fasin blong “makem laen blong papa blong olgeta i gobak gogo kasem bifo olgeta.” Hem i gohed i se: “Ol bisnes ya i blong rao nomo, i no save givhan long ol man blong oli mekem ol samting we God i plan blong olgeta oli mekem. Fasin blong bilif nomo i save mekem plan ya i kamtru long yumi.” (1 Tim. 1:3-7) Yumi ol Kristin yumi mas traehad blong no “joen long ol krangke rao blong ol tija ya, mo long fasin ya we oli stap makem ol laen blong papa blong olgeta, gogo kasem bifo olgeta. Mo bambae [yumi] no go joen long ol rao mo ol faet we oli stap mekem from mining blong Loa blong Moses. Ol fasin ya oli nogud nating, oli no save givhan long ol man.”—Taet. 3:9.
Sipos ol brata sista oli wantem stadi moa long Baebol mo lukaot moa save, mifala i leftemap tingting blong olgeta blong yusum ol buk olsem Insight on the Scriptures, “All Scripture Is Inspired of God and Beneficial,” mo ol narafala buk blong yumi olsem olgeta we oli tokbaot ol profet tok we oli stap long buk blong Daniel, Aesea, mo Revelesen. Ol buk ya oli givhan bigwan blong stadi mo tingting dip long Baebol. Oli save givhan blong mekem se yumi ‘[“fulap long stret save,” NW], yumi waes, yumi luksave olgeta samting we God i wantem, blong bambae yumi savegud olgeta. Nao bambae yumi save mekem laef blong yumi i kam stret gud olsem we Masta blong yumi i wantem. Oltaem, bambae yumi save mekem ol stret fasin wetem ol gudgudfala wok, mo long fasin ya bambae yumi gohed blong save God moa, nao hem bambae i save glad long yumi from ol samting ya.’—Kol. 1:9, 10.