Lukaot Olgeta We Oli Stret Blong Kasem Trutok
1. ?Olsem wanem yumi soemaot se yumi tingbaot wok blong prij olsem wan bigfala ona?
1 Taem Jisas i stap prij, hem i hadwok blong talemaot gud nius we i save mekem ol man we oli gat tingting daon, oli harem gud. (Aes. 61:1, 2) Tede, yumi nao yumi ol man we oli karem tok blong Kraes i go long ol man, mo yumi gat bigfala ona ya blong folem fasin blong Kraes. Taswe, yumi gohed strong blong traem faenem olgeta long teritori blong yumi we oli stret blong kasem trutok.—Mat. 10:11; 2 Kor. 5:20.
2. ?Olsem wanem Pol i soemaot se hem i rere blong prij long eni ples? ?Wanem frut i kamaot?
2 Rere Blong Prij Long Eni Ples: Taem aposol Pol i go long wan taon, fastaem hem i go long haos prea blong ol laen blong Isrel, blong prij long ol man Jiu mo ol proselaet. (Wok 14:1) Long Filipae, Pol mo Saelas tufala i go long wan ples we tufala i ‘harem se ol laen blong Isrel oli stap go long hem blong prea.’ Tufala i prij long wan grup blong ol woman, mo wan long ol woman ya, nem blong hem Lidia, hem i bilif long trutok.—Wok 16:12-15.
3. ?Antap long wok blong prij long ol haos wanwan, yumi gat janis blong prij weples bakegen?
3 Antap long wok blong prij long ol haos wanwan, i gat ol ples we ol bas mo taksi oli stap wet long hem, ples we ol man oli spel, ol ofis, ol kona blong rod we fulap man oli pas long hem, ol stoa, mo long rod we i gat plante stoa long hem. ?Yu ting se yu save prij long ol ples olsem? Maet yu save raetem leta no yusum telefon blong prij long olgeta we oli stap long ol haos no ol stori haos we oli lokem get blong olgeta blong ol man oli no save go insaed, no long ol vilej we i tabu blong yumi go insaed long olgeta. Sipos yu traehad blong faenem ol ples ya mo jenisim fasin blong yu blong prij folem nid blong ol man long eria blong yu, bambae yu “gat plante wok blong mekem long wok blong Masta.”—1 Kor. 15:58, NW.
4. ?Sipos teritori blong kongregesen blong yumi i smol, wanem samting we yumi save mekem?
4 Plante pablisa oli gat janis blong mekem moa long wok blong prij taem oli muv i go long wan narafala kongregesen, maet long kantri blong olgeta no long wan narafala kantri. Sam pablisa oli lanem wan narafala lanwis, nao oli save prij long ol man we oli kam long narafala kantri.
5. ?Wanem tingting we yumi mas gat long saed blong taem ya we yumi laef long hem? ?Yumi mas gat strong tingting blong mekem wanem?
5 Yumi no mas fogetem se “garen ya, hemia wol ya.” (Mat. 9:37; 13:38) From we en blong rabis wol ya i klosap we i klosap, yumi wanwan i mas tingbaot gud ol samting long laef blong yumi, tingbaot gudhan mo save we yumi gat, ol janis we yumi kasem, mo ol rod blong mekem moa long wok blong prij. Jeova i promes finis se sipos yumi putum wok blong Kingdom i stap long fasples long laef blong yumi, bambae hem i blesem ol traehad blong yumi blong mekem moa long wok blong prij.—Mat. 6:33, NW.