Mekem Fasin Blong Man We i Waes
1 Taem Jisas i askem long fo man we oli ol man blong pulum fis, blong oli kam biaen long hem, fofala ya i no wet blong tekem desisen blong olgeta, ‘wantaem nomo oli biaen long hem.’ (Mat. 4:18-22) Taem Sol blong Tasas i kam wan Kristin mo ae blong hem i kamgud bakegen, hem tu i no wet blong tekem aksen, “wantaem nomo, hem i stat go insaed long ol haos blong prea blong ol laen blong Isrel, i stap talemaot se Jisas ya, hem i Pikinini blong God.” (Wok 9:20) Ol dei mo aoa oli gohed nomo, neva oli stop. Mo taem oli pas finis, oli lus blong olwe. From samting ya nao, i impoten tumas we yumi yusum taem blong yumi long “fasin blong man we i waes.”—Efes. 5:15, 16.
2 Samting We Yumi No Tingbaot: Samting we yumi save mekem tede long wok blong Jeova, maet tumora yumi no save mekem. (Jem. 4:14) Eni taem nomo “samting we yumi no tingbaot” i save kasem yumi evriwan. (Pri. 9:11, NW) Antap long samting ya, yumi evriwan i stap kam olfala, mo long wol ya we yumi laef long hem naoia, i no gat rod blong ronwe long “trabol taem” ya blong ol olfala, we maet i blokem yumi blong mekem plante long wok blong Jeova. (Pri. 12:1) Taswe i no waes blong wet longtaem blong givim laef blong yumi i go long God, mo blong wet se evri samting i stretgud finis long laef blong yumi bifo we yumi mekem bes blong yumi long wok blong prij. (Luk 9:59-62) Taem Ebraham i olfala, hem i gat pis mo tingting blong hem i kwaet, mo ‘taem hem i ded, hem i olfala we i olfala mo i gat gudfala laef.’ Hemia from we hem i yusum laef blong hem long fasin we i waes, hem i givim laef blong hem i go fulwan long Jeova.—Jen. 25:8.
3 Yumi No Gat Plante Taem i Stap: Yumi tu yumi wantem spenem taem blong yumi long waes fasin from we “yumi no gat plante taem i stap.” (1 Kor. 7:29-31) I no longtaem nao, bambae fasin blong laef long wol ya i lus. Wok ya blong hivimap ol man we oli olsem sipsip long taem blong karem ‘kakae long garen,’ bambae i finis, nao bambae yumi no moa gat janis blong joen long hem. (Rev. 14:15) Yumi mas lukaot blong no letem ol wari blong laef mo ol narafala samting oli pulum yumi blong westem taem. I moagud yumi spenem taem blong yumi long wok blong prij. (Luk 21:34, 35) !Tingbaot glad we bambae yumi gat taem yumi tingtingbak long laef blong yumi mo yumi save se yumi bin joen fulwan long wok blong karem kakae long garen!
4 Oltaem yumi mas wekapgud, blong no mestem eni janis we maet yumi gat blong joen long nambawan wok ya we i givim glad. Long “taem we tok ya ‘tede’ i stap yet,” yumi mas gat strong tingting blong mekem bes blong yumi long wok blong Jeova. (Hib. 3:13) Sipos yumi mekem samting ya, bambae yumi soemaot se yumi gat trufala waes, from we “man we i stap mekem ol samting we God i wantem, hem bambae i no save lus samtaem.”—1 Jon 2:17.