?Yu Yu Gat Wan Prapa Teritori Blong Yu?
1. ?Wanem ya wan prapa teritori blong yu?
1 Prapa teritori blong yu, hem i teritori we oli givim long yu blong yu prij long hem. Maet hem i stap long wan ples we i isi blong yu kasem kwiktaem, mo yu save prij long ples ya yu wan no wetem wan narafala pablisa. I impoten blong sapotem plan blong kongregesen blong prij wetem ol narafala long grup, taem yumi naf blong mekem olsem. Be sipos yu gat wan prapa teritori blong yu we yu save wok long hem long ol narafala taem, hemia i save givhan long yumi blong prij long evri man, antap moa sipos kongregesen i gat plante teritori.—Wok 10:42.
2. ?Wanem sam gudfala samting we i kamaot taem yumi gat wan prapa teritori blong yumi?
2 Ol Gudfala Samting We i Kamaot From: Samfala oli faenem se i gud blong prij long medel dei no afta long wok, long wan prapa teritori blong olgeta klosap long ples we oli wok long hem. Sam famle oli joen wanples bifo long Buk Stadi, oli haremgud blong prij long ol man raonabaot long olgeta, blong samwe wan aoa. Frut we i kamaot se, ol man we oli mas gobak blong luk olgeta mo ol Baebol stadi we oli kasem taem oli prij long prapa teritori blong olgeta, oli no stap longwe tumas long haos blong olgeta. Hemia bambae i mekem se oli sevem taem, paoa mo mane blong olgeta. Taem yumi gat wan prapa teritori blong yumi, yumi save mekem plante wok long smol taem nomo. Samting ya i save givhan long samfala blong oli mekem wok blong haftaem paenia sam samtaem no blong oli kam fultaem paenia. Mo tu, taem yumi gat wan prapa teritori blong yumi mo yumi save ol man long teritori ya, hemia i save mekem se oli trastem yumi. Mo tu, yumi save jenisim toktok blong yumi blong mekem i laenap wetem nid blong olgeta, nao yumi save karem moa frut long wok blong prij.
3. ?Wanem i hapen long wan paenia we i gat wan prapa teritori blong hem?
3 Wan seket elda i leftemap tingting blong wan paenia blong hem i gat wan prapa teritori blong hem. Paenia ya i tokbaot se: “Mi mi agri long advaes ya mo kwiktaem nomo mi savegud ol man long teritori ya mo mi frengud wetem olgeta. Mi jenisim taem we mi mas gobak blong luk olgeta, blong mekem i laenap wetem taem we i stret long olgeta. Frut we i kamaot se, namba blong ol visit blong mi we fastaem i 35 long wan manis, hem i go antap bitim 80, mo mi gat seven Baebol stadi.”
4. ?Olsem wanem blong kasem mo wok long wan prapa teritori blong yu?
4 ?Olsem Wanem Blong Kasem?: Sipos yu wantem askem wan prapa teritori blong yu, yu mas toktok long elda we i lukaot long ol teritori. Yu no mas fraet blong askem wan narafala pablisa blong i wok wetem yu, mo raetemdaon ol haos we i no gat man. Yu mas traem blong finisim teritori blong yu long fo manis. Sipos i hadwok blong mekem olsem, yu save askem long elda we i lukaot long Buk Stadi no sam narafala blong oli givhan long yu. Long en blong fo manis, yu save givimbak teritori ya we yu wok fulwan long hem, no yu save askem blong wok long hem bakegen. Be yu no save holemtaet sem teritori ya oltaem. Yu mas givimbak blong ol narafala oli save askem mo wok long hem tu. Sipos yu stap long wan kongregesen we i gat smol teritori nomo, maet yu save askem wan smol haf blong teritori long elda we i lukaot long buk stadi blong yu.
5. ?I nidim wanem blong yumi save finisim wok ya blong prij?
5 Wok blong yumi i blong prij long “olgeta ples long wol.” Hemia i wan bigfala wok ya. (Mat. 24:14) I nidim wan gudfala plan mo traehad blong finisim wok ya. Taem yumi joen long grup blong prij wetem ol narafala mo yumi prij long prapa teritori blong yumi, hemia i givhan long yumi blong karem gud nius i go long plante moa man.